Mga Pangunang Punto Gikan sa Basahon ni Marcos
Ang Pulong ni Jehova Buhi
Mga Pangunang Punto Gikan sa Basahon ni Marcos
ANG Ebanghelyo ni Marcos mao ang kinamub-an sa upat ka Ebanghelyo. Gisulat kini ni Juan Marcos mga 30 ka tuig human mamatay ug mabanhaw si Jesu-Kristo, ug kini naundan ug daghang makaiikag nga mga hitabo sulod sa tulo ka tuig ug tunga nga ministeryo ni Jesus.
Ang basahon ni Marcos nga gisulat alang sa mga dili-Hudiyo, ilabina sa mga Romano, nagbatbat kang Jesus ingong ang Anak sa Diyos nga naghimog mga milagro ug masiboton kaayo sa pagsangyaw. Gipasiugda niini ang mga gihimo ni Jesus inay ang iyang mga gitudlo. Kon atong hatagag pagtagad ang Ebanghelyo ni Marcos, malig-on ang atong pagtuo sa Mesiyas ug madasig kita nga magmasiboton sa pagmantala sa mensahe sa Diyos.—Heb. 4:12.
MALAMPOSONG PAGSANGYAW SA GALILEA
Human iasoy ang kalihokan ni Juan Bawtista ug ang 40 ka adlaw ni Jesus sa kamingawan diha sa 14 lamang ka bersikulo, gisugdan ni Marcos ang makaiikag nga taho bahin sa pagsangyaw ni Jesus sa Galilea. Ang sublisubli nga paggamit sa pulong “dihadiha” nakadugang sa kalaktod sa maong asoy.—Mar. 1:10, 12.
Natapos ni Jesus ang iyang tulo ka kampanya sa pagsangyaw sa Galilea nga wala dangtig tulo ka tuig. Gipresentar ni Marcos ang kadaghanan sa maong asoy sa sunodsunod nga paagi. Wala niya ilakip ang Wali sa bukid ug ang uban pang tag-as nga mga pakigpulong ni Jesus.
Tubag sa mga Pangutana Bahin sa Kasulatan:
1:15—Unsang “tinudlong panahon” ang natuman na? Ang giingon ni Jesus nga tinudlong panahon nga natuman na mao ang pagsugod sa iyang ministeryo. Ang Gingharian sa Diyos haduol na tungod kay siya nga mao ang gitudlo nga Hari anaa na. Busa ang mga tawong mahigugmaon sa pagkamatarong makasanong sa iyang pagsangyaw ug makahimog mga lakang aron sila mauyonan sa Diyos.
1:44; 3:12; 7:36—Nganong dili gusto si Jesus nga ibandilyo ang iyang mga milagro? Gusto ni Jesus nga ang mga tawo makakita mismo sa mga pamatuod nga siya ang Kristo ug mohimog personal nga desisyon pinasukad niana imbes sa gipasobrahan o lagmit gituis nga mga taho. (Isa. 42:1-4; Mat. 8:4; 9:30; 12:15-21; 16:20; Luc. 5:14) Ang usa ka eksepsiyon mao ang kabahin sa tawong gidemonyohan sa dapit sa mga Gerasanhon. Giingnan siya ni Jesus sa pagpauli ug pagtaho sa iyang mga milagro ngadto sa iyang mga paryente. Sanglit gihinginlan man si Jesus sa mga tawo nianang dapita, may pipila lang ka higayon o wala gayod siya makahigayon sa pagsangyaw kanila. Ang presensiya ug pagpamatuod didto sa tawong gidemonyohan kanhi nga malulotong giayo ni Jesus makapanghimakak sa bisan unsang dili-maayong mga komento bahin sa pagkahanaw sa mga baboy.—Mar. 5:1-20; Luc. 8:26-39.
2:28—Nganong si Jesus gitawag ug “Ginoo bisan sa igpapahulay”? ‘Ang Balaod may landong sa maayong mga butang nga moabot,’ matod ni apostol Pablo. (Heb. 10:1) Sumala sa giingon sa Balaod, ang Igpapahulay mahitabo human sa unom ka adlaw nga pagtrabaho, ug daghang tawo ang gipang-ayo ni Jesus nianang adlawa. Kini naglandong sa malinawong kapahulayan ug sa uban pang mga panalangin nga mapahimuslan sa mga tawo ilalom sa Usa ka Libo ka Tuig nga Pagmando ni Kristo human matapos ang malupigong pagmando ni Satanas. Busa, ang Hari sa maong Gingharian mao usab ang “Ginoo sa igpapahulay.”—Mat. 12:8; Luc. 6:5.
