Iei met ena wokisin a erá: “Kosap weitifengeniik, lupwen ka küna lon eu fanü pwe ra ariaföüü chon wöüngau, ra pwal amoela pwüng fän pöchökül. Pun eman nöüwis a nom fän nemenemen eman nöüwis mi tekia seni, nge a pwal wor nöüwis mi tekia seniir meinisin.”​—SalAf. 5:8.

Ika sise ekiekiéchú met Jiowa a ekieki usun ena, iwe sipwe ekieki pwe ena wokisin usun itá a chék áweweei chókkewe mi wor wiser lón mwúún aramas. Nge ika sia ekiekiéchú, a pwal fós usun eú pwóróus mi enlet usun Jiowa, me ach silei ena epwe oururukich me ekinamwekich.

Än Salomon Afalafal 5:8, a áweweei usun emén sounemenem mi eriáfféwú chón wéúngaw me eáni féfférún pwúngúngaw ngeniir. Mi lamot án ena sounemenem epwe chemeni pwe a nóm fán nemenien emén néúwis mi tekia seni lón ewe mwú. Me eli a pwal wor ekkóch iir mi fen pwal fókkun tekia seni lón an nemenem. Nge a alólilen pwe lón mwúún aramas, meinisin ekkena sounemenem eli ra nemenemengaw me aramas ra riáfféú pokiten ena.

Inaamwo ika usun itá esap pwák ekkena mettóch, nge a ekinamwekich ach silei pwe Jiowa a nennengeni are ‘nemeni eman nöüwis mi tekia’ lón mwúún aramas. Sia tongeni kútta álillis seni Kot me maneetá wóón ach kewe aúrek. (Kölf. 55:22; Fil. 4:6, 7) Sia silei pwe “ewe Samol mi Lapalap a nenengeni unusen fanüfan, pwe epwe apöchöküla chokewe mi fang ngeni unusen letiper.”​—2 Kron. 16:9.

Iwe, Än Salomon Afalafal 5:8 a áchema ngenikich nónnómun ei ótót sia manaw lón me a pwal áchema ngenikich pwe a kan wor ié kewe mi tekia ar nemenem wóón emén me emén sounemenem. Nge lap seni meinisin, ei wokisin a áchema ngenikich pwe Jiowa i ewe mi kon tekia seni meinisin, ewe Sounemenemen unuselapen láng me fénúfan. Iei a nemenem me a néúnéú Néún we, Jesus Kraist, kingen an we Mwú. Jiowa ewe mi Unusen Manaman, a kúna unusen fénúfan me a unusen pwúng, pwal ina chék usun ren Néún we.