Montre Ou Rekonesan
Montre Ou Rekonesan
“Ki lape Kris i diriz zot leker, . . . Viv an rekonesans.”—KOLOSYEN 3:15.
1. Ki diferans i annan ant kongregasyon Kretyen ek lemonn ki Satan pe kontrole?
DAN sa 94,600 kongregasyon Temwen Zeova partou dan lemonn, nou trouv sa kalite ki apel rekonesans. Sak renyon i konmans e termin avek en lapriyer kot kongregasyon i remersi Zeova. Souvan nou tann bann zenn ek bann aze, bann nouvo ek bann ki Temwen depi byen lontan pe dir “mersi,” “pa dekwa,” oubyen lezot lekspresyon parey kan zot zwenn ansanm pour ladorasyon oubyen pour pas en bon moman ansanm. (Psonm 133:1) Sa i vreman diferan avek sa leta lespri egois ki domin sa kantite dimoun “ki pa konn Bondye ek bann ki pa obei levanzil”! (2 Tesalonisyen 1:8) Nou pe viv dan en lemonn engra. Sa pa sirprenan letan nou mazinen lekel bondye sa lemonn, Satan Dyab. Son lorgey ek latitid rebel pe domin lasosyete imen!—Zan 8:44; 2 Korentyen 4:4; 1 Zan 5:19.
2. Ki lavertisman nou bezwen ekoute, e ki kestyon ki nou pou egzaminen?
2 Vi ki nou antoure avek lemonn Satan, nou bezwen veye ki nou pa ganny afekte avek son latitid. Dan premye syek, zapot Pol ti rapel bann Kretyen an Efez: “Zot ti pe viv dapre mannyer lemonn, an swivan sef pisans dan lespas, sa menm lespri ki aprezan pe travay dan bann zanfan dezobeisans. Nou tou, avan nou ti parey zot, nou ti viv dapre pasyon nou prop natir, e nou ti swiv bann dezir nou lekor ek nou lespri. Pour sa rezon, par natir, nou ti bann zanfan lakoler parey tou lezot imen.” (Efezyen 2:2, 3) Sa i leka pour bokou nou ozordi. Alor, ki mannyer nou kapab touzour montre ki nou rekonesan? Ki led Zeova i fourni? Ki bann fason pratik ki nou kapab demontre ki nou vreman rekonesan?
Rezon pour nou rekonesan
3. Kwa ki fer nou rekonesan anver Zeova?
3 Nou rekonesans i merit al pour Zeova, sa enn ki’n kree nou e donn nou lavi, sirtou letan nou mazin sa kantite kado ki i’n devers lo nou. (Zak 1:17) Toulezour nou remersye Zeova ki nou vivan. (Psonm 36:9) Otour nou, nou vwar levidans lanmen travay Zeova. Par egzanp, nou vwar soley, lalin, ek zetwal. Sa kantite mineral ki endispansab pour lavi lo nou plannet, sa bann gaz enportan dan latmosfer ki’n ganny byen kalkile, e ki mannyer lanatir i fonksyonnen, tousala i montre ki nou dwa nou Papa lanmour en det. Psalmis David ti sante: “Bokou keksoz ou menm ou’n fer, O Zeova mon Bondye, menm ou bann travay merveye e ou bann panse anver nou; okenn pa kapab ganny konpare avek ou. Si mon ti anvi dir e koz lo la, zot in vin pli bokou ki mon kapab rakonte.”—Psonm 40:5.