3:5; 7:34; 8:12—Sa unsang paagi nahibaloan ni Marcos ang mga pagbati ni Jesus sa lainlaing mga kahimtang? Si Marcos dili usa sa 12 ka apostoles o usa ka suod nga kauban ni Jesus. Sumala sa kasagarang gituohan, ang suod nga higala ni Marcos nga si apostol Pedro maoy tuboran sa iyang daghang nahibaloan.—1 Ped. 5:13.
6:51, 52—Unsay “kahulogan sa mga tinapay” nga wala masabti sa mga tinun-an? Pipila lang ka oras ang milabay, si Jesus nagpakaon ug 5,000 ka lalaki gawas pa sa mga babaye ug mga bata pinaagi lamang sa lima ka tinapay ug duha ka isda. Ang “kahulogan sa mga tinapay” nga wala masabti sa mga tinun-an gikan sa maong hitabo mao ang gahom nga gihatag ni Jehova nga Diyos kang Jesus sa paghimog mga milagro. (Mar. 6:41-44) Kon ila pang nasabtan ang kadako sa gahom nga gihatag kang Jesus, dili unta sila mahibulong pag-ayo sa dihang siya milagrosong milakaw ibabaw sa tubig.
8:22-26—Nganong giayo ni Jesus ang tawong buta sa duha ka hugna? Lagmit gihimo kadto ni Jesus agig konsiderasyon alang kaniya. Ang anam-anam nga pagpasig-uli sa panan-aw sa tawo nga naanad na sa kangitngit sa taas nga panahon magpaarang kaniya sa pagpasibo sa kahayag sa adlaw.
Mga Leksiyon Alang Kanato:
2:18; 7:11; 12:18; 13:3. Gipatin-aw ni Marcos ang mga kostumbre, termino, pagtuo, ug mga dapit nga dili pamilyar sa dili-Hudiyo nga mga magbabasa. Iyang gipatin-aw nga ang mga Pariseo “nagpuasa,” ang korban maoy “usa ka gasa nga gipahinungod sa Diyos,” ang mga Saduseo “nag-ingon nga walay pagkabanhaw,” ug ang templo ‘malantaw ra’ gikan sa “Bukid sa mga Olibo.” Sanglit mga Hudiyo ra man ang interesado bahin talaan sa mga kagikan sa Mesiyas, wala na niya kini iapil. Busa si Marcos naghatag ug panig-ingnan alang kanato. Angay natong tagdon ang mga kahimtang sa atong mga mamiminaw sa dihang kita mosangyaw ug mohatag ug mga pakigpulong diha sa mga tigom sa kongregasyon.
3:21. Dili magtutuo ang mga paryente ni Jesus. Busa, siya mahunahunaon sa mga tawo, kinsa tungod sa ilang pagtuo, gisupak o gibiaybiay sa ilang dili-magtutuong mga membro sa pamilya.
3:31-35. Dihang gibawtismohan si Jesus, siya nahimong espirituwal nga Anak sa Diyos, ug “ang Jerusalem sa itaas” mao ang iyang inahan. (Gal. 4:26) Sukad niadto, ang mga tinun-an ni Jesus nahimong mas suod ug mas bililhon alang kaniya kay sa iyang unodnong mga paryente. Kini nagtudlo kanato sa pag-una sa mga butang may kalabotan sa matuod nga pagsimba.—Mat. 12:46-50; Luc. 8:19-21.
8:32-34. Angay kitang magmaalisto sa pag-ila ug pagsalikway sa bisan unsang sayop nga kalulot nga gipakita sa uban. Ang usa ka sumusunod ni Kristo kinahanglang magmaandam sa ‘pagdumili sa iyang kaugalingon,’ sa ato pa, ayran niya ang iyang kaugalingon ug isalikway ang mahakogong mga tinguha ug mga ambisyon. Kinahanglang andam siyang ‘mopas-an sa iyang estaka sa pagsakit,’ nga nagpasabot sa pagsagubang sa pag-antos, pagpakaulaw, paglutos, o kamatayon kon gikinahanglan tungod sa pagka-Kristohanon. Ug siya kinahanglang “magpadayon sa pagsunod” kang Jesus, nga sundogon ang Iyang pagkinabuhi. Ang pagkahimong tinun-an nagpasabot nga atong ugmaron ug huptan ang nagasakripisyo-sa-kaugalingon nga tinamdan sama sa gipakita ni Kristo Jesus.—Mat. 16:21-25; Luc. 9:22, 23.
