Kapitulo 33

Nganong Angayng Likayan ang Pornograpiya?

Unsa ka subsob ka makakitag pornograpiya nga wala tuyoa?

□ Wala pa sukad

□ Panagsa

□ Kanunay

Diin kini sagad makita?

□ Internet

□ Eskuylahan

□ TV

□ Uban pa

Unsay imong gihimo?

□ Milingiw dayon.

□ Nangusyoso makadiyot.

□ Nagpadayon pagtan-aw niini ug nangita pag lain.

 SA BATA pa ang imong ginikanan wala kaayoy pornograpiya. Karon, daghan na kaayo kini bisag asa ka pa molingi. Usa ka 19-anyos nga dalaga miingon: “Usahay kon mag-Internet ko aron magtan-aw-tan-aw, mamalit, o magsusi sa akong deposito sa bangko, mokalit lag butho ang bastos nga mga hulagway!” Komon na kini. Sa usa ka panukiduki, 90 porsiyento sa mga batan-on nga nag-edad ug 8 hangtod 16 miingon nga sila nakakitag pornograpiya sa Internet nga wala tuyoa​—kasagaran samtang naghimog homwork!

Sanglit daghan kaayo ang motan-aw ug pornograpiya, tingali mangutana ka, ‘Makadaot ba gayod kini?’ Oo, makadaot kini! Ang pornograpiya makapaubos sa pagkatawo sa naghimo ug sa nagtan-aw niini, ug makaimpluwensiya sa usa sa pagpakighilawas. Apan duna pay laing kadaot nga ipahinabo niini.

Ang pagtan-awg pornograpiya makaadik, nga dunay dugay ug makadaot nga mga epekto. Pananglitan, si Jeff kinsa 14 ka tuig nang mihunong pagtan-aw niini miadmitir: “Adlaw-adlaw akong nakigbisog niini. Ganahan gihapon akong motan-aw niini, apan dili na kaayo sama kaniadto. Ug gusto gihapon akong mangusyoso. Ang mga hulagway nga akong nakita mobutho gihapon sa akong hunahuna. Naunsa ba ko nga nakahimo man ko niining mangil-ad nga buhat. Sa primero, abi nakog dili kini makadaot. Apan nasayop ako. Ang pornograpiya makadaot. Kini makapaubos sa pagkatawo sa tanang hingtungdan. Bisag unsa pay isulti sa mga tigpaluyo niini, ang pornograpiya mangil-ad gayod.”

Analisaha ang Situwasyon

Sa unsang paagi makalikay ka sa wala tuyoa nga pagkakitag pornograpiya? Una, analisaha ang situwasyon. Sa unsang paagi nakakita ka niini? Tagda kini nga mga pananglitan:

 Gipadad-an ka ba sa uban nimong mga eskolmet ug pornograpikong larawan o mensahe diha sa e-mail o sa cell phone? Kon nahibalo ka nga mao kini ang ilang ginahimo, ayaw na lang kinig buksi ug mas maayong imo kining tangtangon.

Kon mag-Internet ka, mogula bag kalit sa eskrin ang mga mensahe o larawan dihang magtayp kag partikular nga mga pulong samtang nanukiduki? Nan, magmaespesipiko sa paggamit ug mga pulong nga itayp diha sa kompiyuter.

Isulat ang ubang mga sirkumstansiya sa imong pagkakitag pornograpiya.

․․․․․

Isulat kon unsay imong planong himoon aron mamenosan o aron dili ka makakitag pornograpiya nga wala tuyoa.

․․․․․

Kon Naadik Ka Na

Lahi nang makakita kag pornograpiya nga wala tuyoa kay sa motuyo ka pagtan-aw niini. Komosta kon adik ka na? Lisod kaayo kining sugpoon. Aniay ilustrasyon: Ingnon ta nga ang imong mga kamot gibaligtosan ug usa ka buok hilo. Dili ka maglisod sa pagbugto sa hilo. Apan komosta kon daghang hilo ang gibaligtos diha sa imong mga kamot? Lisod kining  bugtoon. Ingon usab niini ang mga tawong naadik sa pagtan-awg pornograpiya. Kon magsige silag tan-aw niini, mosamot sila ug pagkaadik. Kon ingon ka niini, sa unsang paagi imo kining masugpo?

Sabta kon unsa gayod ang pornograpiya. Ang pornograpiya maoy paagi ni Satanas sa paghimo nga malaw-ay sa usa ka butang nga gihimo ni Jehova nga dungganon. Kon ingon niini ang imong pagsabot sa pornograpiya, imo gayong ‘dumtan ang daotan.’​—Salmo 97:10.