4. Akoz nou devret remersye Zeova pour sa lasosyasyon ankourazan ki nou rezwir dan kongregasyon?
4 Kantmenm ozordi nou pa pe viv dan en paradi fizik, bann serviter Zeova i kontan ki zot pe viv dan en paradi spirityel. Kot nou Lasal Rwayonm e dan bann lasanble, nou vwar fri lespri Bondye pe travay dan nou bann konpanyon Kretyen. Anfet, letan serten Temwen i pres avek bann dimoun ki pa tro relizye oubyen menm bann ki napa okenn larelizyon, zot montre sa bann dimoun sa ki Pol i dekrir dan son let ki i ti ekrir bann Galat. Premyerman zot atir latansyon sa bann dimoun lo “aktivite natir imen” e demann zot si zot in remark sa zot osi. (Galat 5:19-23) Laplipar zot i dakor ki sa i tipikman lasosyete imen ozordi. Kan zot vwar deskripsyon fri lespri Bondye e vin vwar laprev pour zot menm dan Lasal Rwayonm, bokou i deswit admet: “Bondye i reelman parmi zot.” (1 Korentyen 14:25) Nou pa vwar sa zis dan nou Lasal Rwayonm. Nenport landrwa ki ou pou vwayaze e rankontre enn parmi sa plis ki sis milyon Temwen Zeova, ou pou vwar sa menm latmosfer zwaye. Vreman, sa lasosyasyon ankourazan i en rezon pour nou remersye Zeova, ki’n donn son lespri pour fer li posib.—Tsefanya 3:9; Efezyen 3:20, 21.
5, 6. Ki mannyer nou kapab montre nou rekonesan pour sa pli gro kado ki Bondye in donn nou?
5 Sa pli gro kado, kado pli parfe ki Zeova in donn nou, i son Garson, Zezi, ki i’n donn konman en sakrifis. Zapot Zan ti ekrir: “Si Bondye in kontan nou avek en tel lanmour, nou osi nou bezwen kontan kanmarad.” (1 Zan 4:11) Wi, nou montre nou rekonesan pour sa ranson pa selman par eksprim nou lanmour ek rekonesans pour Zeova me osi par viv nou lavi dan en fason ki montre nou lanmour pour lezot.—Matye 22:37-39.
6 Nou kapab aprann plis konsernan montre nou lapresyasyon par egzamin fason ki Zeova ti azir avek ansyen nasyon Izrael. Par mwayen Lalwa ki i ti donn sa nasyon atraver Moiz, Zeova ti ansenny son pep bokou leson. Vi ki “dan lalwa i annan tou konnesans konplet ek laverite,” nou kapab aprann bokou ki pou ed nou swiv konsey Pol: “Viv an rekonesans.”—Romen 2:20; Kolosyen 3:15.
Trwa Leson atraver Lalwa Moiz
7. Konman laranzman pour donn ladim ti en loportinite pour bann Izraelit montre zot rekonesans anver Zeova?
7 Dan Lalwa Moiz, Zeova ti donn trwa fason ki bann Izraelit ti pou kapab montre zot lapresyasyon senser pour son labonte. Premyerman, ti annan ladim. En dizyenm prodwi agrikol e “tou le dizyenm bann gro zannimo ek bann pti zannimo” ti bezwen vin “en keksoz sen pour Zeova.” (Levitik 27:30-32) Kan bann Izraelit ti obeir, Zeova ti beni zot en kantite. “ ‘Anmenn tou dizyenm porsyon dan stor, pour ki i ava annan manze dan mon lakaz; e teste mwan, silvouple, dan sa domenn,’ Zeova bann larme in dir, ‘gete si mon pa ava ouver baro lapli lesyel avek zot e si mon pa ava vers en benediksyon lo zot ziska ki i ava nepli annan ankor bezwen.’ ”—Malaki 3:10.
