“Ngang üa ekieki pwe mettoch meinisin ra fokun aücheangau fän iten ewe eu mi fokun aüchea seni meinisin, iei ai silei Kraist Jesus ai Samol.”​—Fil. 3:8.

1, 2. Ifa ewe kefil ekkoch chon Kraist ra filatä me pwata?

 ROBERT a fokkun tipatchem me lein chienan kewe chon sukul seni chök me le kükkünün. Lupwen a walu ierin, emön me lein nöün kewe sense a pwisin feilo ren lon imwan me ereni pwe a tongeni föri met chök a mochen pun i mi tipatchem. A aneänei pwe eü rän Robert epwe wiliti emön tokter. Robert a fokkun angangöch me tipatchem lon high school, iwe a atufichi pwe epwe tongeni fiti eü me lein ekkewe sukul tekia mi iteföülo lon fönüan we, ewe mettoch chommong aramas ra ekieki pwe mi kkolo aüchean, neman esap pwal fissefäl lon manauen emön. Nge Robert a tunalo ekiekin aramas usun sukul tekia pun a filatä an epwe regular pioneer.

² Chommong chon Kraist, kükkün me watte, ra usun chök Robert pun a suuk ngeniir ar repwe feffeitä me iteföülo lon ei otot. Nge ekkoch ra filatä ar resap äeä ewe tufich mi suuk ngeniir lon ei fönüfan pwe repwe akkomwa ar angang ngeni Kot. (1 Kor. 7:29-31) Met a amwökütü chon Kraist usun chök Robert le angang weires lon ewe angangen afalafal? Ewe äkkäeüin mettoch a amwökütüür ar tong ngeni Jiowa, nge esap chök ina pwe ra pwal alamota ewe asukul me ren Jiowa mi fokkun aüchea seni meinisin. Ka kan ekieki lon ekkeei rän ika epwe fet manauom iei ika kese silei ewe enlet? Ika sia ekilonei ekkoch me lein ekkewe feiöch watte sia fen küna pun sia käit me ren Jiowa, epwe älisikich ach sipwe akkaücheani ewe kapas allim me tinikken le äiti ngeni ekkoch.

Iei Eü Feiöch Ach Sipwe Käit me ren Kot

3. Pwata sia tongeni lükülük pwe Jiowa a tipemecheresin asukula aramas inaamwo ika rese unusöch?

³ Lon an kirekiröch, Jiowa a tipemecheres le asukula aramas inaamwo ika rese unusöch. Lon Aisea 54:13 a oesini usun ekkewe chon Kraist mi kepit: “Iwe, noum kewe mwän meinisin repwe kaiö seniei, üpwe awöüür o fang ngeniir kinamwe.” Ekkeei kapas ra pwal weneiti nöün Jises kewe “ekkoch siip.” (Jon 10:16, TF) A ffat ena pworaus ren pwal än Aisea ei eü oesini mi pwöppwönüetä lon ach ei fansoun. A küna eü längipwi pwe aramas seni fönü meinisin ra mwicheto ngeni ewe fel mi enlet. A äweweei pwe ra kapasfengen lefiler: “Ousipwe feitä won chukun ewe Samol mi Lapalap ren imwenfelin än Israel we Kot. I epwe aiti ngenikich mine a mochen sipwe föri, pwe sipwe tongeni apwönüetä an kewe kapas.” (Ais. 2:1-3) A ifa me feiöchüch pwe Jiowa a asukulakich!

4. Met Jiowa a kütta seni iir kewe ra käit me ren?

⁴ Met mi lamot sipwe föri pwe sipwe angei ewe käit me ren Kot? Äkkäeüin mi lamot sipwe emön aramas mi tipetekison me tipemecheres. Iei alon Tafit, ewe sou makken köl: “Ewe Samol mi Lapalap a pwüng o kirikiröch. . . . A emweni chon tipetekison lon mine a pwüng o aiti ngeniir letipan.” (Kölf. 25:8, 9) Pwal iei alon Jises: “Ua kilisou ngonuk, Semei, Samolun lang me fonufan, pwe ka amonalo ekkeei mettoch seni chon tipatchem me chon wewe, nge ka pwarirelo ngeni monukol.” (Luk 10:21, TF) Ka meefi om pacheöch ngeni ewe Kot “a ümöümöch ngeni chon tipetekison kana”?​—1 Pit. 5:5.

