ÑYE’ELANE YA BIBLE: “Teke môse môt a nga vini nyôle jé émien. Ve a ve je bidi a voñôlô je.”​—Beéphésien 5:29, Mfefé Nkôñelan.

JÔME NALÉ A TINAN: Éfuse ji ja tindi bia na bi bo mame mese ma sili asu na bi nyoñe ngap a nyule jangan. Mfasan éziñ wo liti na abui akon e tii a mintyi’ane bia nyoñ ényiñ. Nde ñhe, e nyoñe mbamba mintyi’an a volô na bi beta dañe bo mvo’é.

JAM Ô NE BO:

• Ndian. Jeñe na ô di bidi bi ne mvo’é, a nya’a fe abui mendim.

• Bo’o sport. Sport a ne wo volô nya nya abuii ja’a ô ne ôkala ôvé, to’o ô n’éyem nge nkôkon. E n’été na bôte wo nye’e, nge bevee melep, be ne volô wo na ô bo nta’ane mam asu sport, ve wo étam ô ne bo na mam me wulu!

• Kôme’e ke ôyo. Éyoñ wo lôt abui éyoñ teke kôme ke ôyo, jam ete e ne so wo mbia ôkon. Abui bôt e nji ke ôyo avale da yian amu ba tobe na ba bo mam mefe éyoñe ba yiane ke ôyo. Ve, éyoñ wo tyi’i na wo ke ôyo avale da yian, wo tyi’i fe na ényiñe jôé é dañe beta bo mvo’é.

ÑYE’ELANE YA BIBLE: “Mbo’ane biabebien mfuban mfa’a ya mvin ése ya minsôn a nsisim.”​—2 Becorinthien 7:1.

JÔME NALÉ A TINAN: Bia ye bo mvo’é minsôn nge bia sa’ale fulu ya ndaman nyule jangan a biôm ane  ta’a, amu bia yeme na biôm bite bia bo na bôte be ji’a kon a wu.

JAM Ô NE BO: Tili’i môse wo te tyi’i na wo ye telé mbia fulu ate. Ôsusua na môs ôte wo kpwa’an, mane wua ta’a te ase fé, a mimbop mise ô wô’ô vuluke nye. Te beta ke tabe vôme bôte ba nyu nye. Kate’e bemvôé bôé a nda bôte jôé na ô teléya fulu éte, a da sili na be su’u wo ntyi’ane wo te nyoñ.

BO’O MAM A NTYEL ÔSE.

“Nge wo lôñe mfefé nda, wo ye lôñe mone mfin mbôma’an a andile dôé, nalé wo ye bo te futi metyi e nda jôé, nge môt éziñ a koo andile y’été a ku.”​—DEUTÉRONOME 22:8, Mfefé Nkôñelan.

TE BO AVÔLE YA YAA.

“Nyô a ne ôte’ete’e ya yaa a bili beta fek; Ve nyô a ne nsat nlem a bete mboan akute yôp.”​—MINKANA 14:29.

SA’ALE’E MBIA NDIAN.

‘Te tabe nsamba bôte . . . b’adi mbia ndian.’​—MINKANA 23:20.