Ang Imo Bang mga Plano Nahiuyon sa Katuyoan sa Diyos?

ANG Clark’s nutcracker maoy usa ka abohon-ug-kolor nga langgam nga mag-aawit nga kasagarang makita diha sa kalasangan sa kasadpang bahin sa Amerika del Norte. Matag tuig kini magtigom ug mga 33,000 ka liso, nga magpondo niana diha sa mga 2,500 ka lainlaing dapit agig pagpangandam alang sa tugnaw kaayong mga bulan. Sa pagkatinuod, kining langgama “kinaiyanhong maalamon” sa pagtigom ug pagkaon alang sa umaabot.—Proverbio 30:24.

Ang mga tawo labaw pa kaayog katakos kay sa maong langgam. Sa tanang kalalangan ni Jehova sa yuta, mga tawo lang ang may di-hitupngang katakos sa pagkakat-on gikan sa nangaging mga kasinatian ug sa paghimog mga plano pinasukad niana. “Daghan ang mga plano sulod sa kasingkasing sa usa ka tawo,” matod sa maalamong hari nga si Solomon.—Proverbio 19:21.

Bisan pa niana, kasagarang ipasukad sa mga tawo ang ilang mga plano sumala sa ilang mga gituohan bahin sa umaabot. Pananglitan, nagplano kag mga kalihokan ugma kay nagtuo ka nga mosilang gayod ang adlaw ug nga buhi ka pa. Husto ang una nimong pagtuo kay nakaseguro ka mang mosilang gayod ang adlaw; apan dili ka makaseguro nga buhi ka pa ugma. Ang magsusulat sa Bibliya nga si Santiago nagpahayag niining kamatuorana: “Kamo wala masayod kon unsay dangatan sa inyong kinabuhi ugma.”—Santiago 4:13, 14.

Si Jehova nga Diyos walay limitasyon. Siya nahibalo sa “kataposan sukad sa sinugdan.” Ang gipahayag niyang katuyoan seguradong matuman. “Ang akong kaugalingong laraw mobarog,” siya miingon, “ug ang tanang butang nga akong gikahimut-an akong pagabuhaton.” (Isaias 46:10) Apan, komosta kon ang mga tawo maghimog mga plano nga sukwahi sa katuyoan sa Diyos?

Kon ang mga Plano sa Tawo Sukwahi sa Katuyoan sa Diyos

Mga 4,000 ka tuig kanhi, nagplano ang mga magtutukod sa Torre sa Babel nga magtapok lang sila sa usa ka dapit. Sila nag-ingon: “Dali! Magtukod kita ug usa ka siyudad ug usab usa ka torre nga ang tumoy niini abot sa mga langit, ug maghimo kita  ug bantog nga ngalan alang sa atong kaugalingon, kay tingali unyag kita magkatibulaag sa tibuok nawong sa yuta.”—Genesis 11:4.

Apan sukwahi kana sa katuyoan sa Diyos alang sa yuta. Siya nagsugo kang Noe ug sa iyang mga anak: “Magmabungahon ug magdaghan kamo ug pun-a ang yuta.” (Genesis 9:1) Unsay gihimo sa Diyos sa mga plano sa masinupakong katawhan sa Babel? Iyang gilahugay ang ilang pinulongan aron dili sila magkasinabot. Ug unsay resulta? ‘Sila nagkatibulaag gikan didto ibabaw sa tibuok nawong sa yuta.’ (Genesis 11:5-8) Ang mga magtutukod sa Babel napugos sa pagkakat-on ug usa ka hinungdanong leksiyon. Kon ang mga plano sa tawo mosukwahi sa katuyoan sa Diyos, “ang kabubut-on ni Jehova mao ang mobarog” o matuman. (Proverbio 19:21) Imo bang ipadapat kanang mga leksiyona?

Ang Kakulang ug Salabotan sa Datong Tawo

Wala ka tingali magplano nga magtukod ug torre, apan daghan karon ang nagplano sa pagpondog daghang salapi sa bangko ug sa pagbatog daghang materyal nga kabtangan aron kon retirado na sila, hamugaway ang ilang kahimtang. Gusto gayod sa tawo nga pahimuslan ang iyang hinagoan, ug normal lang kana. “Ang matag tawo mokaon ug moinom ug magpahimulos ug maayo sa tanan niyang kahago,” misulat si Solomon. “Kini ang gasa sa Diyos.”—Ecclesiastes 3:13.

