Labib i montre ki parfwa, bann lanz in menm protez bann serviter Bondye pour ede akonplir son lavolonte. (Psonm 34:7) Par egzanp:

• Avan ki Zeova ti detri lavil Sodonm ek Gomor, bann lanz ti ed Lot ki ti en zonm drwat ek son fanmir pour sove.​—Zenez 19:1, 15-26.

• Letan trwa zenn Ebre ti ganny zete dan en four dife dan ansyen lavil Babilonn, Bondye ti “anvoy son lanz pour sov son bann serviter.”​—Danyel 3:19-28.

• Apre ki i ti’n pas en lannwit dan kavern kot ti annan bann lyon lafen, Danyel, en zonm drwat, ti dir ki bann lyon pa ti’n manz li akoz “Bondye in anvoy son lanz pour ferm lagel bann lyon.”​—Danyel 6:16, 22.

Dan premye syek, bann lanz ti parfwa entervenir dan aktivite kongregasyon Kretyen pour ede akonplir lavolonte Zeova. Par egzanp:

• En lanz ti ouver baro prizon e donn lord bann zapot ki ti’n ganny anprizonnen pour al dan tanp e kontinyen koz avek dimoun lo lavi eternel.​—Akt 5:17-21.

• En lanz ti demann Filip ki ti en predikater, pour al dan sa semen ki dan dezer ki sorti Zerizalenm pour al Gaza. Sa lanz ti demann li pour pres avek en zonm Etyopyen ki ti’n sorti ador Bondye, Zerizalenm.​—Akt 8:26-33.

• Letan i ti’n ariv ler pour Bondye permet bann dimoun lezot nasyon vin bann Kretyen, en lanz ti aparet avek Korney ki ti en zofisye dan larme Romen dan en vizyon. I ti demann li pour al sers zapot Pyer e pour anmenn li kot li.​—Akt 10:3-5.

• Ler zapot Pyer ti ganny anprizonnen, en lanz ti aparet avek li e tir li dan prizon.​—Akt 12:1-11.

Dan nou letan, napa okenn levidans ki montre ki Bondye pe servi bann lanz pour ed dimoun dan en fason ekstraordiner, parey in ganny ekrir dan Labib. Par kont, konsernan nou letan Zezi ti dir: “Sa bon nouvel Rwayonm pou ganny anonse partou lo later pour donn en temwannyaz avek tou nasyon e apre sa, lafen pou arive.” (Matye 24:14) Eski ou ti konnen ki bann disip Kris pe fer sa travay avek led bann lanz?

Liv Revelasyon i montre ki bann lanz ti pou travay dir pour ed dimoun lo later antye pour aprann konn Zeova ek son plan pour limanite. Zapot Zan ti ekri: “Mon ti vwar en lot lanz pe anvole anler dan lesyel e i ti annan en bon nouvel eternel pour anonse avek tou bann ki reste lo later, avek tou nasyon, tribi, langaz ek pep. I ti pe dir byen for: ‘Annan en gran respe pour Bondye e rann li glwar, parski zour son zizman in arive, alor ador sa Enn ki’n fer later, lanmer ek tou bann sours delo.’” (Revelasyon 14:6, 7) I annan bokou leksperyans dan nou letan ki montre ki bann lanz pe ede dan sa travay predikasyon ki pe ganny fer partou dan lemonn. Anfet, menm ler zis en dimoun ki annan en move lavi i repantir e retourn kot Zeova “bann lanz Bondye osi i dan lazwa.”​—Lik 15:10.

Ki pou arive ler sa travay predikasyon pou ganny konplete? Sa letan, bann lanz ki form sa “larme dan lesyel,” pou siport Zezi Kri Lerwa bann lerwa dan “sa lager sa gran zour Bondye Tou Pwisan” ki apel Armagedon. (Revelasyon 16:14-16; 19:14-16) Bann lanz pwisan pou egzekit zizman Zeova anmezir ki Senyer Zezi i “anmenn vanzans lo sa bann ki . . . pa obei sa bon nouvel konsernan nou Senyer Zezi.”​—2 Tesalonisyen 1:7, 8.

Alor, ou kapab asire ki bann lanz i enterese avek ou personnelman. Zot vreman enterese avek byennet bann dimoun ki anvi servi Bondye e Zeova in plizyer fwa servi son lanz pour protez e ankouraz son serviter fidel lo later.​—Ebre 1:14.

Alor, nou tou nou annan en swa pour fer. Eski nou pou ekout e obeir sa bon nouvel ki pe ganny anonse partou lo later? Temwen Zeova dan ou rezyon ti pou kontan ed ou pour benefisye avek led ki bann lanz i donnen.