Bondye Zeova i envit nou pour koz avek li lo nenport keksoz ki pe fatig nou. (Psonm 55:22) Napa problenm ki tro gro oubyen tro pti pour priy lo la. Si i enportan pour nou, i osi enportan pour Zeova. Sa i akoz Zeova i enterese avek nou e i konpran nou santiman. En fason enportan pour ganny lape lespri i ler nou priy Zeova.​—Filipyen 4:6, 7.

Ler nou pe lite avek nou problenm mantal, nou kapab santi nou konpletman tousel. Lezot dimoun pa toultan konpran ki problenm nou pe pas ladan. (Proverb 14:10) Me ler nou senserman priy Zeova e dir li ki mannyer nou santi, i pou touzour ekout nou e konpran nou. Zeova i vwar nou, i konn nou bann douler ek soufrans e i anvi ki nou koz avek li lo nenport kwa ki pe fatig nou.​—2 Kronik 6:29, 30.

Ler nou koz avek Zeova dan lapriyer, sa i ranforsi nou konfyans ki i enterese avek nou. Nou kapab santi parey sa psalmis ki ti priye: “Ou’n vwar mon problenm. Ou konnen ki mon soufer en kantite.” (Psonm 31:7). Lefet ki nou konnen ki Zeova i vwar sa ki nou pe pas atraver, sa i ed nou pour kontinyen fer fas avek nou bann difikilte. Me Zeova i fer plis ki zis vwar nou bann problenm. I konpran pli byen sa ki nou pe pas ladan plis ki okenn lezot dimoun e i ed nou trouv rekonfor ek lankourazman ki dan Labib.