8. Kwa ki ti fer lofrann volonter diferan avek ladim?
8 Dezyenmman, apard ki ladim, Zeova ti aranze pour ki bann Izraelit i fer kontribisyon volonter. I ti demann Moiz pour dir bann Izraelit: “Ler zot ariv dan sa pei ki mon pe anmenn zot, sak fwa ki zot manz okenn prodwi sa pei, zot devret fer en kontribisyon pour Zeova.” Zot ti bezwen pran zot premye ‘lafarin ordiner, fer en gato dan laform en kouronn’ e ofer li konman “en kontribisyon pour Zeova.” Zot ti bezwen fer sa kontinyelman. Remarke ki ti napa okenn presizyon konsernan kantite sa bann premye rekolt ki zot ti bezwen donnen. (Nonm 15:18-21) Me kan bann Izraelit ti ofer en kontribisyon pour montre zot rekonesans, zot ti sir ki Zeova ti pou beni zot. Nou vwar en laranzman parey an rapor avek tanp dan vizyon Ezekyel. Nou lir: “Bann pli bon fri parmi tou kalite premye fri mir e tou kalite kontribisyon ki zot donnen i pour bann pret. Zot devret donn bann pret zot bann premye lafarin ordiner pour ki en benediksyon i repoz lo zot lakaz.”—Ezekyel 44:30.
9. Ki Zeova ti ansenny son pep kan i ti demann zot pour kit sa ki reste deryer pour bann ki dan bezwen?
9 Trwazyenmman, Zeova ti fer en laranzman pour bann Izraelit kit sa ki reste dan zot plantasyon pour bann ki dan bezwen. I ti demann lepep: “Kan zot fer rekolt dan zot pei, zot pa devret rekolte tou sa ki dan zot plantasyon, e zot pa devret anmas tou sa ki reste deryer. Deplis, zot pa devret anmas sa ki reste deryer dan zot plantasyon rezen, e zot pa devret anmas bann rezen ki’n tonbe partou partou dan zot plantasyon. Zot devret kit zot pour bann ki dan difikilte e pour bann rezidan etranze. Mwan Zeova zot Bondye.” (Levitik 19:9, 10) Ankor enn fwa, lakantite ki zot ti merit kite pa ti ganny presize. I ti depan lo sak Izraelit pour deside ki kantite zot ti pou bezwen kite pour bann ki dan bezwen. Lerwa Salomon ti byen eksplike: “Sa ki pe rann servis bann ki pov, pe pret Zeova, e I pou rekonpans li pour son bon aksyon.” (Proverb 19:17) Dan sa fason, Zeova ti ansenny zot pour annan konpasyon ek konsiderasyon pour bann mwen fortinen.
10. Ki konsekans lepep Izrael ti sibir kan zot pa ti montre zot rekonesans?
10 Zeova ti beni bann Izraelit kan zot ti obeir par donn ladim, kontribisyon volonter, e fer provizyon pour bann pov. Me kan bann Izraelit pa ti montre zot rekonesan, zot ti perdi faver Zeova. Sa ti anmenn maler pour zot e finalman zot ti bezwen al an egzil. (2 Kronik 36:17-21) Alor, ki leson nou kapab tire?
Eksprim nou Rekonesans
11. Ki sa premye fason ki nou kapab montre nou rekonesans anver Zeova?
11 Premye fason ki nou kapab loue Zeova e eksprim nou rekonesans se atraver en “lofrann.” I vre ki nou bann Kretyen nou pa pe swiv Lalwa ki ti ganny donnen atraver Moiz. Alor nou pa bezwen ofer sakrifis zannimo oubyen bann prodwi agrikol. (Kolosyen 2:14) Toudmenm, zapot Pol ti sipliy bann Kretyen Ebre: “Annou touzour rann glwar Bondye, [ofer en sakrifis, NW ] setadir, annou toultan loue son non par nou labous.” (Ebre 13:15) Letan nou servi nou abilite ek resours pour rann glwar Zeova dan predikasyon oubyen kan nou “rasanble” avek nou bann frer ek ser Kretyen, nou kapab eksprim nou remersiman senser anver Zeova, nou Papa lanmour dan lesyel. (Psonm 26:12) Pour fer sa, ki nou kapab aprann atraver fason ki bann Izraelit ti bezwen eksprim zot lapresyasyon pour Zeova?
