Mateo 23:1-39
23 Cheʼ jiñi, Jesús tsiʼ pejca jiñi quixtañujob yicʼot jiñi xcʌntʼañob i chaʼan. Tiʼ subeyob:
2 «Jiñi xtsʼijbayajob yicʼot fariseojob tsiʼ chʼʌmbeyob i buchlib Moisés.
3 Jin chaʼan, melela yicʼot tsʼʌctesanla pejtelel chuqui miʼ subeñetla, pero mach laʼ mel muʼ bʌ i melob come mucʼ jach i yʌlob pero maʼañic miʼ melob.
4 Miʼ chajpañob al tac bʌ cuchʌl i miʼ yʌcʼob tiʼ quejlab quixtañujob, pero i bajñelob mi yomobicto i ñijcañob yicʼot juntsʼijt i yalob cʼʌb.
5 Pejtelel chuqui miʼ melob chaʼan jach yomob qʼuejlel. Miʼ colemtesañob jiñi alʌ caja tac* chaʼan miʼ poj cʌntañob i bʌ ti chuqui tac mach bʌ weñic i miʼ colemtesañob i tiʼ i pislel.
6 Miʼ mulañob ajñel ti ñumen wem bʌ ajñibʌl yaʼ ti ñuqui uchʼibʌl tac yicʼot ti ñaxan tac bʌ buchlibʌl yaʼ ti sinagoga,
7 yicʼot chaʼan miʼ pejcʌntelob yaʼ baqui an cabʌl lac piʼʌlob* i miʼ subentelob ti rabí.*
8 Pero jatetla mach laʼ wʌcʼ laʼ bʌ ti subentel ti rabí come juntiquil jach jiñi laʼ Maestro i luʼ laʼ wermañu laʼ bʌ.
9 Cheʼ jaʼel, mach laʼ suben ti laʼ tat juntiquil am bʌ wʌʼ ti lum come juntiquil jach laʼ Tat, jiñi am bʌ ti panchan.
10 Mach laʼ wʌcʼ laʼ bʌ ti subentel ti xpʌs bij jaʼel come juntiquil jach jiñi Xpʌs bij, jiñʌch Cristo.
11 Jiñi ñumen ñuc bʌ ti laʼ tojlel laʼ i melben i yeʼtel yambʌlob.
12 Jiñi muʼ bʌ i ñuqʼuesan i bʌ mi caj i peqʼuesʌntel, pero jiñi pecʼ bʌ miʼ mel i bʌ mi caj i ñuqʼuesʌntel».
13 «¡Xtsʼijbayajob yicʼot fariseojob, mi caj laʼ taj wocol! ¡Xlotetla!* Come maʼañic mi laʼ wʌcʼ ti ochel quixtañujob tiʼ Yumʌntel panchan. Mi jateticla mi laʼ wochel mi muqʼuicto laʼ wʌcʼ ti ñumel jiñi woli bʌ i ñopob ochel».
14 *
15 «¡Xtsʼijbayajob yicʼot fariseojob, mi caj laʼ taj wocol! ¡Xlotetla! Come mi laʼ cʼaxtan lum yicʼot mar chaʼan mi laʼ sujtesan juntiquil quixtañu tiʼ ñopbal jiñi judíojob, i cheʼ bʌ tsaʼix i sutqʼui i bʌ, mi laʼ wʌcʼ chaʼan miʼ chojquel majlel ti Gehena* i ñumen añob i mul bajcheʼ laʼ chaʼan».
16 «¡Xpotsʼ bʌ xpʌs bijetla, mi caj laʼ taj wocol! Come mi laʼ wʌl: ‹Mi an majqui miʼ taj ti tʼan jiñi templo chaʼan miʼ waʼchocon i tʼan, maʼañic i wocolel mi maʼañic miʼ tsʼʌctesan, pero mi an majqui miʼ taj ti tʼan jiñi oro am bʌ ti templo, yom miʼ wersa tsʼʌctesan i tʼan›.
