BAG-O pa lang kong nabawtismohan dihang gipangutana ko sa mga ansiyano kon gusto ba kong moboluntaryo sa ubang lugar. Pagka-Mayo 4, 1992, mitambong ko sa espesyal nga miting para niadtong andam moboluntaryo sa lugar nga mas dakog panginahanglan. Pagkaugma, ako ug ang akong partner sa pagsangyaw mibalhin sa pantalan sa Batumi, didto sa Ajaria.

Sa una nakong pagsangyaw sa Batumi, gikulbaan kaayo ko. Nagsige kog hunahuna, ‘Unsaon nako pagpakig-estorya sa mga tawo?’ Nakurat ko sa reaksiyon sa babaye nga una nakong nakaestorya, kay siya miingon, “Nganong karon pa man ka?” Interesado kaayo siya sa mga Saksi, maong nagpa-Bible study dayon siya pagkaugma!

Sa wala pa mi moadto sa Batumi, gihatagan mig listahan sa adres sa mga interesado. Kay dili man mi suheto sa siyudad, nangutana mi sa mga tawo aron makatultol. Daghan  ang nalisdan sa pagtabang namo kay lahi na ang mga ngalan sa kalye, pero ganahan silang maminaw sa among mensahe. Wala madugay, naghimo mig ginurupong pagtuon sa Bibliya, nga dunay 10 hangtod sa 15 ka membro.

Upat pa lang ka bulan sukad sa among pag-abot, kapig 40 na ang regular nga tigtambongan sa among mga tigom. Nakahunahuna mi, ‘Kinsa may mag-atiman aning mga bag-ohan?’ Dayon, kay ang mga sundalo sa Georgia nakiggiyera sa mga rebelde sa Abkhazia, ang tanang membro sa kanhi nakong kongregasyon mibalhin sa Batumi. Sa usa lang ka adlaw, naporma ang bag-ong kongregasyon nga dunay eksperyensiyadong mga ansiyano ug mga payunir!