ANG Diyos nagpasidaan sa iyang mga alagad nga makasinati silag mga pagsulay sa pagtuo. Ang iyang Pulong nag-ingon: “Magmabinantayon. Ang inyong kaaway, ang Yawa, nagasuroysuroy sama sa usa ka leyon nga nagangulob, nga nagapangitag matukob.” (1 Pedro 5:8) Sa unsang paagi si Satanas mosulay sa pagbungkag sa imong pagtuo?

Mahimong gamiton ni Satanas ang ubang tawo, bisan ang imong mga minahal, sa pagpit-os kanimo aron dili ka magtuon sa Balaang Kasulatan. Bahin niini, si Jesus mitagna: “Ang mga kaaway sa usa ka tawo mao unya ang mga tawo sa iyang kaugalingong panimalay.” (Mateo 10:36) Ang maayog-tuyo nga mga membro sa pamilya o higala mahimong wala mahibalo sa talagsaong mga kamatuoran nga anaa sa Pulong sa Diyos. O basin mahadlok sila kon unsay hunahunaon sa uban. Apan, ang Kasulatan nag-ingon: “Ang pagpangurog tungod sa mga tawo nagadala ug usa ka lit-ag, apan siya nga nagasalig kang Jehova pagapanalipdan.” (Proverbio 29:25) Kon mohunong ka sa pagtuon sa Kasulatan aron pahimut-an ang mga tawo, makapahimuot ba kana sa Diyos? Dili gayod! Sa laing bahin, kon kita magpakitag tinuod nga pagtuo, ang Diyos motabang kanato. “Dili kita ang matang nga mosibog ngadto sa kalaglagan, kondili ang matang nga adunay pagtuo ngadto sa pagtipig nga buhi sa kalag.”—Hebreohanon 10:39.

Hinumdomi ang kasinatian ni Dumas nga gihisgotan sa seksiyon 3. Sa sinugdan, gibugalbugalan siya sa iyang asawa tungod sa iyang pagtuo. Apan sa ulahi, ang iyang asawa miduyog kaniya sa pagtuon sa Pulong sa Diyos. Sa susama, kon mopadayon ka pagbuhat kon unsay husto, basin madani nimo ang imong mga higala ug mga minahal sa pagtuon usab. Sa daghang kahimtang, ang dili-magtutuong membro sa pamilya ‘nakabig nga walay pulong pinaagi sa maputling panggawi’ ug “halawom nga pagtahod” sa usa nga nagpakitag tinuod nga pagtuo.—1 Pedro 3:1, 2.

Naningkamot usab si Satanas sa pagpahunahuna sa mga tawo nga sila puliki kaayo, nga sila walay panahon sa pagtuon sa Kasulatan. Gusto niya nga ang mga problema sa kinabuhi—personal ug pinansiyal nga mga kabalaka—“motuok sa pulong [sa Diyos]” aron ang imong pagtuo “dili mamunga.” (Marcos 4:19) Isalikway ang maong mubo nga panglantaw! Ang Kasulatan nag-ingon: “Kini nagkahulogan ug kinabuhing walay kataposan,  ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Oo, ang padayong pagkat-on bahin sa Diyos ug kang Jesus, ang Mesiyas, hinungdanon gayod aron makabatog kinabuhing walay kataposan sa Paraiso!

Hunahunaa si Moises, nga usa ka membro sa harianong pamilya sa Ehipto. Makapangab-ot pa unta siyag dakong bahandi, kabantog, ug gahom. Apan, gipili ni Moises nga “daogdaogon uban sa katawhan sa Diyos inay magpahimulos sa umalaging kalipay sa pagpakasala.” Ngano? “Siya nagpabiling lig-on nga daw nakakita sa Usa nga dili-makita.” (Hebreohanon 11:24, 25, 27) Oo, lig-on ang pagtuo ni Moises sa Diyos. Iyang giuna ang intereses sa Diyos kay sa iyang kaugalingong kaayohan, ug natagamtam niya ang daghang panalangin sa Diyos. Kon imo kanang himoon, panalanginan ka usab sa Diyos.

Si Satanas mahimong mosulay sa paglit-ag kanimo sa lainlaing paagi. Apan dili ka angayng magpabiktima. Ang Pulong sa Diyos nag-awhag kanato: “Sukli ang Yawa, ug siya mokalagiw gikan kaninyo.” (Santiago 4:7) Sa unsang paagi makasukol ka kaniya?

Padayong tun-i ang Balaang Kasulatan. Basaha ang Pulong sa Diyos matag adlaw. Tun-i ang mga pagtulon-an niini. Ipadapat ang mga tambag niini. Sa pagbuhat niini, imong mabatonan ang “kompletong armadura sa Diyos,” nga makatabang nimo sa pagsukol sa mga pag-atake ni Satanas.—Efeso 6:13.

Pakig-uban sa mga tawong may tinuod nga pagtuo. Pangitaa ang mga tawong nagbasa, nagtuon, ug nagpadapat sa Balaang Kasulatan. Sila ‘mahunahunaon sa usag usa aron sa pagdasig ngadto sa paghigugma ug sa maayong mga buhat, nga nagdinasigay sa usag usa.’ Sila motabang kanimo aron modako ang imong pagtuo.—Hebreohanon 10:24, 25.

Pakigsuod kang Jehova. Pag-ampo alang sa tabang sa Diyos, ug salig kaniya. Ayaw gayod kalimti nga ang Diyos gustong motabang kanimo. “Itugyan [sa Diyos] ang tanan ninyong mga kabalaka, kay siya may kahingawa kaninyo.” (1 Pedro 5:6, 7) “Ang Diyos kasaligan, ug dili niya itugot nga tentalon kamo nga labaw sa inyong maantos, apan uban sa tentasyon siya usab magtaganag kalingkawasan aron kamo makahimo sa pag-antos niini.”—1 Corinto 10:13.

Si Satanas nagtamay sa Diyos, nga nag-ingon nga walay magpadayon sa pag-alagad Kaniya kon ang usa mag-antos. Apan ikaw may kahigayonan nga pamatud-ang bakakon si Satanas! “Magmaalamon,” nag-ingon ang Diyos, “ug lipaya ang akong kasingkasing, aron matubag ko siya nga nagatamay kanako.” (Proverbio 27:11) Oo, magmadeterminado sa pagpakita nga ikaw may tinuod nga pagtuo!