Nahinumdom Ka Ba?

Gipabilhan mo ba ang pagbasa sa bag-ong mga gula sa Ang Bantayanang Torre? Buweno, sulayi kon makatubag ka ba sa mosunod nga mga pangutana:

• Unsay makatabang kanimo sa pagmatuto sa imong mga anak aron mahimo silang responsable?

Ingong ginikanan, magpakitag maayong panig-ingnan sa pagkaresponsable. (Juan 13:15) Ayaw pagdahom ug labaw kay sa iyang mahimo; samtang nagdako siya, anam-anam siyang mahimong responsable kon bahin sa kahinlo, pagkauntop sa panahon, ug paghimog mga asaynment sa eskuylahan. Paghatag ug espesipikong mga instruksiyon aron mabansay ang imong anak sa pagtuman sa iyang mga responsibilidad.—5/1, panid 19-20.

• Nganong wala man siloti sa Diyos si Aaron sa iyang paghimog bulawan nga nating baka?

Tinuod nga nalapas ni Aaron ang balaod sa Diyos bahin sa idolatriya. (Ex. 20:3-5) Apan, si Moises nangamuyo sa Diyos alang kang Aaron, ug dunay “dakong puwersa” ang iyang pangamuyo. (Sant. 5:16) Si Aaron nagmatinumanon sulod sa daghan nang katuigan. Ug bisan pag naaghat siya sa mga tawo sa paghimog nating baka, iyang gipakita sa ulahi nga wala siya mouyon niana, kay siya midapig kang Jehova uban sa mga anak ni Levi. (Ex. 32:25-29)—5/15, panid 21.

• Diin nahimutang ang Opir, nga tinubdan sa bulawan sumala sa Bibliya?

Aron mahakot ang mga bulawan gikan sa Opir, si Solomon nagpagamag mga barko sa Ezion-geber. (1 Hari 9:26-28) Ang maong dunggoanan nahimutang sa amihanang tumoy sa Gulpo sa Aqaba duol sa gitawag karon ug Elat ug Aqaba, sa Pulang Dagat. Busa, ang Opir lagmit nahimutang sa Arabia duol sa Pulang Dagat o diha sa mga baybayon sa Aprika o India.—6/1, panid 15.

• Sa unsa nagtumong ang “balsamo sa Gilead”? (Jer. 8:22)

Ang balsamo maoy humot, lanahon nga duga sa lainlaing tanom nga makita sa Gilead, nga sidlakan sa Suba sa Jordan, ug sa uban pang mga dapit. Gigamit kini sa pagtambal sa mga samad. Ang makaluluoyng kahimtang sa Israel angay untang magtukmod sa nasod sa pagpangitag tambal, apan wala nila kana buhata. (Jer. 8:9)—6/1, panid 21-22.

• Unsay makatabang sa usa ka Kristohanon sa pagsagubang sa pagpanapaw sa iyang kapikas?

Kon ang inosenteng kapikas naningkamot sa pagkinabuhi sumala sa mga prinsipyo sa Bibliya, dili niya angayng basolon ang iyang kaugalingon tungod sa pagluib sa iyang kapikas. Ang Diyos nahibalo nga nagkinahanglan kag paghupay ug pagdasig. Mahimo niya kanang itagana pinaagi sa mga isigka-Kristohanon.—6/15, panid 30-31.

• Unsay imong mahimo sa pagtabang sa usa nga may sakit?

Paminawi siya. (Eccl. 3:1, 7) Pakitai siyag empatiya ug konsiderasyon. (Roma 12:15) Paningkamoti nga imo siyang madasig ug matabangan. (Col. 4:6; 1 Juan 3:18) Pakigkomunikar kaniya. (Prov. 17:17)—7/1, panid 10-13.

• Nganong nahibalo kita nga ang Diyos walay sinugdanan?

Gipakita kana ni Moises sa iyang pag-ampo. (Sal. 90:2) Nan, haom gayod nga si Jehova lamang ang tawgong “Hari nga walay kataposan.” (1 Tim. 1:17)—7/1, panid 28.

• Sa unsang paagi nimo masilsil sa imong mga anak ang gugma sa pagbasa?

Ang mahigugmaong panag-ubanay ug panig-ingnan sa ginikanan makatabang sa pagsilsil ug gugma sa pagbasa. Lain pa, hatagi silag mga basahon. Basahi sila. Dasiga sila nga iestorya ang inyong nabasa ug hisgoti ninyo kana. Awhaga ang imong mga anak nga basahan ka, ug dasiga sila sa pagpangutana.—7/15, panid 26.

• Nganong wala man magdali si Jesus sa pag-adto kang Lazaro ug sa pag-ayo kaniya?

Sa pag-abot ni Jesus, upat ka adlaw nang patay si Lazaro. Pinaagi sa paghulat, si Jesus nakahatag ug mas dakong pamatuod bahin sa iyang Amahan. Busa, daghan ang nahimong magtutuo. (Juan 11:45)—8/1, panid 14-15.

• Unsa ang “hatag-as nga mga dapit”?

Sagad, nagtumong kana sa mga hawan ibabaw sa bungtod o sa ubang mga dapit sa bakak nga pagsimba. Usahay aduna kanay mga halaran, sagradong mga haligi o poste, ug uban pang galamiton alang sa bakak nga pagsimba diin ilang gibuhat ang mga butang nga dulumtanan sa Diyos. (Num. 33:52)—8/1, panid 23.