Pagpauswag sa Tukmang Kahibalo Uban ang “Kaikag sa Hunahuna”

ANG tanang alagad ni Jehova nagtinguha sa iyang pag-uyon. Busa buot natong pauswagon ang atong pagtuo ug kasibot sa pag-alagad. Apan gipakita ni apostol Pablo ang kapeligrohan nga basin mahisama kita sa pipila ka Hudiyo sa iyang adlaw: “Sila may kasibot sa Diyos; apan dili sumala sa tukmang kahibalo.” (Roma 10:2) Busa, ang atong pagtuo ug pagsimba kang Jehova dili angayng ipasukad lamang sa kasibot o emosyon. Gikinahanglan nga kita adunay tukmang kahibalo bahin sa Diyos ug sa iyang kabubut-on.

Diha sa laing basahon ni Pablo, iyang gilangkit ang mga buhat nga giuyonan sa Diyos ngadto sa kaikag sa pagkuhag kahibalo. Giampo niya nga ang mga sumusunod ni Kristo ‘mapuno unta sa tukmang kahibalo sa iyang kabubut-on diha sa tanang kaalam ug espirituwal nga pagsabot, aron sila magalakaw nga takos kang Jehova aron bug-os nga makapahimuot kaniya samtang padayon silang magapamunga sa tanang maayong buhat ug molambo sa tukmang kahibalo sa Diyos.’ (Col. 1:9, 10) Nganong hinungdanon kaayo ang pagbaton ug “tukmang kahibalo”? Nganong angay natong pauswagon ang maong kahibalo?

Ang Pasukaranan sa Pagtuo

Ang atong pagtuo gipasukad sa tukmang kahibalo sa Diyos ug sa iyang kabubut-on nga gibutyag sa Bibliya. Kon wala kanato ang maong kahibalo, ang atong pagtuo mahisamag kastilyo nga gama sa balas nga dali ra kaayong mabanlas bisan sa usa ka gamayng balod. Si Pablo nag-awhag kanato sa pag-alagad sa Diyos uban ang “gahom sa pagpangatarongan” ug sa ‘pagbag-o sa atong hunahuna.’ (Roma 12:1, 2) Ang makanunayong pagtuon sa Bibliya makatabang kanato sa paghimo niini.

Si Ewa, nga usa ka regular payunir sa Polandia, miangkon: “Kon panagsa lang ako magtuon sa Bibliya, dili mouswag ang akong kahibalo bahin kang Jehova. Maapektohan niini ang akong pagka-Kristohanon, ug mohuyang ang akong pagtuo—mahugno ang akong espirituwalidad.” Dili gayod unta kana mahitabo kanato! Tagda ang panig-ingnan sa usa ka tawo nga giuyonan sa Diyos tungod sa iyang pagpauswag sa tukmang kahibalo kang Jehova.

“Gihigugma Ko Gayod ang Imong Balaod!”

Diha sa balaknong awit nga narekord sa Salmo 119, atong makita kon giunsa pag-isip sa salmista ang mga balaod, pahinumdom, mando, kasugoan, ug ang hudisyal nga mga desisyon ni Jehova. Siya misulat: “Ako nagakalipay sa imong mga lagda. . . . Gikalipayan ko ang imong mga pahinumdom.” Siya usab misulat: “Gihigugma ko gayod ang imong balaod! Kini ang akong gipalandong sa tibuok nga adlaw.”—Sal. 119:16, 24, 47, 48, 77, 97.

Ang pulong “nagakalipay” ug “gipalandong” nagpasabot nga angay natong palandongon ang Pulong sa Diyos uban ang kalipay. Kini nagpakita nga ang salmista nahigugma gayod sa pagtuon sa balaod sa Diyos. Ang iyang gugma wala ipasukad sa emosyon. Hinunoa, iya gayong gitinguha nga pamalandongon ang balaod ni Jehova aron iya kanang masabtan. Ang iyang tinamdan nagpakita nga siya naningkamot gayod nga makakat-on sa tukmang kahibalo bahin sa Diyos ug sa iyang kabubut-on.

Kinasingkasing ang gugma sa salmista sa Pulong sa Diyos. Mahimo natong pangutan-on  ang atong kaugalingon: ‘Gihigugma ko ba gayod ang Pulong sa Diyos? Ako ba malipayong nagbasa ug namalandong sa usa ka bahin niini adlaw-adlaw? Ako ba gayong gipaningkamotan nga mabasa ang Pulong sa Diyos? Ako ba nagaampo sa dili pa ako magbasa?’ Kon oo ang atong tubag sa maong mga pangutana, kana nagpakita nga kita padayong nag-uswag sa “tukmang kahibalo sa Diyos.”

