Sa Dihang ang Yuta Mapuno sa Kahibalo sa Diyos
Kapitulo 19
Sa Dihang ang Yuta Mapuno sa Kahibalo sa Diyos
1, 2. Sa unsang paagi ang lalang ni Jehova nadaot?
PANANGLIT bag-o lang gayod nahuman sa usa ka bantogang pintor ang usa ka nindot nga dibuho. May katarongan nga iya kining isipon nga nindot kaayo—usa ka obra maestra! Apan usa niana ka gabii gidaot kini sa usa ka masinahong kaindig. Masabot, kini nagpahinabog dakong kasakit sa pintor. Pagkadako sa iyang tinguha nga mabilanggo kadtong maong tampalasan! Ug mahanduraw nimo ang dakong pangandoy sa pintor nga mapasig-uli ang kanhing katahom sa iyang mugna.
2 Susama nianang maong pintor, si Jehova naglalang ug usa ka obra maestra sa pag-andam sa yuta ug pagbutang ug tawo ibabaw niana. Human lalanga ang lalaki ug babaye, gipahayag niya nga ang tanan niyang yutan-ong buhat “maayo kaayo.” (Genesis 1:31) Si Adan ug Eva mga anak mismo sa Diyos, ug gihigugma niya sila. Iyang gipanglantaw ang usa ka malipayon, mahimayaong kaugmaon alang kanila. Tinuod, giyudyod sila ni Satanas ngadto sa pag-alsa, apan ang kahibulongang lalang sa Diyos wala madaot sa paaging dili na matul-id.—Genesis 3:23, 24; 6:11, 12.
3. Unsa ang “tinuod nga kinabuhi”?
3 Gitino sa Diyos nga itul-id ang mga butang. Buot gayod niyang makita kita nga nagkinabuhi sumala sa iyang orihinal nga katuyoan. Ang hamubo ug masamok natong paglungtad dili mao ang “tinuod nga kinabuhi,” tungod kay kini halayo kaayo sa gituyo ni Jehova. Ang “tinuod nga kinabuhi” nga buot sa Diyos alang kanato maoy “kinabuhing walay kataposan” ubos sa hingpit nga mga kahimtang.—1 Timoteo 6:12, 19.
4, 5. (a) Sa unsang paagi ang paglaom sa Paraiso mamatuman? (b) Nganong kinahanglang hunahunaon nato ang atong paglaom sa umaabot?
4 Ang kahibalo sa Diyos magdalag tulubagon sa atubangan ni Jehova. (Santiago 4:17) Apan hunahunaa ang mga panalangin nga imong tagamtamon kon imong ipadapat ang maong kahibalo ug mangagpas alang sa kinabuhing walay kataposan. Sa iyang Pulong, ang Bibliya, gidibuho ni Jehova nga Diyos ang usa ka nindot nga hulagway sa kinabuhi unya sa Paraisong yuta nga haduol na kaayo. Natural, ingong katawhan ni Jehova wala kita mag-alagad sa Diyos tungod lamang kay nagtinguha sa ganti. Nag-alagad kita sa Diyos tungod kay gihigugma nato siya. (Marcos 12:29, 30) Dugang pa, dili nato mahagoan ang kinabuhi pinaagi sa pag-alagad kang Jehova. Ang kinabuhing walay kataposan maoy gasa sa Diyos. (Roma 6:23) Makaayo alang kanato nga mamalandong sa maong kinabuhi tungod kay ang paglaom sa Paraiso magpahinumdom kanato kon unsang matanga sa Diyos si Jehova—ang mahigugmaong “tigganti niadtong matinuorong nagapangita kaniya.” (Hebreohanon 11:6) Ang usa ka paglaom nga tin-aw kaayo sa atong mga hunahuna ug kasingkasing makapaarang kanato sa pag-agwanta sa mga kalisod sa kalibotan ni Satanas.—Jeremias 23:20.
5 Karon ibug-os nato ang atong pagtagad sa binase-sa-Bibliya nga paglaom sa kinabuhing walay kataposan sa umaabot yutan-ong Paraiso. Mahisama unya sa unsa ang kinabuhi sa dihang ang yuta mapuno sa kahibalo sa Diyos?