12. An rapor avek nou responsabilite konman Kretyen, ki leson nou tire atraver ladim?
12 Premyerman, parey nou’n vwar, ladim pa ti en laranzman ki ou ti kapab swazir si ou pou donnen oubyen non. I ti en lobligasyon pour tou Izraelit. Nou bann Kretyen nou annan sa responsabilite pour partisip dan predikasyon e asiste renyon Kretyen. Sa bann aktivite i obligatwar. Dan son fame profesi konsernan letan lafen, Zezi ti dir klerman: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Matye 24:14; 28:19, 20) Konsernan renyon Kretyen, zapot Pol ti ganny enspire pour ekrir: “Annou rode konman pous kanmarad pour annan lanmour e fer sa ki byen. Pa abandonn zot lasanble parey labitid serten parmi zot, me ankouraz kanmarad sirtou ki la sa Zour Senyer pe aprose.” (Ebre 10:24, 25) Nou montre nou rekonesan anver Zeova kan avek lazwa nou aksepte nou responsabilite pour prese e ansennyen, ensi ki asosye regilyerman avek nou bann frer dan bann renyon. Nou vwar sa konman en privilez e en loner.
13. Ki leson nou kapab tire atraver kontribisyon volonter ek sa laranzman pour pran swen avek bann ki dan bezwen?
13 Deplis, nou kapab benefisye letan nou egzamin sa de lezot fason ki bann Izraelit ti kapab montre zot lapresyasyon. Sa i kontribisyon volonter ek laranzman pour pran swen avek bann ki dan bezwen. Kontrerman avek ladim, ki ti klerman demann en serten kantite, kontribisyon volonter ek sa laranzman pour bann ki dan bezwen pa ti spesifye ki kantite en dimoun i devret donnen. Plito, se lapresyasyon profon ki en serviter Zeova ti annan dan son leker ki ti pou pous li pour donnen. Pareyman, menm si nou rekonnet ki partisipasyon dan predikasyon ek lasistans renyon i responsabilite tou serviter Zeova, eski nou fer zot volonterman e avek tou nou leker? Eski nou vwar zot konman en loportinite pour eksprim nou lapresyasyon senser pour tou sa ki Zeova in fer pour nou? Eski nou partisip dan sa bann aktivite otan ki nou sirkonstans i permet? Oubyen, eski nou vwar tousala konman zis en lobligasyon ki nou bezwen fer? Byensir, sa i bann kestyon ki sakenn ant nou i bezwen reponn personnelman. Zapot Pol ti met li koumsa: “Sakenn i devre egzamin son prop aksyon, alor si i annan keksoz pour fer li fyer, i ava fyer pour son prop aksyon san ki i bezwen konpar li avek sa ki pour lezot.”—Galat 6:4.
14. Ki Zeova i ekspekte avek nou dan nou servis ki nou donn li?
14 Zeova i konn byen nou sitiasyon. I konsyan ki nou annan nou limit. I apresye sakrifis ki son bann serviter i fer volonterman, ki swa i en gro sakrifis oubyen en pti sakrifis. I pa ekspekte nou tou pour donn menm kantite, e i pa ni posib pour nou fer sa. Kan zapot Pol ti pe diskit konsernan kontribisyon materyel, i ti dir bann Kretyen: “Si nou donn avek bonn volonte nou don i ganny aksepte par Bondye dapre sa ki nou annan, non pa dapre sa ki nou napa.” (2 Korentyen 8:12) Sa prensip i osi aplik byen avek nou servis ki nou donn Bondye. Pa lakantite ki fer Zeova aksepte nou servis me lafason ki nou fer li—avek lazwa e avek tou nou leker.—Psonm 100:1-5; Kolosyen 3:23.
Devlop e mentenir en Lespri Pionye
15, 16. (a) Ki relasyon i annan ant servis pionye ek lapresyasyon? (b) Ki mannyer bann ki pa kapab fer pionye i demontre en lespri pionye?
