‘Yufala i no mas go luk ol man we oli stap toktok wetem ol dedman. Sipos yufala i mekem fasin ya, bambae yufala i kam doti long fes blong mi.’—Levitikas 19:31.

?OL MAN OLI TALEM WANEM?

Ol man oli wantem se famle blong olgeta we i ded, i no stap harem nogud. Ale oli talem se: “I gud yumi go luk wan kleva, blong i traem toktok wetem famle ya. Maet kleva ya i save mekem se yumi no moa wari.”

?BAEBOL I TALEM WANEM?

Long taem blong ol man Isrel bifo, ol man oli traem toktok wetem ol dedman, taswe Baebol i toktok klia long saed blong fasin ya. Jehova i givim Loa long neson blong Isrel, i se: ‘Bambae yufala i no mas go luk ol kleva, mo singaot long ol dedman blong oli givhan long yufala. Ol fasin ya i nogud we i nogud, mi mi no laekem nating ol man we oli stap mekem olsem, mi agens long olgeta.’ (Dutronome 18:10-12) Mo tu, Baebol i talem se ol man we oli stap mekem wok blong rabis spirit, bambae oli “no save go insaed long niufala wol ya we God i king long hem.” —Galesia 5:19-21.

“Ol man we oli laef yet oli save se bambae oli ded, be ol man we oli ded finis oli no moa save wan samting.”—Prija 9:5.

?OL MAN OLI TALEM WANEM?

Plante man oli talem se ol dedman oli stap laef yet samples, taswe oli traem blong toktok wetem olgeta. Maet oli wantem save sam samting, no maet oli fraet se ol dedman ya bambae oli mekem trabol long olgeta, ale oli wantem mekem wan samting blong ol dedman ya oli glad.

?BAEBOL I TALEM WANEM?

“Ol man we oli laef yet oli save se bambae oli ded, be ol man we oli ded finis oli no moa save wan samting. Oli no moa save kasem pei blong ol samting we oli stap mekem, mo ol man oli fogetem olgeta finis. Ol fasin blong olgeta we oli laekem tumas ol man, no oli no laekem olgeta nating oli agens long olgeta, no oli jalus tumas long olgeta, be taem oli ded, ol samting ya oli lus wetem olgeta.” (Prija 9:5, 6) !Yes, Baebol i tijim se ol dedman oli ded! Oli no save tingting, oli no save mekem samting, mo oli no save wosipim God tu. Ol Sam 115:17 (NW) i talem se: “Taem man i ded mo i go long ples we i no moa gat toktok nating, hem i no moa save presem God.”

‘?Man we i laef i save kasem waes long ol dedman?’ —Aesea 8:19.

?OL MAN OLI TALEM WANEM?

Sam man oli talem se ol kleva oli save talemaot samting we ol dedman nomo wetem ol famle mo fren blong olgeta, oli save.

?BAEBOL I TALEM WANEM?

Long 1 Samuel japta 28, Baebol i tokbaot stori blong wan king we nem blong hem Sol. God i talem se ol man blong hem oli no mas go luk ol kleva. Be king ya i brekem loa ya, nao hem i go luk wan kleva woman. I luk olsem se woman ya i stap toktok wetem wan man blong God we i ded finis, nem blong hem Samuel. ?Be i tru se woman ya i toktok wetem Samuel? !Nogat! Hem i stap toktok wetem wan rabis enjel we i giaman nomo se hem i Samuel.

Rabis enjel ya i wan man blong wok blong Setan, “we i stamba blong ol giaman tok.” (Jon 8:44) ?From wanem ol rabis enjel oli givim tingting ya se ol dedman oli stap laef samples? Oli wantem spolem gudnem blong God, mo oli wantem pulum ol man blong oli no moa trastem Tok blong God, Baebol.—2 Timoti 3:16.

?Olsem wanem? ?Ol samting we yumi tokbaot finis, oli min se ol dedman oli no moa gat hop? !Nogat! Baebol i promes se olgeta we oli stap “slip” long beregraon, bambae oli laef bakegen. * (Jon 11:11-13; Ol Wok 24:15) Be bifo we taem ya i kamtru, yumi save se ol famle blong yumi we oli ded, oli no stap harem nogud samples.