PAGKATAPOS SA ARMAGEDDON—USA KA PARAISONG YUTA
6. Unsa ang Armageddon, ug unsay kahulogan niini alang sa katawhan?
6 Ingon sa gipakita sa una, sa dili madugay laglagon ni Jehova nga Diyos ang presenteng daotang sistema sa mga butang. Ang kalibotan tulin nga nagapadulong sa gitawag sa Bibliya nga Har–Magedon, o Armageddon. Kanang pulonga makapahunahuna sa pipila ka tawo mahitungod sa nukleyar nga katalagman nga ipahinabo sa naggubatay nga mga nasod, apan ang Armageddon lahi kaayo niana. Ingon sa gipakita sa Pinadayag 16:14-16, ang Armageddon mao ang “gubat sa dakong adlaw sa Diyos nga Labing-Gamhanan.” Kini usa ka gubat nga maglangkit sa “mga hari sa tibuok pinuy-anang yuta,” o mga nasod. Ang Anak ni Jehova nga Diyos, ang tinudlong Hari, sa dili madugay makiggubat na. Ang sangpotanan tino gayod. Ang tanang supak sa Gingharian sa Diyos ug kadtong bahin sa daotang sistema ni Satanas pagalaglagon. Kadto lamang mga maunongon kang Jehova ang makalabang-buhi.—Pinadayag 7:9, 14; 19:11-21.
7. Diin unya si Satanas ug ang iyang mga demonyo sulod sa Usa ka Libo ka Tuig nga Pagmando ni Kristo, ug sa unsang paagi kini makahatag ug kaayohan sa katawhan?
7 Handurawa nga ikaw nakalabang-buhi nianang maong katalagman. Mahisama kaha sa unsa ang kinabuhi ibabaw sa yuta sa gisaad sa Diyos nga bag-ong kalibotan? (2 Pedro 3:13) Dili kita angayng managhap, tungod kay ang Bibliya nagtug-an kanato, ug makalilipay ang ginaingon niini. Nasayod kita nga si Satanas ug ang iyang mga demonyo dili na unya makalihok, nga mabilanggo sa kahiladman nga walay kalihokan sulod sa Usa ka Libo ka Tuig nga Pagmando ni Jesu-Kristo. Kadtong mga daotan, daotag-tuyo nga mga linalang dili na mag-ukoy sa luyo, nga maghulhog ug kasamok ug maningkamot sa pagdasig kanato sa mga buhat sa pagkadili-matinumanon batok sa Diyos. Pagkadakong kahupayan!—Pinadayag 20:1-3.
8, 9. Sa bag-ong kalibotan, unsay mahitabo sa mga kasakit, balatian, ug pagkatigulang?
8 Sa nahaigong panahon, ang tanang matang sa sakit mahanaw. (Isaias 33:24) Ang piang motindog, molakaw, modagan, ug mosayaw diha sa himsog, lig-ong mga bitiis. Human sa daghang tuig nga pagkinabuhing dili makadungog, ang mga bungol makadungog sa masadyaong mga tingog diha sa ilang palibot. Makatuaw sa kahingangha ang mga buta sa dihang ang nindot buloknong kalibotan maaninaw sa ilang mga mata. (Isaias 35:5, 6) Sa kataposan, makita na nila ang mga nawong sa ilang mga minahal! Malagmit nga nianang panahona magtambilagaw sa makadiyot ang ilang mga panan-aw tungod sa mga luha sa kalipay.
9 Hunahunaa lang! Wala nay mga antipara, wala nay mga kratsis ug mga sungkod, wala nay mga tambal, wala nay mga klinika sa dentista o mga ospital! Dili na gayod mahikawan sa kalipay ang mga tawo tungod sa emosyonal nga sakit ug depresyon. Walay yugto sa pagkabata ang daoton sa sakit. Ang mga kadaot sa pagkatigulang balihon. (Job 33:25) Kita mahimong mas himsog, mas kusgan. Matag buntag momata kita gikan sa usa ka makapabaskog nga pagkatulog sa gabii uban sa nabag-ong enerhiya, nga puno sa kalagsik ug kahinam sa usa ka bag-ong adlaw sa aktibong kinabuhi ug makapatagbaw nga buluhaton.