9:24. Dili gayod kita maulaw sa pagsulti sa uban bahin sa atong pagtuo o sa pag-ampo nga hatagan kitag dugang pagtuo.—Luc. 17:5.
ANG KATAPOSANG BULAN
Sa hinapos nga bahin sa 32 K.P., si Jesus miadto “sa mga utlanan sa Judea ug sa tabok sa Jordan,” ug midugok na usab kaniya ang mga tawo. (Mar. 10:1) Human sa pagsangyaw didto, mipaingon siya sa Jerusalem.
Sa Nisan 8, si Jesus didto sa Betania. Naghirag siya sa lamesa panahon sa pagpangaon dihang may babaye nga misulod ug gibuboag pinahumotang lana ang iyang ulo. Ang mga panghitabo gikan sa madaogong pagsulod ni Jesus sa Jerusalem hangtod sa iyang pagkabanhaw giasoy sa sunodsunod nga paagi.
Tubag sa mga Pangutana Bahin sa Kasulatan:
10:17, 18—Nganong gitul-id man ni Jesus ang tawo nga nagtawag Kaniya nga “Maayong Magtutudlo”? Pinaagi sa pagsalikway niining maulog-ulogong titulo, gipakita ni Jesus nga ang himaya kinahanglang ihatag kang Jehova nga mao ang matuod nga Diyos ug ang tuboran sa tanang maayong mga butang. Dugang pa, gipasiugda ni Jesus ang kamatuoran nga ang Maglalalang sa tanang butang, si Jehova nga Diyos, mao lamang ang may katungod sa paghatag ug mga sukdanan kon unsay maayo ug daotan.—Mat. 19:16, 17; Luc. 18:18, 19.
14:25—Unsay gipasabot ni Jesus sa dihang iyang gisultihan ang iyang matinumanong mga apostoles: “Dili na gayod ako moinom pa sa produkto sa paras hangtod nianang adlawa sa dihang moinom ako ug bag-o niini diha sa gingharian sa Diyos”? Si Jesus wala mag-ingon nga adunay literal nga bino sa langit. Hinunoa, tungod kay ang pagmaya gisimbolohan man usahay sa bino, si Jesus nagtumong sa kalipay nga mahiuban sa iyang binanhaw nga dinihogang mga sumusunod didto sa Gingharian.—Sal. 104:15; Mat. 26:29.
14:51, 52—Kinsa ang batan-ong lalaki nga “nakaikyas nga hubo”? Si Marcos lang ang naghisgot niining hitaboa, busa makahinapos kita nga siya ang maong batan-on.
15:34—Ang pag-ingon ba ni Jesus nga “Diyos ko, Diyos ko, nganong gitalikdan mo ako?” nagpasabot nga siya kulang ug pagtuo? Wala. Bisan tuod wala kita mahibalo kon nganong nakaingon si Jesus niadto, ang iyang giingon mahimong nagpaila nga namatikdan niya nga gikuha ni Jehova ang Iyang panalipod aron bug-os masulayan ang integridad sa Iyang Anak. Posible usab nga nasulti kadto ni Jesus tungod kay buot niyang matuman ang gitagna sa Salmo 22:1 bahin kaniya.—Mat. 27:46.
Mga Leksiyon Alang Kanato:
10:6-9. Katuyoan sa Diyos nga mag-inunongay ang mga magtiayon. Busa, imbes magbulag dayon, ang mga bana ug asawa kinahanglang maningkamot sa pagpadapat sa mga prinsipyo sa Bibliya aron masagubang ang mga kalisdanan nga motungha sa ilang kaminyoon.—Mat. 19:4-6.
12:41-44. Ang panig-ingnan sa kabos nga babayeng balo nagtudlo kanato nga kinahanglan kitang magmahinatagon sa pinansiyal agig pagpaluyo sa matuod nga pagsimba.
[Hulagway sa panid 29]
Nganong giingnan man ni Jesus kining tawhana sa pagtaho sa tanang nahitabo kaniya ngadto sa iyang mga paryente?