15 En fason pour montre nou rekonesans anver Zeova ki anmenn bokou satisfaksyon ek lazwa se pour pran servis aplentan. Pouse par lanmour pour Zeova ek lapresyasyon pour son faver imerite, bokou serviter in fer bann gran sanzman dan zot lavi pour ganny plis letan pour servi Zeova. Serten i kapab servi konman pionye ordiner, ki pas 70 er-d-tan tou le mwan pour pres sa bon nouvel e ansenny dimoun laverite. Lezot, ki zot sitiasyon i limit zot, i aranze pour pas 50 er-d-tan konman pionye asistan detanzaot.
16 Me sa kantite serviter Zeova ki pa kapab fer pionye ordiner oubyen pionye asistan, ki zot kapab fer? Zot kapab montre zot rekonesans par devlop e mentenir en lespri pionye. Konman? Par ankouraz bann ki kapab fer pionye, par enspir dan zot zanfan sa dezir pour fer servis aplentan vin zot karyer, e par travay dir dan predikasyon dapre zot sirkonstans. Sa ki nou donnen dan predikasyon i depan bokou lo ki kantite profon nou lapresyasyon i ete pour sa ki Zeova in fer, pe fer, e pou fer pour nou dan lavenir.
Demontre Rekonesans avek nou bann “Keksoz valer”
17, 18. (a) Ki mannyer nou kapab montre nou lapresyasyon avek nou “keksoz valer”? (b) Ki pwennvi Zezi lo kontribisyon ki sa vev ti fer e akoz?
17 Proverb 3:9 i dir: “Onor Zeova avek ou bann keksoz valer e avek bann premye rekolt tou ou prodwi.” Bann serviter Zeova nepli bezwen donn ladim. Plito, Pol ti ekrir kongregasyon Kretyen: “Fodre ki sakenn i donn dapre sa ki i’n deside, non pa avek regre ou par lobligasyon, parski Bondye i kontan sa ki donn avek lazwa.” (2 Korentyen 9:7) Fer kontribisyon volonter pour siport sa travay predikasyon Rwayonm ki pe ganny fer dan lemonn antye i osi demontre nou rekonesans. Lapresyasyon profon i motiv nou pour fer sa regilyerman, par met en keksoz dekote tou le semenn si i posib, parey bann premye Kretyen.—1 Korentyen 16:1, 2.
18 Se pa lakantite ki nou kontribye ki montre nou rekonesans anver Zeova. Plito se sa leta lespri ki nou donn avek. Se sa ki Zezi ti obzerve kan i ti pe get bann dimoun pe met zot don dan trezor tanp. Kan Zezi ti vwar en vev ki ti dan bezwen met “de pti larzan kwiv,” i ti dir: “An verite, mon dir zot, ki sa pov vev in met plis ki tou lezot. Akoz lezot in donn lo sa ki zot ti annan anplis, me sa vev, dan son povrete, in donn tou sa ki i ti annan pour li viv.”—Lik 21:1-4.
19. Akoz i byen pour nou reegzamin fason ki nou montre nou rekonesans?
19 Fotespere ki sa letid lo konman nou kapab montre nou lapresyasyon i motiv nou pour reegzamin fason ki nou montre nou rekonesans. Eski petet nou kapab fer plis sakrifis pour rann glwar Zeova e pour siport sa travay mondyal lo plan materyel? Si nou fer sa, nou annan lasirans ki nou Papa zenere, Zeova, pou byen kontan akoz nou montre nou rekonesan.
Eski ou rapel?
• Akoz nou devret rekonesan anver Zeova?
• Ki leson nou aprann atraver ladim, kontribisyon volonter, ek laranzman pour pran swen avek bann ki dan bezwen?
• Ki mannyer nou devlop en lespri pionye?
• Konman nou kapab servi nou bann “keksoz valer” pour remersye Zeova?
[Kestyon]
[Portre lo paz 28]
“Tou don ekselan, tou kado parfe i sorti lao”
[Portre lo paz 31]
Ki bann sakrifis nou kapab fer?