Manubag kita kang Jehova kon giunsa nato paggamit kining gasaha. Mga 2,000 ka tuig kanhi, gipasiugda kini ni Jesus ngadto sa iyang mga tinun-an pinaagig usa ka ilustrasyon. Siya miingon: “Ang yuta sa usa ka datong tawo nagpatungha ug maayong abot. Tungod niini siya misugod pagpangatarongan sa iyang kaugalingon, nga nag-ingon, ‘Unsay akong buhaton, karon nga wala na akoy katigoman sa akong mga abot?’ Busa siya miingon, ‘Ang akong buhaton mao kini: Akong gub-on ang akong mga balay-tipiganan ug tukoron ang mas dagko, ug didto akong tigomon ang akong tanan nga mga lugas ug ang akong tanan nga maayong mga butang; ug ako moingon sa akong kalag: “Kalag, aduna kay daghang maayong mga butang nga natigom alang sa daghang katuigan; pagpahayahay, kaon, inom, paglipaylipay.”’” (Lucas 12:16-19) Di ba morag makataronganon man ang katuyoan sa datong tawo? Sama sa langgam nga gihisgotan ganina, ang Clark’s nutcracker, ang tawo diha sa ilustrasyon daw nangandam lamang alang sa iyang mga panginahanglan sa umaabot.

Apan may sayop sa panghunahuna sa datong tawo. Si Jesus nagpadayon: “Apan ang Diyos miingon kaniya, ‘Ikaw nga walay buot, karong gabhiona ilang pangayoon nga mapugsanon ang imong kalag gikan kanimo. Nan, kinsa ang magapanag-iya sa mga butang nga imong gitigom?’” (Lucas 12:20) Gisupak ba ni Jesus ang giingon ni Solomon nga ang paghago ug ang pagpahimulos sa mga resulta niana maoy mga gasa gikan sa Diyos? Wala. Unsay buot ipasabot ni Jesus? Siya miingon: “Ingon usab  niana ang tawo nga magatigom ug bahandi alang sa iyang kaugalingon apan dili dato ngadto sa Diyos.”—Lucas 12:21.

Si Jesus nagtudlo sa iyang mga mamiminaw nga gusto ni Jehova nga ipahiuyon nato ang atong mga plano sa mga katuyoan sa Diyos. Ang datong tawo mahimo untang dato ngadto sa Diyos pinaagi sa pagpangitag mga paagi sa pagpauswag sa iyang kaalam, gugma, ug relasyon uban kaniya. Apan ang mga pulong sa datong tawo nagpadayag nga siya walay interes sa maong mga butang. Wala siyay plano nga magbilin ug pipila sa iyang mga anihonon aron mahagdaw sa mga kabos, ni sa pagtanyag kang Jehova ug mga halad nga gasa. Ang maong pagkamanggihatagon wala gayoy luna sa kinabuhi sa maong datong tawo. Ang iya rang gihunahuna mao ang iyang kaharuhay ug ang pagtagbaw sa iyang mga tinguha.

Imo bang namatikdan nga daghan usab karon ang adunay mga prioridad nga sama sa datong tawo nga gihisgotan ni Jesus? Dato man kita o pobre, dali ra kaayo kitang malit-agan sa materyalismo, mao nga mapasagdan ang atong relasyon sa Diyos. Unsay imong mahimo aron dili ka malit-agan niini?

Nagplano Alang sa “Normal” nga Kinabuhi

Dili sama sa datong tawo diha sa ilustrasyon ni Jesus, naglisod ka tingali sa imong panginabuhi. Bisan pa niana, kon ikaw minyo, seguradong nagplano ka sa pagtagana sa mga panginahanglan sa imong pamilya ug, kon posible, sa paghatag ug maayong edukasyon sa imong mga anak. Kon dili ka pa minyo, lagmit apil sa imong mga plano ang pagpanarbaho o kaha ang pagpabilin sa imong trabaho, aron dili ka makapabug-at sa uban. Kana maoy maayong mga tumong.—2 Tesalonica 3:10-12; 1 Timoteo 5:8.