5. Ifa ewe popun sia tufichin silei Kot?

 ⁵ Kich chon angang ngeni Jiowa, sia tongeni apasa pwe sia küna ewe enlet ren pwisin ach tufich me tipatchem? Aapwi, sise tongeni silei Kot ren pwisin ach tufich. Jises a apasa: “Esap wor eman a tongeni feito rei are ewe Sam mi tinieito esap panato rei.” (Jon 6:44) Ren ewe angangen afalafal me ewe ngün mi fel, Jiowa a panato emön me emön mi usun chök siip, iir ‘wöün [mwuun fanüfan] meinisin.’ (Akai 2:7) Kese pwal pwapwa pwe en emön me lein chokkewe Jiowa a emmwenato ren Nöün we?​—Älleani Jeremaia 9:23, 24.

Käit me ren Kot a Amürinnölo Manauen Aramas

6. Met sokkun mettoch mi amwarar epwe fis ngeni aramas pokiten ar “silei ewe Samol mi Lapalap”?

⁶ Än Aisea oesini a älisikich ach sipwe anchangei usun ekkesiwilin napanapen aramas mi fiffis lon ach ei fansoun. Aramas mi mwänesol me loom ra fen wiliti chon efisatä kinamwe. (Älleani Aisea 11:6-9.) Chokkewe ra koputfengen lefiler me loom pokiten sokkofesenin fönüer, einanger me tettelin aramas are sokkofesenin nonnomun manauer, iei ra nom fengen fän tipeeü. Usun itä ra “amani nöür ketilas o awili ngeni pisekin tuw pwül.” (Ais. 2:4) Met popun a fis ekkeei sokkun ekkesiwil mi amwarar? Pokiten aramas ra käeö ewe ‘sile’ usun Jiowa me apwönüetä lon manauer. Inaamwo ika nöün Kot kewe chon angang rese unusöch nge ra usun eü mwichen pwipwi mi enletin tipeeüfengen woon unusen fönüfan. Ewe kapas allim a tongeni apwapwaai aramas meinisin me amürinnölo manauer, ei mettoch a pwäralo pwe ewe asukul mi fel a fokkun aüchea seni meinisin.​—Mt. 11:19.

7, 8. (a) Ikkefa ekkoch me lein ekkewe “leeni mi pochokkul” ewe asukul mi fel a älisi aramas le ataielo? (b) Met a pwäratä pwe ewe asukul mi fel a elingalo Jiowa?

⁷ Ewe aposel Paul a apasa pwe ewe angangen afalafal a usun chök ach fiti eü angangen maun. Iei makkeian: “Pun pisekin ach maun esap minen fonufan, nge mi wor ar manamanen Kot pwe repwe atailo ekkewe leeni mi pochokkul. Sia atailo ekkewe anini o ekkewe mi lamalam tekia meinisin mi polueni sineilapen Kot.” (2 Kor. 10:4, 5, TF) Ikkefa ekkoch me lein ekkena “leeni mi pochokkul” ewe asukul mi fel a angasalo aramas seni? Ikkeei ekkoch me leir, afalafal chofona mi chouni aramas, lükü esor longolongun me tipatchemen fönüfan. (Kol. 2:8) Asukul mi fel a älisi ekkewe aramas ar repwe pöütalo föfför mi ngaw me ämääraatä ekkewe napanap mi apwapwaai Kot. (1 Kor. 6:9-11) A amürinnölo manauen famili me a alükülükü chokkewe esor ar äpilükülük. Iei ewe sokkun käit mi lamot ngenikich ikenäi.

