Usahay, ang maong pulong nagtumong sa lalaki nga gikapon. Sa kapanahonan sa Bibliya, may mga lalaking gikapon ingong silot o kay nahimong binihag o ulipon. Sa palasyo sa hari, ang sinaligang mga lalaki nga gikapon maoy mag-atiman sa mga harem, o sa mga lawak sa mga babaye. Pananglitan, ang eunuko nga si Hegai ug Saasgaz nag-alagad ingong tigbantay sa mga asawa ug puyopuyo sa Hari sa Persia nga si Ahasuero, kinsa gituohang si Xerxes I.—Ester 2:3, 14.

Pero dili tanang eunuko diha sa Bibliya ang gikapon. Sumala sa ubang eskolar, matawag sab nga eunuko ang usa ka opisyal nga nagserbisyo sa palasyo sa hari. Posibleng mao kini ang pagka-eunuko ni Ebed-melek, nga kauban ni Jeremias, ug sa wa nganling Etiopianhon nga gisangyawan ni Felipe. Dayag nga si Ebed-melek maoy opisyal nga taas ug ranggo, kay direkta siyang makaduol ni Haring Zedekias. (Jeremias 38:7, 8) Ug ang Etiopianhon nga gihisgotan maoy tresurero sa palasyo kinsa “miadto sa Jerusalem aron sa pagsimba.”—Buhat 8:27.

Dihang naghisgot sa umaabot nga paghukom, si Jesus miingon: “Inig-abot sa Anak sa tawo diha sa iyang himaya, . . . iyang pagalainon ang katawhan gikan sa usag usa, ingon sa usa ka magbalantay nga magalain sa mga karnero gikan sa mga kanding.” (Mateo 25:31, 32) Nganong dili tiponon sa mga magbalantay kini nga mga hayop?

Sa maadlaw, ang mga karnero ug kanding sagad pasibsibon nga magkauban. Sa magabii, isilong sila sa pasungan aron maprotektahan gikan sa bangis nga mga hayop, mga kawatan, ug sa katugnaw. (Genesis 30:32, 33; 31:38-40) Kining duha ka matang sa hayop ibutang sa lainlaing silonganan aron mapanalipdan ang lumo nga mga karnero, ilabina ang baye ug nating karnero, gikan sa mas isog nga mga kanding. Ilain sab sa magbalantay ang mga karnero gikan sa mga kanding dihang kini “pasanayon, gatasan, ug tupihan,” matod sa librong All Things in the Bible. Busa ang ilustrasyon ni Jesus gibase sa mga buluhaton nga pamilyar ang mga mamiminaw diha sa palibot nga daghag sibsibanan sama sa karaang Israel.