Hunahunaa ang mga epekto. Ang pornograpiya makabungkag ug kaminyoon. Kini makadaot sa dungog sa mga babaye ug lalaki nga gilarawan diha niana. Kini makapaubos sa pagkatawo niadtong motan-aw niini. Busa may maayong katarongan ang Bibliya sa pag-ingon:  “Maalamon ang tawo nga nakakita sa katalagman ug nagtago sa iyang kaugalingon.” (Proverbio 22:3) Isulat sa ubos ang usa ka pananglitan sa kadaot nga mahitabo kanimo kon magsige kag tan-aw ug pornograpiya.

․․․․․

Panaad. “Ako mihimog pakigsaad nga dili gayod ako motan-aw nga maibogon sa usa ka dalaga,” miingon ang matinumanong si Job. (Job 31:1, Today’s English Version) Aniay pipila ka sugyot nga mahimo nimong ‘ipanaad’:

Dili ako mag-Internet kon mag-inusara ako sa kuwarto.

Isira dayon nako ang Web site o ang bastos nga hulagway nga mokalit lag tungha.

Magpatambag ako sa usa ka hamtong nga higala kon makatan-aw na pod akog pornograpiya.

May mahunahunaan ka bang mga panaad nga makatabang kanimo aron imong masugpo ang pagtan-awg pornograpiya? Kon mao, isulat kini.

․․․․․

Iampo kini. Ang salmista miampo kang Jehova: “Ilikay ang akong mga mata gikan sa pagtan-aw sa butang nga  walay-pulos.” (Salmo 119:37) Buot ni Jehova nga Diyos nga molampos ka, ug siya makahatag kanimo ug kusog aron makabuhat kag maayo!​—Filipos 4:13.

Ipakigsulti kini. Ang usa ka higala nga imong kasuginlan sa imong problema makatabang usab sa pagsumpo sa batasan sa pagtan-awg pornograpiya. (Proverbio 17:17) Isulat ang ngalan sa hamtong nga tawo nga sa imong pamati imong kasuginlan sa problema.

․․․․․

Makasalig ka nga molampos ka sa imong pagpaningkamot sa pagsugpo niini nga batasan. Sa pagkatinuod, usa gayod ka dakong kadaogan matag higayon nga dili ka magpatental sa pagtan-aw niini. Isugid kang Jehova ang maong kadaogan, ug pasalamati siya sa kusog nga iyang gihatag kanimo. Hinumdomi nga sa imong paglikay sa pornograpiya, ikaw nakapalipay sa kasingkasing ni Jehova!​—Proverbio 27:11.

TEKSTO

“Busa, patya ang inyong mga sangkap sa lawas nga anaa sa yuta maylabot sa pakighilawas, kahugawan, seksuwal nga gana, makadaot nga tinguha, ug hakog nga pangibog, nga maoy idolatriya.”​—Colosas 3:5.

SUGYOT

Paneguroa nga ang imong kompiyuter giprograma nga dili makabukas ug pornograpikong mga Web-site. Ayaw usab tan-awa ang mga link diha sa e-mail sa mga tawong dili nimo kaila.

NAHIBALO KA BA . . . ?

Ang pagkahilig ug pornograpiya kaamgid sa mangil-ad nga kailibgon sa daotang mga manulonda sa panahon ni Noe.​—Genesis 6:2.

ANG AKONG PLANONG HIMOON!

Kini ang akong himoon aron dili ako maladlad sa pornograpiya ․․․․․

Kon unsay akong gustong ipangutana sa akong ginikanan bahin niini ․․․․․

UNSAY IMONG HUNAHUNA?

● Sa unsang paagi gihimong malaw-ay sa pornograpiya ang usa ka butang nga dungganon?

● Unsaon nimo pagtabang sa imong manghod nga naanad sa pagtan-awg pornograpiya?

[Blurb sa panid 278]

“Sa wala pa ko magtuon ug Bibliya, nakasulay ako sa halos tanang gidungog nga droga. Apan sa akong pagkaadik, ang kinalisdan sa tanan nga sugpoon mao ang pornograpiya. Nabuntog nako kini nga problema pinaagi lamang sa tabang ni Jehova.”​—Jeff

[Hulagway sa panid 276]

Ang epekto sa pornograpiya diha sa usa ka tawo mosamot matag higayong motan-aw siya niini, ug maglisod na hinuon siya sa pagsugpo niini