Apan ang pagtrabaho, pagkaon, pag-inom—nga giisip nga normal nga kinabuhi—makahimo sa usa ka tawo sa pagkinabuhi nga sukwahi sa kabubut-on sa Diyos. Sa unsang paagi? Matod ni Jesus: “Maingon kaniadto sa mga adlaw ni Noe, mao man usab unya ang presensiya sa Anak sa tawo. Kay ingon nga sila niadtong mga adlawa sa wala pa ang baha, ang mga lalaki nangaon ug nanginom, nagminyo ug ang mga babaye gihatag sa kaminyoon, hangtod sa adlaw nga misulod si Noe sa arka; ug wala sila magtagad hangtod nga miabot ang baha ug gibanlas silang tanan, mao man usab unya ang presensiya sa Anak sa tawo.”—Mateo 24:37-39.

Sa wala pa ang Lunop, ang mga tawo sa katibuk-an nagpahimulos sa giisip nilang normal nga kinabuhi. Apan “wala sila magtagad” sa katuyoan sa Diyos nga mao ang paglaglag nianang daotang kalibotan pinaagig lunop. Dayag nga sila naghunahuna nga dili normal ang pagkinabuhi ni Noe. Apan sa dihang miabot ang Lunop, ang pagkinabuhi ni Noe ug sa iyang pamilya mao ang napamatud-ang maalamon.

Ang tanang ebidensiya nagpakita nga kita nagkinabuhi na karon sa panahon sa kataposan. (Mateo 24:3-12; 2 Timoteo 3:1-5) Sa dili madugay, ang Gingharian sa Diyos “magadugmok ug magatapos” niining presenteng sistema sa mga butang. (Daniel 2:44) Ilalom sa pagmando sa maong Gingharian, ang yuta mahimong paraiso. Hanawon sa Gingharian ang sakit ug kamatayon. (Isaias 33:24; Pinadayag 21:3-5) Ang tanang linalang sa yuta magkahiusa sa pagkinabuhi ug dili na gayod magutman.—Salmo 72:16; Isaias 11:6-9.

Apan sa dili pa molihok si Jehova, iyang katuyoan nga ang maayong balita bahin sa iyang sa Gingharian “igawali sa tibuok gipuy-ang yuta ingon nga pagpamatuod ngadto sa tanang kanasoran.” (Mateo 24:14) Uyon niana nga katuyoan, mga pito ka milyong Saksi ni Jehova ang nagsangyaw karon sa maayong balita sa Gingharian diha sa 236 ka kayutaan sa kapig 400 ka pinulongan.

Alang sa daghang tawo, daw dili normal ug kataw-anan pa ang pagkinabuhi sa mga Saksi ni Jehova. (2 Pedro 3:3, 4) Sama sa mga tawo sa wala pa ang Lunop, ang kadaghanan karon puliki sa inadlawng pagkinabuhi. Sila lagmit nagtuo nga dili makataronganon si bisan kinsa nga dili magkinabuhi sa giisip sa kadaghanan nga normal nga kinabuhi. Apan alang sa mga may pagtuo sa mga saad sa Diyos, makataronganon gayod ang pagkinabuhi uyon sa katuyoan sa Diyos.

Busa, dato ka man o pobre o kasarangan lang ang kahimtang, maalamon nga sa matag karon ug unya imong susihon ang imong mga plano alang sa umaabot. Samtang himoon mo kini, pangutan-a ang imong kaugalingon, ‘Ang ako bang mga plano nahiuyon sa katuyoan sa Diyos?’

[Hulagway sa panid 11]

Kon ang mga plano sa tawo mosukwahi sa katuyoan sa Diyos, ang kabubut-on ni Jehova mao ang matuman

[Hulagway sa panid 12]

Ang datong tawo sa ilustrasyon ni Jesus wala magpahiuyon sa iyang mga plano sumala sa katuyoan sa Diyos