“Lon fansoun mwün ekewe king, ewe Koten läng epwe aüetä eu mwü esap tongeni tala, esap pwal wor eu mwü epwe tongeni akufu. Iwe, ei mwü epwe ataela o arosala ekewe lusun mwü, nge epwe püsin nom tori feilfeilachök.”​—Taniel 2:44.

Án Kot we Mwú ina eú nemenem mi nóm láng. Jesus Kraist, i ewe Sounemenem mi kefilitá epwe siwili meinisin án aramas nemenem me epwe apwénúetá letipen Kot esap chék lón láng nge pwal wóón ei fénúfan. (Mateus 6:9, 10) Ese wor mwúún aramas epwe tongeni akkufu Mwúún Kot pokiten ena “Mwü esemüch än ach Samol me Chon Amanau Jesus Kraist.” A anúkúnúkú kinamwe tori feilfeiló.​—2 Petrus 1:11.

“Satan a püsin siwili lapalapan usun itä nge i eman chon längin saram! Iei mine sisap mairü ren are nöün Satan chon angang ra siwili lapalaper pwe repwe usun itä nge ir chon angangen ewe Kot mi pwüng. Iwe, sopolan manauer repwe chök küna liwinin ar föför.”​—2 Korint 11:14, 15.

Epwe pwáló pwe lamalam chofona ina angangen ewe Tefil me epwe rosoló seni ei fénúfan. Epwe móróló meinisin án lamalam lifilifil aramas me angangen nieló aramas. Epwe suuk ngeni meinisin mi tongei ewe “Kot mi manau o mi enlet” ar repwe fel ngeni i lón “eu chök lükülük,” “enlet” me án Kot we manaman mi fel. A ifa me watteen ewe kinamwe me tipeeú!​—1 Tesalonika 1:9, TF; Efisos 4:5; Johannes 4:23, TF.

“Püsin Kot epwe etiir pwe epwe ar Kot. Epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.”​—Pwärätä 21:3, 4.

Jiowa Kot epwe apwénúetá ena me ren Néún we, Jesus, ewe mi fangóló manawan fán iten aramas meinisin. (Johannes 3:16) Fán emmwenien Jesus,  aramas repwe unuséchúló. Esap chúen wor riáfféú pwe “püsin Kot epwe etiir pwe epwe ar Kot” me télúpwasei “chönün mas seni won meser meinisin.” Án aramas apwangapwangen tipis me riáfféú repwe móróló, “ekewe chon pwüng repwe fanüeni ewe fanü o nonom won tori feilfeilachök.”​—Kölfel 37:29.

“[Jesus Kraist] a turufi ewe trakon, ewe serepenitin lom, iei i ewe Tefil ika Satan, a föti pwe epwe föfö lon ükükün engeröü ier. Iwe, ewe chon läng a aturalong i lon ewe pwang mi alolol, a lokeela o pwauni, pwe esap chüen tongeni tufichin atupu chon ekewe mwü.”​—Pwärätä 20:2, 3.

Meinisin etipetipaen Satan repwe móróló atun i me ekkewe chónláng mi ngaw repwe féfé me kóturulong lón ewe “pwang mi alolol” weween resap chúen mwékútúkút. Resap chúen tongeni nemenemengawei aramas. A ifa me watteen ngaselóóch atun sipwe nónnóm wóón eú fénúfan esap wor etipetipaen Satan wóón me ekkewe chónláng mi ngaw!

“Ekewe ränin lesopolan” repwele muchúló lón ewe atun Jesus a eita ngeni “riaffou lapalap.” A erá: “Pun lon ewe fansoun epwe fis riaffou lapalap, usun chok esaamo fis seni le poputan fonufan tori ikenai, o esap pwal usun chok mwirin.”​—Mateus 24:21, TF.

Epwe lapalap ewe riáfféú pokiten epwe fis chómmóng feiengaw mi kon ssenúk esaamwo fis seni le poputáán fénúfan. Ena riáfféú mi lapalap, epwe muchúló lón ewe rán mi iteni “Armaketon,” ewe “maun lon ewe rän mi lap än Kot ewe mi Unusen Manaman.”​—Pwärätä 16:14, 16.

Aramas ekis meinisin mi tongei minne mi pwúng, repwe mwétéresiti sópwólóón ei ótót mi ngaw. Nengeni mwo ekkóch feiéch mi souni chókkewe mi nóm fán án Kot we Mwú.

“Eu mwich mi fokun chocho” repwe manawelóng lón ewe fénúfan sefé mi kinamwe: Án Kot we Kapas a erá pwe eú “mwich mi fokun chocho” ese lea, repwe “towu seni riaföü mi lapalap” me manawelóng lón ewe fénúfan sefé. (Pwärätä 7:9, 10, 14; 2 Petrus 3:13) Repwe kilisou ngeni ar we chón amanaw Jesus Kraist, “ewe Lamen Kot a uweela tipisin chon fanüfan.”​—Johannes 1:29.

Feiéch mi lap epwe feito seni ewe asukul seni Kot: Lón ewe fénúfan sefé, “än chon fanüfan silei ewe Samol mi Lapalap epwe alolol.” (Aisea 11:9) Lón ena asukul me ren Kot, epwe kapachelong kapasen emmwen ren ifa usun sipwe kinamwefengen me aramas meinisin me túmúnú masouen fénúfan. Kot a pwonei: “Ngang ewe Samol mi Lapalap om we Kot. Üa aiti ngonuk mine kopwe feiöch ren, üa pwal emweni ngonuk ewe al kopwe fetal won.”​—Aisea 48:17.

Attongeach kewe mi máló repwe towu seni peias: Atun Jesus a nónnóm wóón fénúfan, a amanawatá chienan we Lasarus seni máló. (Johannes 11:1, 5, 38-44) Ina minne, a ánneta minne epwe féri fán kókkótun án Kot we Mwú lón napanap epwe kon lap seni.​—Johannes 5:28, 29.

Kinamwe me pwúng repwe nóm tori feilfeiló: Fán án Kraist nemenem, esap chúen wor atai allúk. Pwata sia silei ena? Pokiten Jesus a tongeni silei masouen letipen aramas iwe, epwe áeá an na tufich atun epwe apwúngú ekkewe mi pwúng me ekkewe mi ngaw. Chókkewe rese mochen siwili féfférúr mi ngaw rese tongeni nónnóm lón án Kot we fénúfan sefé.​—Kölfel 37:9, 10; Aisea 11:3, 4; 65:20; Mateus 9:4.

Sia fen pwóróusfengen wóón ekkóch me lein án Paipel kewe oesini mi chómmóng mi weneiti ewe fansoun mi amwarar epwele war. Atun án Kot we mwú epwe anganga an nemenem wóón unusen fénúfan, eú “kinamwe mi somwola” epwe nóm tori feilfeiló. (Kölfel 37:11, 29) Repwe móróló mettóch meinisin mi efisi án aramas metek me weires. Sia núkúnúk wóón ena pokiten án Kot we kapas a pwisin erá: “Nengeni, üpwe asöfösefäli mettoch meinisin. . . . Kopwe makkeetiu ekei kapas, pun ra let o allükülük.”​—Pwärätä 21:5.