Si Ewa mikomento: “Naningkamot gayod ako sa pagpauswag sa kalidad sa akong personal nga pagtuon. Pagkadawat nako sa brosyur nga ‘Tan-awa ang Maayong Yuta,’ kanunay nako kanang gigamit sa akong pagtuon. Ako usab manukiduki gamit ang Insight on the Scriptures ug uban pang reperensiya.”

Tagda usab ang panig-ingnan ni Wojciech ug Małgorzata, kinsa adunay daghang kaakohan sa pamilya. Sa unsang paagi sila migahin ug panahon sa pagtuon sa Bibliya? “Gihimo namo ang among maarangan aron among mahatagag panahon ang personal nga pagtuon sa Bibliya. Dayon, diha sa among pagtuon sa pamilya ug sa among adlaw-adlawng pag-estoryahay, among ipaambit ang makapadasig nga mga punto nga among nakat-onan.” Ang dulot nga personal nga pagtuon nakahatag kanilag dakong kalipay ug nakatabang usab kanila nga “molambo sa tukmang kahibalo.”

Pagtuon Uban ang Bukas nga Hunahuna

Ingong mga Kristohanon, kita nagtuo nga kabubut-on sa Diyos nga “ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Tim. 2:3, 4) Nagpasabot kini nga angay gayod natong basahon ang Bibliya ug maningkamot nga ‘masabtan ang diwa niana.’ (Mat. 15:10) Kon bukas ang atong hunahuna, mas dali natong masabtan ang atong gitun-an. Ingon niana ang tinamdan sa mga taga-Berea sa karaang panahon human sila masangyawi ni Pablo sa maayong balita: ‘Ilang gidawat ang pulong uban ang tumang kaikag sa hunahuna, nga sa adlaw-adlaw maampingong nagasusi sa Kasulatan kon tinuod ba kining mga butanga.’—Buh. 17:11.

Sama sa mga taga-Berea, ikaw ba maikagon usab sa pagtuon sa Bibliya nga dili magpabalda sa bisan unsang butang? Tingali, dili ka ganahang magtuon kaniadto. Apan masundog nimo ang mga taga-Berea. Dugang pa, samtang magkaedaran ang tawo, magkagamay usab ang panahon nga iyang igugol sa pagtuon. Apan angayng buntogon sa mga Kristohanon ang maong tinamdan. Bisan unsay atong edad, mapauswag gihapon nato ang atong pagtuon. Samtang ikaw nagbasa, matikdi pag-ayo ang mga impormasyon nga imong ikapaambit sa uban. Pananglitan, mahimo ba nimong ipaambit ngadto sa imong Kristohanong mga higala ang usa ka punto nga imong nabasahan o nakat-onan gikan sa imong personal nga pagtuon? Pinaagi niini, mas mosuhop sa imong kasingkasing ug hunahuna ang mga butang nga imong makat-onan, ug matabangan usab nimo ang uban.

Sa dihang ikaw magtuon, makakat-on ka gikan kang Esdras kinsa ‘nag-andam sa iyang kasingkasing sa pagkonsulta sa balaod ni Jehova.’ (Esd. 7:10) Unsaon nimo kini paghimo? Pangitag dapit diin makatuon ka ug tarong. Dayon, pag-ampo kang Jehova alang sa giya ug  kaalam. (Sant. 1:5) Pangutan-a ang imong kaugalingon, ‘Unsay akong gidahom nga makat-onan sa akong pagtuon?’ Samtang nagbasa, matikdi ang pangunang mga punto ug mahimo nimo kanang ilista. Mahimo usab nimong markahan ang mga punto nga gusto nimong hinumdoman. Hunahunaa kon sa unsang paagi nimo kana magamit sa kanataran, o sa paghimog mga desisyon, o sa pagdasig sa mga igsoon. Sa dili pa matapos ang imong pagtuon, repasoha sa mubo ang materyal. Makatabang kini aron dili nimo malimtan ang imong gitun-an.

Si Ewa miingon: “Samtang ako nagbasa sa Bibliya, akong susihon ang mga cross-reference, Watch Tower Publications Index, ug Watchtower Library sa CD-ROM. Naghimo usab akog mga nota nga akong magamit sa ministeryo.”

Sulod sa daghang tuig, ang pipila malipayon ug maikagong nagtuon sa Pulong sa Diyos. (Prov. 2:1-5) Bisan pa niana, aduna silay mga kaakohan ug dili sayon alang kanila ang paggahin ug panahon sa personal nga pagtuon. Kon ingon niini ang imong kahimtang, unsang mga pagpasibo ang angay nimong himoon?

Unsaon Nako Paggahin ug Panahon?

