KINI ang usa sa kinagamyang nasod sa kalibotan, nga nahimutang sa Alps nga natung-an sa Switzerland ug Austria. Sa dugay nang katuigan, ang mga Celt, Rhaetian, Romano, ug Alemanni nanimuyo niining dapita. Karon, mga 65 porsiyento sa populasyon sa Liechtenstein maoy kaliwat sa tribo nga Alemanni, nga nanimuyo niining dapita mga 1,500 ka tuig kanhi.

German ang opisyal nga pinulongan sa Liechtenstein, pero ang matag baryo dunay kaugalingong diyalekto. Duha ka tradisyonal nga pagkaon sa Liechtenstein maoy Tüarka-Rebel, kinaham nga pagkaon nga gama sa binlod sa mais, ug Käsknöpfle, pasta nga daghag keso.

Samtang nagbiyahe, ang mga turista malingaw sa pagtan-aw ug mga bukid nga naputos sa snow, lunhawng kawalogan, kaparasan, ug lainlaing tanom. Pananglitan, niining bukiron nga gamayng nasod makita ang halos 50 ka matang sa ihalas nga orkid. Sa Liechtenstein may mga museyo usab, teatro, ug himoanag bino. Busa, ting-init man o tingtugnaw, ang mga turista manganhi niining dapita.

 Sukad pa sa 1920, aktibo na ang mga Saksi ni Jehova sa Liechtenstein. Niini nga nasod, duolan sa 90 kanila ang nanudlo karon sa mensahe sa Bibliya sa mga residente ug mga turista.