17 ¡Tontojetla yicʼot xpotsʼetla! Tiʼ sujm, ¿chuqui ñumen ñuc bʌ i cʼʌjñibal? ¿Jimba jiñi oro, o jiñi templo tsaʼ bʌ i sujtesa ti chʼujul jiñi oro?
18 Cheʼ jaʼel, jatetla mi laʼ wʌl: ‹Mi an majqui miʼ taj ti tʼan jiñi pulʌntib chaʼan miʼ waʼchocon i tʼan, maʼañic i wocolel mi maʼañic miʼ tsʼʌctesan, pero mi an majqui miʼ taj ti tʼan jiñi majtañʌl am bʌ yaʼ ti pulʌntib, yom miʼ wersa tsʼʌctesan i tʼan›.
19 ¡Xpotsʼetla! Tiʼ sujm, ¿chuqui ñumen ñuc bʌ i cʼʌjñibal? ¿Jimba jiñi majtañʌl, o jiñi pulʌntib muʼ bʌ i sujtesan ti chʼujul jiñi majtañʌl?
20 Jin chaʼan, jiñi muʼ bʌ i taj ti tʼan jiñi pulʌntib chaʼan miʼ waʼchocon i tʼan woliʼ taj ti tʼan jiñi pulʌntib yicʼot pejtelel chuqui an tiʼ pam,
21 jiñi muʼ bʌ i taj ti tʼan jiñi templo chaʼan miʼ waʼchocon i tʼan woliʼ taj ti tʼan jiñi templo yicʼot Dios come yaʼʌch chumul,
22 i jiñi muʼ bʌ i taj ti tʼan jiñi panchan chaʼan miʼ waʼchocon i tʼan woliʼ taj ti tʼan jiñi i buchlib Dios yicʼot jiñi buchul bʌ yaʼi».
23 «¡Xtsʼijbayajob yicʼot fariseojob, mi caj laʼ taj wocol! ¡Xlotetla! Come mi laʼ wʌcʼ jiñi menta, eneldo yicʼot comino chaʼan mi laʼ chaʼlen coltaya, pero maʼañic woli laʼ tsʼʌctesan jiñi ñumen ñuc tac bʌ i cʼʌjñibal am bʌ yaʼ ti Mandar: Jiñi tojel, jiñi pʼuntaya yicʼot jiñi xucʼtʌlel. Yomʌch miʼ wersa mejlel jiñi ñaxam bʌ, pero mach yomic miʼ ñusʌntel ti pʼis ili yan tac bʌ.
24 ¡Xpotsʼ bʌ xpʌs bijetla, mi laʼ chic jiñi us pero mi laʼ bucʼ jiñi camello!».
25 «¡Xtsʼijbayajob yicʼot fariseojob, mi caj laʼ taj wocol! ¡Xlotetla! Come mi laʼ sʌqʼuesʌben i pat jiñi copa yicʼot jiñi plato, pero yaʼ tiʼ malil butʼul ti chuqui tac xujchʼibil yicʼot ñumeñix ti pʼis chuqui yomob.
26 Xpotsʼ bʌ fariseo, ñaxan sʌqʼuesʌben i malil jiñi copa yicʼot jiñi plato, cheʼ jiñi sʌc mi caj i cʌytʌl i pat».
27 «¡Xtsʼijbayajob yicʼot fariseojob, mi caj laʼ taj wocol! ¡Xlotetla! Come lajaletla bajcheʼ bombil bʌ mucoñibʌl,* wen utsʼatax tiʼ pat, pero tiʼ malil butʼul tiʼ bʌquel chʌmeñoʼ bʌ yicʼot ti chuqui tac jach bibiʼ bʌ.
28 Cheʼetla jaʼel: Tiʼ wut quixtañujob poj tojetla, pero ti laʼ malil butʼuletla ti cabʌl lot yicʼot jontolil».
29 «¡Xtsʼijbayajob yicʼot fariseojob, mi caj laʼ taj wocol! ¡Xlotetla! Come mi laʼ mel baqui miʼ mujquel jiñi xʼaltʼañob yicʼot mi laʼ chʼʌl baqui miʼ mujquel jiñi tojoʼ bʌ,
30 i mi laʼ wʌl: ‹Cheʼ tsaʼic chumleyon lojon tiʼ yorajlel jiñi lon c ñojteʼelob, maʼañic tsaʼ cotsa lon c bʌ tiʼ becʼol i chʼichʼel jiñi xʼaltʼañob›.