⁸ Wenechar, ina eü lapalap Jiowa a älisi aramas le ämääraatä. (Ipru 13:18) Usun chök pworausen ei fin India, a etiwa eü käeöön Paipel, iwe mwirin a wiliti emön chon afalafal esaamwo papatais. Eü rän lupwen a liwin seni an älillis ren ewe angangen kaü imwen mwich, a küna me  woon ewe pwül efoch kolt minen elingen inis ünükün ewe leenien sousou bus, mömön walipükü chala. Inaamwo ika ei fefin mi osupwang nge a walo ewe mettoch a küna lon ewe polis station. Ewe polis a fokkun mäirü! Mwirin pwal emön polis a eisini: “Pwata kese chök nöüni ewe kolt?” A pölüweni: “Äitien Paipel a siwili manauei, ina popun iei üa emön aramas mi wenechar.” Ewe polis a fokkun ingeiti ewe fefin me iei alon ngeni ewe elter mi fiti le lo lon ewe polis station: “A wor 38 million aramas lon ei fönü. Ika ka älisi engol me leir ar repwe usun chök ei fefin, ina eü älillis mi watte sopwöchün.” Ren ach ekieki ekkewe fitu million aramas ra fen amürinnölo manauer ren ewe asukul mi fel, a wor chommong popun ach sipwe mwareiti Jiowa.

9. Met a atufichi aramas ar repwe föri watteen siwil lon manauer?

⁹ Manamanen än Kot Kapas fitifengen me ewe älillis Jiowa a awora ren an we ngün mi fel a atufichi aramas le föri eü watteen siwil lon manauer. (Rom 12:2; Kal. 5:22, 23) Kolose 3:10 a apasa: “Oua pwilitalong ewe manau mi fö. Iei ewe aramas mi fö Kot a förätä, epwe pwal akasöfösefäli lon püsin lapalapan, pwe ämi silei Kot epwe unusöch.” Ewe Kapasen Kot a wor manamanan le pwäralo met mi wesewesen nom lon letipen emön me a tongeni siwili an ekiek, pwal mwo nge meefian kewe woon sokkopaten mettoch. (Älleani Ipru 4:12.) Ren än emön käeö ewe enlet lon ewe Paipel me etipeeüfengeni manauan ngeni än Jiowa kapasen emmwen mi pwüng, a tongeni wiliti emön chiechien Kot me eäni ewe äpilükülükün manau esemuch.

Jiowa a Ammolnakichetä fän iten Mwachkkan

10. (a) Pwata Jiowa chök ewe epwe ammolnakichetä ngeni mwachkkan? (b) Ekiselo chök, ikkefa ekkewe siwil mi amwarar repwe fis ngeni unusen fönüfan?

¹⁰ Jiowa epwe tongeni älisikich le mmolnetä ngeni lon ekkan rän epwe feito pokiten i chök a silei met epwe fis lon mwach. A akkota met epwe fis ngeni chon fönüfan meinisin lon mwachkkan. (Ais. 46:9, 10) Eü oesini seni Paipel a pwäratä pwe “ränin ewe Samol mi Lapalap a arapoto.” (Sef. 1:14) Än Salomon Fos 11:4 a kapas usun ena rän me met epwe pwönüetä: “Än eman aramas wöümong esap alisi lon ewe ränin apwüng, nge pwüng a angasala eman seni mäla.” Lupwen än Jiowa ränin kapwüng epwe war me ataielo än Setan otot, ach üöch mwen mesen Jiowa ina chök ewe mi lamot lon ena atun. Esap chüen wor lamoten moni. Ren enletin,  Isikiel 7:19 a apasa: “Repwe moneela ar silifer me kolt won ekewe al, usun mettoch mi limengau.” Ren ach silei ekkeei mettoch me mwen ar repwe fis, epwe älisikich ach sipwe filiöch iei.

