Yésus a te bañete beyé’é benyin, Pierre, André, Jacques a Jean, na be bo beyobe bôt. Éyoñe ji, e môse Sabbat, bese ba ke nda Zambe ya Capernaoum. Yésus a ye’ele nda Zambe, a bôte be ne fe’e ne vema amu atyeñe ñye’elane dé. A selan a bescribe amu a ye’ele ane môt a bili ngule ya bo de.

E môse Sabbat wu, môt éziñ a ne valé a bili mbia nsisim. Nde nda Zambe été, môt ate a yôtane tyiñe yôp a jô’ô na: “A Yésus ya Nazareth, bia wo bi ne za ajô? Ye ô zuya jiane bia? Me ayeme wo, ô ne Mbamba Môte ya Zambe.” Ane Yésus a bame mbia nsisim a ne nyôle môt été a jô’ô na: “Tabe’ évô, ô kôlô be nye.”​—Marc 1:24, 25.

Ane mbia nsisim a sô’ôlô môt ate si, ve fô’ô nye mbia mfô’an, ane a kôlô nye nyôl a tate’e étua ngule ntatan. Ve mbia nsisim ate a kôlô be môt ate “te ke bo nye jam e ne abé.” (Luc 4:35) Bôte bese ba bômane nye be ne nda Zambe valé ba semé beta nseman! Nde ba sili bebiene na: “Za ajô di?  . . . A jôô a njôane wé ja’ane mimbia minsisim, mi ve wô’ô nye.” (Marc 1:27) Bi ne wô’ô amu jé foé éte é ne avôle ya yametan si se ya Galilée.

Éyoñe be kôlôya nda Zambe, Yésus a beyé’é bé ba ke nda Simon, nnye ba loene fe na Pierre. Valé, ba koone ntyi Pierre a konô’ô nyôl ayôñ beta nkonan. Nde ba ye’elane Yésus na a volô nye. Yésus ve bi nye wo a volô nye na a tebe. Éyoñ éte ébien a beta bo mvo’é a taté fe na a saane Yésus a beyé’é bé, éko éziñ a ñyamane bone bidi.

Éyoñe jôp da dim, abui bôte da sulane nda Pierre a minkôkone miap. Avôl avôl a nto ve ane tison ése é maneya sulane mbé si. Amu jé? Ba jeñe mvolan. Ane ‘bôte bese be bili minkôkon mia kon akon mevale meva, ba zu mie vôm a to; ane a beté mie mise mo, a saé mie.’ (Luc 4:40) E ne fo’o été na, ja’a bôte be bili aval akon avé, Yésus a volô be fo’o v’ane nkulan ajô ô nga jô. (Ésaïe 53:4) A vaa fe mimbia minsisime bôte be bili nyôl. Nté mimbia minsisime mia kui nyôle bôt, mia yôtan a jô na: “Ô ne Mone Zambe.” (Luc 4:41) Ve Yésus a bame mie, teke ve mie ngule ya na mi ke ôsu a kobô. Mimbia minsisim mia yeme na Yésus a ne Krist, a a nji yi na é yené ve ane mia kañe nya Zambe.