10. Unsang asaynment ang buhaton sa mga makalabang-buhi sa Armageddon?
10 Daghan unya ang makalilipayng buluhaton nga pagahimoon sa mga nakalabang-buhi sa Armageddon. Himoon nila ang yuta nga usa ka paraiso. Wagtangon ang bisan unsang nahibilin sa mahugaw nga karaang sistema. Motungha ang mga parke ug mga tanaman nga puli sa kanhing mga dapit sa mga barongbarong ug umaw nga yuta. Ang tanan makapahimulos sa hayahay, nindot nga puloy-anan. (Isaias 65:21) Sa pag-aginod sa panahon, ang paraisonhong mga bahin sa yuta modako ug magkasumpay hangtod makab-ot sa tibuok yuta ang sukdanan sa katahom nga kanhi gibutang sa Maglalalang didto sa tanaman sa Eden. Pagkadako unya sa kalipay nga makaapil nianang maong buluhaton sa pagpasig-uli!
11. Unsa unya ang umaabot nga relasyon sa katawhan uban sa kalikopan sa yuta ug sa kahayopan?
11 Kining tanan pagabuhaton ubos sa balaang giya aron nga ang palibot dili madaot. Magmakigdaiton ang mga tawo uban sa mga mananap. Inay sa patuyang nga pagpatay kanila, batonan pag-usab sa tawo ang responsableng pagkamagbalantay sa yuta, nga magaatiman ug maayo kanila. Handurawa ang mga lobo ug mga kordero, mga leyon ug mga nating baka, nga magkauban sa pagkaon—ug hingpit nga luwas ang binuhing mga mananap. Bisan ang usa ka gamayng bata dili mahadlok sa ihalas nga mga mananap, ni ang kalinaw sa bag-ong kalibotan pagasamokon sa mapintas, bagis nga mga tawo. (Isaias 11:6-8) Pagkamalinawon unya ang maong bag-ong kalibotan!
KATAWHAN NAUSAB
12. Sa unsang paagi ang Isaias 11:9 nagakatuman karon, ug sa unsang paagi kini matuman sa Paraiso?
12 Ang Isaias 11:9 nagatug-an kanato kon nganong walay mahimong kadaot sa tibuok yuta. Kini nag-ingon: “Ang yuta tino nga mapuno sa kahibalo ni Jehova ingon sa mga tubig nga nagatabon sa dagat.” Kini nagtumong sa mga tawo tungod kay ang mga mananap dili makabaton sa “kahibalo ni Jehova” ug makahimog mga kausaban, sanglit sila gigamhan sa kinaiyanhong lihok. Apan ang kahibalo sa atong Maglalalang sa pagkatinuod nagausab sa mga tawo. Walay duhaduha nga nakahimo ka nag pipila ka kausaban sa imong kaugalingon ingong resulta sa pagpadapat sa kahibalo sa Diyos diha sa imong kinabuhi. Minilyon ang nakahimo sa ingon. Busa, ang katumanan niining maong propesiya nagsugod na diha sa mga nag-alagad kang Jehova. Apan, nagpunting usab kini ngadto sa usa ka panahon sa dihang ang mga tawo sa tibuok kalibotan magawagtang sa bisan unsang mananapon o mapintasong mga taras ug magmalinawon hangtod sa hangtod.
13. Unsang edukasyonal nga programa ang mahitabo sa yuta?
13 Pagkakahibulongan unya sa dihang ang yuta mapuno sa kahibalo sa Diyos! Aduna unyay makaylapong edukasyonal nga programa ubos sa direksiyon sa Hari nga si Jesu-Kristo ug sa iyang 144,000 nga isigkamagmamando. Pagagamiton unya ang bag-ong “mga linukot.” Dayag nga kini maoy sinulat nga mga instruksiyon sa Diyos nga magsilbing pasikaranan sa pag-edukar sa mga molupyo sa yuta. (Pinadayag 20:12) Ang katawhan makakat-on, dili na sa gubat, kondili sa pakigdait. Ang tanang malaglagong mga hinagiban mawala na hangtod sa hangtod. (Salmo 46:9) Ang mga molupyo sa bag-ong kalibotan pagatudloan sa pagtratar sa ilang isigkatawo uban sa gugma, pagtahod, ug dignidad.