11. Ifa ewe eü mettoch ewe asukul mi fel a älisikich le mmolnetä ngeni lon mwachkkan?

¹¹ Ewe asukul mi fel a ammolnakichetä fän iten ränin Jiowa we, a wesewesen älisikich le akkotaöchü met mi lamot lon manauach. Iei makkeien ewe aposel Paul ngeni Timoti: “Kopwe allük ngeni ekewe mi pisekisek lon mettochun ei fanüfan pwe resap lamalamtekia. Resap pwal anomu ar apilükülük won wöür epwe morola, nge repwe apilükülükü Kot.” Inaamwo ika sise pisekisek nge sia tongeni küna feiöch seni ei kapasen emmwen seni Jiowa. Met weween ei? Ewe Paipel a pesekich pwe sisap angang weires le alapalo pisekich lon pekin aion nge sipwe achocho le “föri mine a mürina” me ‘pisekisek lon ach föför mürina.’ Ren ach akkomwa ach angang ngeni Jiowa lon manauach, sia ‘iseis fän itach och wöü epwe eu longolong mi nükünük fän iten ewe fansoun epwe feito.’ (1 Tim. 6:17-19) Ach pennüküolo mochenich a pwäratä pwe sia kefiliöch fän tipatchem, a tipeeü ngeni alon Jises ei, “Epwe met lomoten än eman aramas epwe feiöchüni feiöchün unusen fanüfan, nge manauan epwe pöüt seni?” (Mt. 16:26, 27) Pokiten a arapoto ränin Jiowa we, a lamot ngeni emön me emön leich ach sipwe pwisin eisinikich: ‘Üa iseni ia piseki mi aüchea? Ua angang ngeni Kot are wöü?’​—Mt. 6:19, 20, 24.

12. Pwata sisap fangetä inaamwo ika ekkoch rese aücheani ach angangen afalafal?

¹² Ewe äkkäeüin mettoch mi lamot me lein ekkewe “föför mürina” ewe Kapasen Kot a fen titchiki fän iten chon Kraist, ina ewe angangen afalafal usun Mwuun Kot me föralo chon käeö mi amanaua aramas. (Mt. 24:14; 28:19, 20) Usun chök met a fis lon fansoun ekkewe aposel, ekkoch aramas ikenäi resap pwal aücheani ach angang. (Älleani 1 Korint 1:18-21.) Nge ei mettoch esap akükkünalo aüchean ewe pworaus allim are ekisikisaalo lamoten ach sipwe afalafala emön me emön lon ei fansoun mi fich pwe epwe atufichiir le lükülük woon Kot. (Rom 10:13, 14) Sipwe küna chommong feiöch seni ach älisi ekkewe ekkoch le angei älillis seni ewe asukul mi fel.

Feiöchün ach Pennüküolo Met mi Nom Rech

13. Met Paul a fen pennüküolo fän iten ewe kapas allim?

¹³ Me mwen än Paul wiliti emön chon Kraist a käkkäeö me monetä ngeni an epwe sopwöch me lein chon Jus. Atun a arapakkan ngeni 13 ierin a mwöküt seni pükütään fönüan we Tarsus me feilo ngeni Jerusalem me käeö ren ewe senseen Allük mi fokkun iteföülo Kamaliel. (Fof. 22:3) Mwirin ekis fansoun, Paul a fokkun tipatchem me lein piloon kewe, nge ika a sopwelo an sukul epwe fen iteföülo lon ewe lamalamen Jus. (Kal. 1:13, 14) Nge lupwen a etiwa ewe kapas allim me föri ewe angangen afalafal a likitalo mettoch meinisin. Paul mi niamam ren met a filatä? Aapwi, ren enletin iei met meefian: “Ngang üa ekieki pwe mettoch meinisin ra fokun aücheangau fän iten ewe eu mi fokun aüchea seni meinisin, iei ai silei Kraist Jesus ai Samol. Pun fän itan üa pöütala meinisin, üa ekieki pwe meinisin ra usun chök pipi lon lenien koturula.”​—Fil. 3:8.

