Niadtong Oktubre 12, 2024, gidedikar sa mga Saksi ni Jehova sa Uganda ang tulo ka bag-ong Assembly Hall. Kining tulo gitukod sa sulod sa mga refugee camp sa lainlaing bahin sa nasod. Kini nga mga pasilidad maoy bahin sa programa sa pagtukod ug gipasimpleng mga Assembly Hall, nga nagsugod niadtong 2018. Napaposible niini nga programa ang paspas nga pagtukod ug mga Assembly Hall diha sa hilit nga mga lugar nga dili ra kaayo dakog gasto. (2 Corinto 8:13-15) Linibo ka igsoon sa tibuok Africa ang nakabenepisyo niini nga kahikayan. Halos 100 ka gipasimpleng Assembly Hall ang mahuman sa kataposan sa 2024, ug naa pay 30 nga giplanong tukoron sa 2025.

Ang disenyo sa gipasimpleng mga Assembly Hall puwedeng i-adjust sumala sa lokal nga kahimtang ug panginahanglan. Pananglitan, ang ubang lokasyon naay usa ra ka tent nga maensakto ang 650 ka tawo, samtang ang uban naay daghang tent nga maensakto ang mga 2,000 ka tawo. Kini nga mga pasilidad magsilbing proteksiyon gikan sa init ug ulan ug naay audio ug video equipment, bawtismohanan, ug stage. Usa ka brader gikan sa Uganda ang nahinumdom: “Sa una, sa gawas ra mi magtigom, mao nga kon mag-ulan, mangabasa gyod mi. Usahay kusog kaayo ang ulan nga mapugos mig hawa aron mangitag kasilongan ug dili na namo mapaminawan ang ubang bahin sa programa. Pero karon, makapokus na mi ug makabenepisyo pag-ayo sa tibuok programa. Nagpasalamat mi kang Jehova kay iya ming gipanalanginan niining nindot kaayo nga Assembly Hall!”

Usa ka brader sa Angola ang naghisgot sa dugang benepisyo sa kahikayan sa gipasimpleng Assembly Hall: “Sa una, pila ka adlaw ming magtukod ug temporaryong estruktura kada asembliya ug kombensiyon. Sagad, gikapoy na mi pag-ayo bisag wala pa gani magsugod ang programa. Karon, makapokus na mi sa akong pamilya sa espirituwal nga programa ug sa pagpakig-uban sa mga igsoon.”

Nagkadako ang panginahanglan sa mga Assembly Hall sa daghang lugar, ug kapig 100 pa ang gikinahanglan sa Africa. Ang samang mga pasilidad gikinahanglan pod sa ubang bahin sa Central ug South America. Busa importante kaayo niini nga kahikayan ang pagbansay ug daghang lokal nga boluntaryo nga makakat-on ug bag-ong mga skill ug motabang sa pagtukod niini nga mga pasilidad. Si Brader Ben Pritchard, membro sa Komite sa Sangang Buhatan sa West Africa, miingon: “Kadaghanan sa mga igsoon dili panday. Pero andam kaayo silang mokat-on ug mga skill nga gikinahanglan sa pagplano ug pagtukod niining importante kaayong mga pasilidad. Sumala sa giingon sa Filipos 4:13, gihatagan silag kusog ni Jehova aron mapalampos ni nga buluhaton.”

Nalipay gyod ta sa napalampos sa kahikayan sa pagtukod ug gipasimpleng mga Assembly Hall. Samtang nagkadako ang panginahanglan sa maong mga pasilidad, masaligon ta nga ‘palig-onon’ ni Jehova ang mga igsoon aron magmalamposon ni nga kahikayan.—Filipos 2:13.