14. Sa unsang paagi ang kalibotan malahi sa dihang ang katawhan mahimong usa ka nahiusang pamilya?
14 Ang katawhan mahimo unyang usa ka nahiusang pamilya. Wala nay mga babag sa panaghiusa ug sa panag-igsoonay. (Salmo 133:1-3) Wala nay balay nga kinahanglang trangkahan aron dili makasulod ang mga kawatan. Maghari ang kalinaw sa matag kasingkasing, sa matag balay, sa tanang bahin sa yuta.—Miqueas 4:4.
ANG MALIPAYONG PAGKABANHAW
15. Unsang duha ka grupo ang pagabanhawon sa yuta?
15 Sulod nianang Milenyoha, mahitabo ang pagkabanhaw. Kadtong sa tinuyo nakasala batok sa balaang espiritu, o aktibong puwersa, sa Diyos pinaagi sa dili-mahinulsolong paglihok nga supak sa kapahayagan o direksiyon niini dili banhawon. (Mateo 23:15, 33; Hebreohanon 6:4-6) Siyempre, Diyos ang maghukom kon kinsay nakasala nianang paagiha. Apan duha ka tinong grupo ang pagabanhawon—‘ang mga matarong ug mga dili-matarong.’ (Buhat 24:15) Sanglit aduna unyay tukmang kahikayan, makataronganong ihinapos nga ang unang abiabihon sa pagkabanhaw sa yuta mao ang mga matarong, kadtong maunongong nag-alagad kang Jehova.—Hebreohanon 11:35-39.
16. (a) Kinsa ang maapil sa “mga matarong” nga pagabanhawon sa yuta? (b) Kinsang mga matinumanon sa karaang mga panahon ang ilabinang gusto nimong mahimamat, ug ngano?
16 Inay makadungog ug mga taho mahitungod sa mga gubat, mga katalagman, ug kamatayon, ang mga alagad ni Jehova makadawat ug kahibulongang mga taho mahitungod sa pagkabanhaw. Makalilipay nga masayran ang pagbalik sa matinumanong mga lalaki ug babaye sama kang Abel, Enoc, Noe, Abraham, Sara, Job, Moises, Rahab, Ruth, David, Elias, Ester. Pagkamakapaukyab nga kasaysayanhong mga hitabo ang ilang ipahayag samtang idetalye nila ang daghang asoy sa Bibliya! Walay duhaduha nga sila ug ang mga matarong nga namatay niining mas ulahing kapanahonan parehong ikag nga masayod bahin sa kalaglagan sa sistema ni Satanas ug kon giunsa pagbalaan ni Jehova ang iyang balaang ngalan ug pagbindikar ang iyang pagkasoberano.
17. Unsang tabang ang ihatag sa mga matinumanon ngadto sa uban nga banhawon?
17 Dako ang ikatabang niining maong mga matinumanon sulod sa sunod nga hugna sa pagkabanhaw, sa dihang binilyon sa “dili-matarong” pagabuhian gikan sa mga talikala sa kamatayon! Kadaghanan sa katawhan wala gayoy kahigayonan nga makaila kang Jehova. Si Satanas ‘nagbuta sa ilang mga hunahuna.’ (2 Corinto 4:4) Apan ang mga buhat sa Yawa pagabadbaron. Ang dili-matarong mahibalik sa usa ka nindot ug malinawong yuta. Sila pagaabiabihon sa organisado kaayong katawhan aron tudloan sila mahitungod kang Jehova ug sa iyang nagamandong Anak, si Jesu-Kristo. Sa dihang ang binilyong gibanhaw makaila ug maghigugma sa ilang Maglalalang, ang yuta mapuno sa kahibalo mahitungod kang Jehova sa paaging walay ikatandi.