14, 15. Met sokkun feiöch sia küna seni ach “angangfengen” me Kot?

¹⁴ Chon Kraist ikenäi ra pwal usun chök Paul le pennüküolo met a nom rer fän iten ewe kapas allim. (Mark 10:29, 30) Nge, kich mi osupwang ren ach föri ena? Meefien Robert, ewe sia fen pworaus usun me mwan a pwal usun chök meefien chommong. Iei met a apasa: “Use fokkun niamam. Ai fiti ewe angangen pioneer a atoto rei pwapwa me kinamwe me atufichiei le ‘neni o nengeni pwe ewe Samol mi Lapalap a kirikiröch.’ Iteiten ai fangolo piseki lon pekin aion le akkomwa angangen ewe Mwu, Jiowa a chök ekkefeiöchüei lap seni met ua fen pennüküolo fän itan. Usun itä ese fen wor met ua pennüküolo pun ren chommongun feiöchüi seni Jiowa!”​—Kölf. 34:8; SalF. 10:22.

 ¹⁵ Ika ka fen fiti ewe angangen afalafal me asukula aramas ren fitu ier, ese mwääl ka fen küna me meefi ükükün mürinnöön Jiowa. Mei wor fansoun ka meefi pwe ewe ngün mi fel a fen älisuk le afalafala ewe kapas allim? Ka fen küna pwapwaan ekkoch lupwen Jiowa a suuki letiper le aüselingaöchü ewe pworaus allim? (Fof. 16:14) Ka fen meefi än Jiowa älillis le pwäkini ekkewe minen eppet pwe kopwe tongeni alapalo om fiti ewe angangen afalafal? Ka fen küna än Jiowa älillis mi atufichuk le sopwelo om angang ngeni lupwen ka nom lon riäfföü me meefi pwe a kisikisilo om pöchökkül? (Fil. 4:13) Ika sia pwisin küna än Jiowa älillis lon ach angangen afalafal, sia meefi pwe Jiowa wesewesen emön me rech me a lapolo ach pacheöch ngeni. (Ais. 41:10) Iei eü feiöch ach sipwe wiliti emön me lein ekkewe chon angang mi “angangfengen” me Kot lon ewe angangen asukul mi kkolo aüchean.​—1 Kor. 3:9.

16. Met meefiom ren om angang weires me pennüküolo ekkewe mettoch pokiten ewe angangen asukula aramas usun Kot?

¹⁶ Chommong aramas ra äneänei pwe lon ränin manauer repwe tongeni föri och mettoch mi amwarar me lamot. Nge sia fen küna pwe pwal mwo nge ekkewe angang mi amwarar chon fönüfan ra föri ra mwittir mönükülo. Iwe nge, ewe angang Jiowa a föfföri lon ei fansoun mi riri ngeni piniloon itan we, epwe fokkun makketiw lon uruwoon nöün kewe aramas. Repwe chechchemeni ekkeei angang tori feilfeilo. (SalF. 10:7; Ipru 6:10) Amwo itä sipwe aücheani wisach le asukula aramas usun Jiowa, pun iei ewe angang esap fokkun mönükülo.

Ifa Usun Kopwe Pölüweni?

• Met Jiowa a kütta seni iir kewe mi käit me ren?

• Ifa usun ewe asukul mi fel a amürinnönoi manauen aramas?

• Ifa usun sia küna chommong feiöch seni ach älisi ekkewe ekkoch le angei älillis seni ewe asukul mi fel?

[Ekkewe Kapas Eis fan Iten ewe Lesen]

[Sasing lon pekin taropwe 25]

Chokkewe mi käit me ren Jiowa ra usun eü mwichen pwipwi mi enletin tipeeüfengen woon unusen fönüfan

[Sasing lon pekin taropwe 26]

Esap iei eü feiöch ach sipwe wiliti emön me lein ekkewe chon angang mi “angangfengen” me Kot?