Pagkat-on Gikan sa Pulong sa Diyos

Sa Unsang Paagi ang mga Balaod sa Diyos Makabenepisyo Kanato?

Kini nga artikulo nagpatunghag mga pangutana nga lagmit imong gisukna ug nagpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Nganong angayng sugton ang Diyos?

Makataronganon lang nga sugton ang Diyos kay siya ang naglalang kanato. Bisan si Jesus kanunayng nagsugot sa Diyos. (Juan 6:38; Pinadayag 4:11) Ang mga balaod sa Diyos naghatag kanatog kahigayonan sa pagpamatuod sa atong gugma kaniya.​—⁠Basaha ang 1 Juan 5:⁠3.

Ang tanang balaod ni Jehova nga Diyos maoy alang sa atong kaayohan. Kini nagtudlo kanato sa labing maayong paagi sa pagkinabuhi karon ug nagpakita kon sa unsang paagi kita makabatog dumalayong ganti sa umaabot.​—⁠Basaha ang Salmo 19:​7, 11; Isaias 48:​17, 18.

2. Sa unsang paagi ang mga balaod sa Diyos makabenepisyo sa atong panglawas?

Ang balaod sa Diyos batok sa paghuboghubog manalipod kanato sa makamatayng mga sakit ug mga aksidente. Ang sobrang pag-inom makapagiyan ug motultol sa binuang nga binuhatan. (Proverbio 23:​20, 29, 30) Si Jehova nagtugot kanato sa pag-inom ug alkoholikong ilimnon apan sa kasarangan lamang.​—⁠Basaha ang Salmo 104:15; 1 Corinto 6:⁠10.

Nagpasidaan usab si Jehova batok sa kasina, sobrang kasuko, ug ubang makadaot nga tinamdan. Kon atong sundon ang iyang tambag, makabenepisyo ang atong panglawas.​—⁠Basaha ang Proverbio 14:30; 22:​24, 25.

3. Sa unsang paagi ang balaod sa Diyos manalipod kanato?

Ang balaod sa Diyos nagdili sa pagpakigsekso gawas sa kaminyoon. (Hebreohanon 13:⁠4) Ang mga magtiayon nga nagsunod niini mobatig kasegurohan ug makapatunghag mas maayong kahimtang alang sa ilang mga anak. Sa laing bahin, ang pagpakigsekso gawas sa kaminyoon sagad moresulta sa sakit, diborsiyo, kapintasan, kadaot sa emosyon, ug usay-ginikanan nga pamilya.​—⁠Basaha ang Proverbio 5:​1-9.

Kon atong likayan ang mga situwasyon nga motental kanato sa pagpakigsekso gawas sa kaminyoon, atong mapanalipdan ang atong pakighigala sa Diyos. Malikayan usab nato nga masakitan ang uban.​—⁠Basaha ang 1 Tesalonica 4:​3-6.

  4. Sa unsang paagi ang pagtahod sa kinabuhi makabenepisyo kanato?

Ang mga tawo nga nagtahod sa gasa sa Diyos nga kinabuhi makabatog kaayohan sa panglawas kon hunongon nila ang pagpanigarilyo ug ang uban pang bisyo. (2 Corinto 7:⁠1) Gipabilhan sa Diyos bisan ang kinabuhi sa bata nga anaa pa sa tagoangkan. (Exodo 21:​22, 23) Busa dili gayod nato tuyoon pagpatay ang wala pa matawo nga bata. Lain pa, kadtong nagpabili sa panglantaw sa Diyos bahin sa kinabuhi mohimog mga lakang aron mahimong luwas diha sa trabahoan, balay, ug sa sakyanan. (Deuteronomio 22:⁠8) Dugang pa, dili nila ipameligro ang ilang kinabuhi tungod sa esport, kay ang kinabuhi maoy gasa gikan sa Diyos.​—⁠Basaha ang Salmo 36:⁠9.

5. Sa unsang paagi ang pagkasagrado sa dugo makabenepisyo kanato?

Ang dugo sagrado kay ang Diyos nag-ingon nga kini naghawas sa kinabuhi, o kalag, sa usa ka linalang. (Genesis 9:​3, 4) Ang balaod sa Diyos, nga naghatag ug samang bili sa dugo ug sa kinabuhi, makabenepisyo kanato. Sa unsang paagi? Pinasukad niana, mahimong mapasaylo ang atong mga sala.​—⁠Basaha ang Levitico 17:​11-13; Hebreohanon 9:⁠22.

Ang dugo ni Jesus ilabinang bililhon tungod kay siya hingpit. Gitanyag ni Jesus sa Diyos ang usa ka butang nga naghawas sa iyang kinabuhi​—⁠ang iyang dugo. (Hebreohanon 9:12) Ang kinabuhing walay kataposan nahimong posible tungod sa iyang giula nga dugo.​—⁠Basaha ang Mateo 26:28; Juan 3:⁠16.

Alang sa dugang impormasyon, tan-awa ang kapitulo 12 ug 13 niining basahona, Unsay Tinuod nga Gitudlo sa Bibliya?, nga gipatik sa mga Saksi ni Jehova.