Usa ka Kalibotan nga Walay Krimen sa Umaabot

HANDURAWA, kon mahimo nimo, ang usa ka kalibotan nga walay mga kriminal! Dili na kinahanglan ang mga polis, bilanggoan, o mahal ug komplikado nga mga sistema sa hustisya alang sa mga kriminal. Kana mao unyay usa ka kalibotan diin ang matag indibiduwal magtahod sa kinabuhi ug kabtangan sa uban. Morag imposible ba kana? Mao tingali kanay imong gihunahuna, apan kining kahibulongang kauswagan mao gayod ang gisaad sa Bibliya. Nganong dili nimo susihon kon unsay gitagna sa Kasulatan mahitungod sa krimen ug ubang kadaotan dinhi sa yuta?

Diha sa basahon sa Mga Salmo, atong mabasa: “Ayaw pagpanginit tungod sa mga mamumuhat ug daotan. Ayaw pagkasina sa mga nagabuhat ug dili-matarong. Kay sa madali mangalaya sila sama sa balili, ug sama sa lunhaw nga balili mangahanaw sila. Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.” (Salmo 37:1, 2, 11) Wala gayoy makapugong sa Diyos sa pagtuman niining saara ug sa tanan niyang uban pang makapadasig nga mga saad.

Ang iyang Gingharian mao ang gamiton sa Diyos sa pagpahinabo niining maong mga panalangin. Diha sa Pag-ampo sa Ginoo, gitudloan ni Jesu-Kristo ang iyang mga sumusunod sa pag-ampo nga moabot ang maong Gingharian ug matuman ang kabubut-on sa Diyos “maingon sa langit, mao man usab sa yuta.” (Mateo 6:9, 10) Sa dili madugay, ilalom sa maong Gingharian, walay mausa dinhi sa yuta ang matukmod sa paghimog krimen tungod sa kakabos, pagdaogdaog, o kahakog. Hinunoa, ang Pulong sa Diyos nag-ingon: “Aduna unyay dagayang lugas sa ibabaw sa yuta; sa tumoy sa kabukiran adunay pagsugwak.” (Salmo 72:16) Gani, si Jehova nga Diyos magtagana alang sa tanan dinhi sa yuta ug walay kinutobang suplay sa maayong mga butang. Labing hinungdanon, ang tawhanong katilingban mapalihok sa gugma alang sa Diyos ug sa silingan, ug ang kalibotan dili na gayod pagatugawon pa sa krimen.