31 Cheʼ bajcheʼ jiñi, woli laʼ wʌlʌc sub laʼ bʌ chaʼan i yalobiletla jiñi tsaʼ bʌ i tsʌnsayob xʼaltʼañob.
32 Jin chaʼan, bej melela, ujtesanla tsaʼ bʌ i teche laʼ ñojteʼelob».
33 «I yaletla lucum am bʌ i venenojlel, ¿bajcheʼ mi caj laʼ putsʼtan jiñi tojmulil yaʼ ti Gehena?*
34 Jin chaʼan, mi caj c chocbeñetla tilel xʼaltʼañob, xcʌntesajob yicʼot wen añoʼ bʌ i ñaʼtʌbal. An muʼ bʌ caj laʼ tsʌnsañob yicʼot mi caj laʼ jichʼchocoñob ti teʼ, i an muʼ bʌ caj laʼ sʌsʌp jatsʼob* yaʼ ti laʼ sinagoga tac i mi caj laʼ tsʼaʼleñob ti jujumpʼejl tejclum.
35 Cheʼ bajcheʼ jiñi, jatetla mi caj laʼ toj chaʼan i chʼichʼel jiñi toj bʌ wiñicob tsaʼ bʌ bejqʼui wʌʼ ti lum, miʼ tejchel ti Abel cʼʌlʌl ti Zacarías, i yalobil Baraquías, tsaʼ bʌ laʼ tsʌnsa yaʼ baqui an jiñi templo yicʼot jiñi pulʌntib.
36 Tiʼ sujm mic subeñetla, jiñi quixtañujob añoʼ bʌ ti ili ora mi caj i tojob chaʼan pejtelel iliyi».
37 «Jerusalén, Jerusalén, jiñi muʼ bʌ i tsʌnsan xʼaltʼañob yicʼot muʼ bʌ i jul ti xajlel* jiñi muʼ bʌ i chojquelob majlel yaʼ baqui an..., ¡mach junsujtelic jach tsaʼ c ñopo c tempan laʼ walobilob cheʼ bajcheʼ jiñi xñaʼmut miʼ tempan i yal tiʼ yebal i wichʼ! Pero jatetla maʼañic tsaʼ laʼ jacʼʌ.
38 ¡Qʼuelela! Jiñi laʼ wotot mi caj i cʌjyel yicʼot mi caj laʼ cʌjyel jaʼel.
39 Come mic subeñetla chaʼan ti ili ora yicʼot ti talto bʌ qʼuin maʼañix mi caj laʼ chʌn qʼuelon jinto mi laʼ wʌl: ‹¡Aqʼuebil bendición jiñi woli bʌ i tilel tiʼ cʼabaʼ Jehová!›».*
Nota tac
^ Ili alʌ caja tac an i chaʼan i xujtʼil tac jiñi Chʼujul bʌ tsʼijbujel, i miʼ cʌchob tiʼ pam yicʼot ti tsʼej bʌ i cʼʌbob.
^ O «ti mercado».
^ O «maestro».
^ Ili jiñʌch cheʼ bʌ juntiquil quixtañu poj wen miʼ pʌs i bʌ pero mach i sujmic.
^ Ili versículo maʼañic miʼ tilel yaʼ ti oñiyix bʌ tsʼijbujel i tsiquil chaʼan mach yaʼic ochem ti jiñi tsʼijbujel tilem bʌ ti Dios.
^ Qʼuele jiñi Glosario.
^ Bombil bʌ ti tan.
^ Qʼuele jiñi Glosario.
^ Qʼuele jiñi Glosario, sʌsʌp jajtsʼel.
^ O «tun».
^ Qʼuele jiñi Glosario.