18. Sa imong hunahuna unsa kahay imong bation sa dihang magaabiabi sa gibanhawng mga minahal?
18 Pagkadakong kalipay ang dad-on sa pagkabanhaw diha sa atong mga kasingkasing! Kinsa ang wala mag-antos gumikan sa atong kaaway nga kamatayon? Sa pagkatinuod, kinsa ang wala mobati sa tumang kaguol sa dihang ang bugkos sa gugma o panaghigala nabungkag sa dihang ang sakit, pagkatigulang, aksidente, o kapintasan mihunos sa kinabuhi sa usa nga minahal? Nan, hunahunaa ang kalipay sa pagkitaay pag-usab sa Paraiso. Ang mga inahan ug mga amahan, mga anak lalaki ug mga anak babaye, mga higala ug mga paryente, maghalogay sa usag usa, nga mangatawa ug manghilak tungod sa kalipay.
SA KATAPOSAN KAHINGPITAN!
19. Unsang milagro ang mahitabo sa panahon sa Milenyo?
19 Latas sa Milenyo, mahitabo ang usa ka kahibulongang milagro. Alang sa katawhan, malagmit mao kini ang labing makalilipayng bahin sa Usa ka Libo ka Tuig nga Pagmando ni Kristo. Palihokon ni Jehova ang iyang Anak nga ipadapat ang mga benepisyo sa halad lukat sa matag matinumanon ug masinugtanong lalaki ug babaye. Pinaagi niana, ang tanang sala pagatangtangon ug ang katawhan pauswagon ngadto sa kahingpitan.—1 Juan 2:2; Pinadayag 21:1-4.
20. (a) Unsay ipasabot sa pagkahimong hingpit? (b) Kanus-a nga ang mga makalabang-buhi sa Armageddon ug ang mga gibanhaw magsugod sa pagkinabuhi diha sa bug-os nga kahulogan niini?
20 Kahingpitan! Unsay ipasabot niini? Magkahulogan kini sa pagbalik ngadto sa kinabuhi sa paagi nga gitagamtam kanhi ni Adan ug Eva sa wala pa sila makasala batok kang Jehova nga Diyos. Sa pisikal, mental, emosyonal, moral, ug espirituwal nga paagi—sa tanang paagi nga mahunahunaan—makab-ot sa bug-os sa hingpit nga mga tawo ang mga sukdanan sa Diyos. Apan nianang panahona ang tanang tawo ba managsama? Dili gayod! Ang mga lalang ni Jehova—kakahoyan, kabulakan, kahayopan—tanan nagtudlo kanato nga nahigugma siya sa kadaiyahan. Ang hingpit nga mga tawo magbaton unya ug lainlaing mga personalidad ug mga katakos. Ang matag usa malipay sa kinabuhi sumala sa gituyo sa Diyos. Ang Pinadayag 20:5 nagaingon: “Ang uban sa mga patay wala modangat sa kinabuhi hangtod nga ang usa ka libo ka tuig matapos.” Susama sa dakong panon sa mga nakalabang-buhi sa Armageddon, ang mga gibanhaw mabuhi sa bug-os sa dihang ilang makab-ot ang walay-sala nga kahingpitan.
21. (a) Unsay mahitabo pagkatapos sa Usa ka Libo ka Tuig nga Pagmando ni Kristo? (b) Sa kataposan unsay mahitabo kang Satanas ug sa tanan nga dapig kaniya?
21 Moatubang ang hingpit nga katawhan sa usa ka kataposang pagsulay. Pagkahuman sa Milenyo, buhian sa makadiyot si Satanas ug ang iyang mga demonyo gikan sa kahiladman ug tugotan sa paghimog pangataposang paningkamot aron ipalayo ang mga tawo gikan kang Jehova. Unahon sa pipila ang daotang mga tinguha kay sa gugma sa Diyos, apan kining maong pag-alsa pagaputlon. Laglagon ni Jehova kining mga hakog uban kang Satanas ug sa tanan niyang mga demonyo. Unya ang tanang mamumuhat ug kalapasan mahanaw na sa walay kataposan.—Pinadayag 20:7-10.
UNSAY IMONG BUHATON?
