Giaman: Ol Witnes blong Jehova oli no bilif long Jisas, taswe oli no mekem lafet blong Krismas.

 Tru: Mifala i Kristin. Mifala i bilif se Jisas Kraes nao i mekem rod blong sevem man.—Ol Wok 4:12.

  Giaman: Taem yufala i tijim ol man se i no stret blong mekem lafet blong Krismas, yufala i seraotem ol famle.

 Tru: Mifala i traehad blong givhan long ol famle. Mifala i yusum ol tok blong Baebol we i save mekem se famle i stap gud.

  Giaman: Yufala i no kasem “spirit blong Krismas,” hemia se, man i givim presen long gladhat blong hem, mo pis i stap wetem ol man we God i glad long olgeta.

 Tru: Mifala i traehad evri dei, blong mifala i gat pis wetem ol man mo mifala i glad blong givim presen. (Ol Proveb 11:25; Rom 12:18) Olsem nao, long ol miting blong mifala mo long taem we mifala i prij, mifala i folem ol tok ya blong Jisas se: “Yufala i kasem we yufala i no pem, mo yufala i mas yusum, we oli no pem yufala from.” (Matiu 10:8) Mo tu, mifala i pulum tingting blong ol man i go long Kingdom blong God, we hem nomo i save putum pis long wol.—Matiu 10:7.

•   Jisas i talem se yumi mas tingbaot taem we hem i ded, be i no taem we hem i bon.—Luk 22:19, 20.

•   Ol aposol mo disaepol blong Jisas oli no mekem lafet blong Krismas. Buk ya New Catholic Encyclopedia, i talem se: “Lafet ya blong makem taem we Jisas i bon, hem i stat samwe long yia 243.” Hemia i bitim 100 yia afta we ol aposol oli ded.

•   I no gat wan samting blong soemaot se Jisas i bon long Disemba namba 25. Baebol i no talem stret dei we hem i bon.

•   Mifala i bilif se God i no glad long lafet blong Krismas, from we stamba blong hem, hemia ol hiten kastom mo wosip.—2 Korin 6:17.

 Plante man oli save se Krismas i kamaot long ol hiten man mo Baebol i no talem se yumi mas mekem lafet blong hem. Be oli stap mekem lafet yet. Ol man olsem oli talem se: ‘I no stret we ol Kristin oli mekem se ol man oli agensem olgeta from we oli no mekem lafet ya. Hemia wan smol samting nomo.’

 Baebol i talem se yumi mas ‘yusum tingting blong yumi.’ (Rom 12:1, 2, NW) Baebol i talem tu se yumi mas tinghevi long trutok. (Jon 4:23, 24) I tru, mifala i no wantem pulum ol man blong oli agensem mifala. Be mifala i folem ol tok blong Baebol, nating se samfala oli no glad long mifala.

 Mifala nomo i jusum se mifala i no wantem mekem lafet blong Krismas. Be mifala i respektem raet blong ol narafala man tu blong oli jusum wanem we oli wantem. Sipos man i wantem mekem lafet blong Krismas, hemia bisnes blong hem.