KI PE arive la? Bann dimoun pe fete. Lerwa Babilonn in envit en kantite dimoun enportan. Zot pe servi bann lakoup annor e an larzan ek bann bol ki zot ti pran dan Tanp Zeova an Zerizalenm. Me, toudenkou, lanmen en zonm ti aparet dan ler e i ti konmans ekrir lo miray. Tou dimoun ti per.

Sa letan Belsatsar, pti zanfan Neboukadnetsar, ki ti lerwa. I ti kriye pour fer anmenn son bann zonm malen. ‘Okenn dimoun ki kapab lir sa bann lekritir e dir mwan ki zot oule dir,’ lerwa ti dir, ‘mon pou donn li en kantite kado e i pou vin trwazyenm dirizan pli enportan dan rwayonm.’ Me ti napa enn son bann zonm malen ki ti kapab lir sa bann lekritir lo miray, ni menm dir ki zot vedir.

Manman lerwa ti antann sa bann tapaz e i ti antre dan sa gran lasal kot ti annan lafet. ‘Silvouple pa bezwen per,’ i ti dir avek lerwa. ‘I annan en zonm dan ou rwayonm ki konn bann bondye sen. Kan ou granpapa Neboukadnetsar ti lerwa i ti fer li ansarz tou son bann zonm malen. I apel Danyel. Anvoy sers li, e i pou dir ou ki sa bann lekritir i vedir.’

Toudswit Danyel ti ganny anmennen kot lerwa. Apre ki i ti’n refize pran okenn kado, Danyel ti konmans eksplike akoz ki Zeova ti retir granpapa Belsatsar, Neboukadnetsar konman lerwa. ‘I ti vantar,’ Danyel ti dir. ‘E Zeova ti pini li.’

‘Me ou,’ Danyel ti kontinyen, ‘ou konn tou sa ki’n arive avek ou granpapa Neboukadnetsar, me ou’n kontinyen fer vantar parey li. Ou’n anmenn bann lakoup ek bann bol ki ti dan tanp Zeova e ou’n bwar ladan. Ou’n onor bann bondye ki’n ganny fer avek dibwa ek ros, e ou pa’n onor nou Gran Kreater. Se pour sa rezon ki Bondye in anvoy sa lanmen ekrir sa bann parol.’

‘Se sa ki’n ganny ekrir,’ Danyel ti dir: ‘MENE, MENE, TEKEL ek PARSIN.’

‘MENE i vedir ki Bondye in kont bann zour ou rwayonm e i pe anmenn li ver en lafen. TEKEL i vedir ki ou’n ganny peze lo en balans e ou pa’n ganny trouve bon. PARSIN i vedir ki ou rwayonm in ganny donnen avek bann Med ek bann Pers.’

Letan ki Danyel ti pe koze, bann Med ek bann Pers ti’n konmans atak Babilonn. Zot ti atak sa lavil e touy Belsatsar. Sa bann lekritir lo miray ti vin vre sa zour swar! Me ki ti pou arive avek bann Izraelit aprezan? Plitar nou pou vwar, me pour konmanse annou vwar ki ti arive avek Danyel.