22. Unsay imong gipanglantaw nga buhaton sa Paraiso?
22 Ang panahong walay kataposan molungtad alang niadtong mga nahigugma kang Jehova nga Diyos ug magpuyo sa Paraisong yuta. Dili nato mahanduraw ang ilang kalipay, ug mahimo usab nga makigbahin ka niini. Ang musika, arte, kahanas—aw, malabwan sa mga kalamposan sa hingpit nga mga tawo ang mga obra maestra sa mga tawong batid sa daang kalibotan! Kon buot sabton, ang mga tawo unya hingpit na ug walay kinutoban ang ilang panahon. Handurawa kon unsay mahimo nimo ingong usa ka hingpit nga tawo. Hunahunaa, usab, ang makat-onan nimo ug sa mga isigkatawo bahin sa mga lalang ni Jehova—gikan sa binilyong galaksiya latas sa uniberso ngadto sa kinagamyang sub-atomikong mga partikulo. Ang tanang butang nga malampos sa katawhan makadugang sa kalipay sa kasingkasing sa atong mahigugmaong langitnong Amahan, si Jehova.—Salmo 150:1-6.
23. Nganong ang kinabuhi sa Paraiso dili gayod mahimong puol?
23 Dili puol ang kinabuhi nianang panahona. Mahimo pa kining labaw ug labaw nga makaiikag sa dagan sa panahon. Abi nimo, walay kataposan ang kahibalo sa Diyos. (Roma 11:33) Sa panahong walay kataposan, sa kanunay adunay daghan nga makat-onan ug bag-ong mga natad nga pagasuhiron. (Ecclesiastes 3:11) Ug samtang padayon ka nga mokat-on bahin kang Jehova nga Diyos, magpadayon ka sa pagkinabuhi—dili lamang sa pipila ka tuig kondili sa walay kataposan!—Salmo 22:26.
24, 25. Nganong angay kang magkinabuhi karon nga kaharmoniya sa kahibalo sa Diyos?
24 Ang malipayong kaugmaon sa usa ka paraisong yuta dili ba takos sa bisan unsang paningkamot o sakripisyo nga imong himoon? Siyempre takos kini! Aw, si Jehova nagatanyag kanimo sa yawi alang nianang maong manindot nga kaugmaon. Kanang maong yawi mao ang kahibalo sa Diyos. Imo ba kanang gamiton?
25 Kon gihigugma nimo si Jehova, makakaplag ka ug kalipay sa pagbuhat sa iyang kabubut-on. (1 Juan 5:3) Samtang gisubay nimo kanang maong dalan, pagkadaghang panalangin ang imong masinatian! Kon ipadapat nimo ang kahibalo sa Diyos, makadala kini kanimo ug mas malipayong kinabuhi bisan niining masamok nga kalibotan. Ug ang mga ganti sa umaabot maoy hilabihan, tungod kay kini mao ang kahibalo nga motultol sa kinabuhing walay kataposan! Karon na ang paborableng panahon nga ikaw molihok. Magmadeterminado sa pagkinabuhi nga kaharmoniya sa kahibalo sa Diyos. Ipasundayag ang imong gugma alang kang Jehova. Pasidunggi ang iyang balaang ngalan ug pamatud-i si Satanas nga bakakon. Sa baylo, si Jehova nga Diyos, ang Tinubdan sa matuod nga kaalam ug kahibalo, malipay kanimo diha sa iyang dako ug mahigugmaong kasingkasing. (Jeremias 31:3; Sofonias 3:17) Ug siya mahigugma kanimo sa walay kataposan!
TAKSA ANG IMONG KAHIBALO
Unsa ang “tinuod nga kinabuhi”?
Pagkatapos sa Armageddon, unsay mahitabo sa yuta?
Kinsa ang pagabanhawon sa yuta?
Sa unsang paagi ang katawhan mahimong hingpit ug sa kataposan pagasulayan?
Unsay imong paglaom may kalabotan sa Paraiso?
[Mga Pangutana sa Pagtuon]
[Hulagway sa panid 188, 189]
Naglaom ka ba nga mopuyo sa Paraiso, sa dihang ang yuta mapuno sa kahibalo sa Diyos?