Tingali mouyon ka nga mas hatagan nimog panahon ang usa ka butang kon ganahan kang mohimo niana. Daghan ang natabangan sa pagtakdag realistikong tumong, sama sa pagbasa sa enterong Bibliya. Aw, dili gayod sayon basahon ang taas nga talaan sa mga kaliwatan, ang detalyadong paghubit sa karaang templo, o ang lisod sabton nga mga tagna nga daw walay kalambigitan sa adlaw-adlawng pagkinabuhi. Pangitag praktikal nga mga paagi aron makab-ot nimo ang imong tumong. Pananglitan, una nimo basahon ang usa ka bahin sa Bibliya nga daw lisod sabton, mahimo kang manukiduki sa mga impormasyon bahin sa kasaysayan ug sa kapadapatan niana. Ang maong mga impormasyon makaplagan diha sa librong “Ang Tibuok Kasulatan Dinasig sa Diyos ug Mapuslanon,” nga mabatonan sa halos 50 ka pinulongan.

Makatabang ang imong imahinasyon sa dihang ikaw magbasa sa Bibliya. Pinaagi niana, mahimong buhi diha sa imong hunahuna ang mga karakter ug ang mga panghitabo nga gihisgotan. Ang pagpadapat niini nga mga sugyot dakog ikatabang aron malipay ug makabenepisyo  ka sa imong pagtuon. Sa ingon, mas mahinam kang mogahin ug panahon sa pagtuon. Mas sayon usab alang kanimo nga batasanon ang pagbasa sa Bibliya adlaw-adlaw.

Apan, komosta kon ang inyong pamilya puliki kaayo? Nganong dili ninyo hisgotan ang mga benepisyo sa pagtuon sa Bibliya ingong pamilya? Pinaagi niini, makahimo kamog praktikal nga mga sugyot, sama sa pagmata ug sayo sa matag adlaw, o sa pipila ka adlaw sa semana aron magtuon sa Bibliya. O kaha basin kinahanglan ninyong usbon ang eskedyul sa inyong pamilya. Pananglitan, mas praktikal alang sa pipila ka pamilya ang pagteksto o ang pagbasa ug usa ka bahin sa Bibliya human sa pagpangaon. Sa dili pa hiposon ang kinan-an, sila mogahig 10 ngadto sa 15 minutos sa paghisgot sa Kasulatan o sa pagbasa sa Bibliya. Tingali lisod kining himoon sa sinugdan, apan sa kadugayan mabatasan na kana sa inyong pamilya.

Gisaysay ni Wojciech ug ni Małgorzata kon unsa ang nakatabang sa ilang pamilya: “Kaniadto, mahurot ang among panahon sa mga butang nga dili hinungdanon. Busa nakahunahuna mi nga limitahan ang panahon nga among igugol sa pagpadalag mga e-mail ug sa mga kalingawan. Magtakda mig adlaw ug oras kon kanus-a namo tun-ag maayo ang Bibliya.” Wala gayod makawang ang ilang paningkamot, ug makahimo ka usab niana sa imong pamilya.

Ang Pagpauswag sa Tukmang Kahibalo Mapuslanon!

Ang pagtuon ug maayo sa Pulong sa Diyos makatabang aron ang usa “magapamunga sa tanang maayong buhat.” (Col. 1:10) Kon ikaw nakasinati niana, ang imong pag-uswag madayag ngadto sa tanan. Mohamtong ka ug mouswag ang imong pagsabot sa kamatuoran sa Bibliya. Makahimo kag timbang nga mga desisyon ug makahatag kag maalamong tambag ngadto sa uban. Labaw sa tanan, mas masuod ka kang Jehova. Mas molalom ang imong pagpabili sa iyang mga hiyas, ug kana madayag pinaagi sa pagpaambit sa uban sa imong kahibalo bahin kaniya.—1 Tim. 4:15; Sant. 4:8.

Bisan unsa pay imong edad o kahimtang, paningkamot gayod nga imong mapabilhan ang Pulong sa Diyos, ug tun-i kana uban ang bukas nga hunahuna. Makasalig ka nga dili gayod kalimtan ni Jehova ang imong mga paningkamot. (Heb. 6:10) Siya dagayang magpanalangin kanimo.

[Kahon sa panid 13]

KON PAUSWAGON NATO ANG “TUKMANG KAHIBALO”. . .

Molig-on ang atong pagtuo sa Diyos ug kita uyonan ni Jehova.—Col. 1:9, 10

Makabaton kitag hait nga salabotan ug makahimog maalamong mga desisyon.—Sal. 119:99

Mas malipay kita sa pagtabang sa uban nga masuod kang Jehova.—Mat. 28:19, 20

[Mga hulagway sa panid 14]

Dili sayon ang pagpangitag dapit aron makatuon kag tarong, apan angay nimo kanang himoon

[Hulagway sa panid 15]

Ang pipila ka pamilya magbasa sa Bibliya human sa pagpangaon