Ebraham—Wan Man We i Lavem Narafala

Ebraham i harem nogud we i harem nogud tumas taem gudfala woman blong hem, Sera, i ded. Taem olfala Ebraham i stap berem woman blong hem, hem i tingbaot plante samting we hem i mekem wetem woman blong hem. Hem i sore we i sore tumas long Sera, nao wota blong ae blong hem i folfoldaon. (Jenesis 23:1, 2) Ebraham i no sem se hem i krae. Defren olgeta, taem hem i krae, hem i soemaot nambawan fasin blong hem hemia se hem i lavem narafala.

?MAN WE I LAVEM NARAFALA I OLSEM WANEM? Man we i lavem narafala i harem se hem i laekem narafala mo i klosap long hem. Man we i lavem narafala i soemaot long ol fasin blong hem se hem i tingbaot narafala olsem wanem. Hem i glad blong lego sam samting we hem nomo i wantem from we i lavem narafala.

?EBRAHAM I MEKEM WANEM BLONG SOEMAOT SE HEM I LAVEM NARAFALA? Ebraham i soemaot se hem i lavem famle blong hem. Ating Ebraham i gat plante samting blong mekem. Be hem i neva ting nating long wok blong hem blong lukaot long famle blong hem. Hem i meksua se olgeta long famle blong hem oli harem gud mo oli fren gud wetem God. Yes, Jehova i luk we Ebraham i mekem gud wok blong hem olsem hed blong famle. (Jenesis 18:19) Antap moa, Jehova i talem se Ebraham i lavem famle blong hem. Taem Jehova i stap tokbaot Aesak, hem i talem se Ebraham i “lavem hem tumas.”—Jenesis 22:2.

Fasin blong Ebraham blong harem nogud tumas taem woman blong hem Sera i ded, i soemaot bakegen se Ebraham i lavem narafala. Ebraham i krae bigwan. Nating se Ebraham i wan man we i strong, be  hem i no fraet blong soemaot se hem i harem nogud. Yes, Ebraham i wan strong man be hem i kaen tu.

Ebraham i soemaot se hem i lavem God blong hem. Olgeta samting we hem i mekem long laef blong hem i soemaot se hem i lavem God. ?Hem i mekem samting ya olsem wanem? Yumi tingbaot ol tok blong Baebol we i stap long 1 Jon 5:3 se: “Sipos yumi lavem God, hemia i min se yumi stap folem ol tok blong hem.” Ebraham i folem mining blong ol tok ya. Hem i soemaot wan nambawan eksampol blong man we i lavem God.

Evritaem we Jehova i talem long Ebraham blong i mekem wan samting, wantaem nomo Ebraham i obei long hem. (Jenesis 12:4; 17:22, 23; 21:12-14; 22:1-3) Ebraham i obei long God nating se samting we God i talem long hem i isi no i had blong mekem. Mo hem i obei long Jehova nating se hem i no save from wanem Jehova i askem hem blong mekem wan samting. Sipos God i wantem hem blong mekem wan samting, hem i glad blong mekem. Hemia nao samting we i impoten long Ebraham. Ebraham i luk se evritaem we Jehova i askem hem blong mekem wan samting, hemia janis blong hem i soemaot se hem i lavem Jehova.

?YUMI LANEM WANEM? Yumi save folem fasin blong Ebraham taem yumi soemaot se yumi lavem ol narafala man, speseli olgeta long famle blong yumi. I nogud yumi tingting tumas long ol samting blong laef nao yumi no gat taem blong joen gud wetem olgeta we yumi lavem tumas.

Yumi mas wok had tu blong mekem lav blong yumi long Jehova i kam strong moa. Sipos yumi lavem Jehova long hat blong yumi, bambae yumi gat paoa blong jenisim sam samting long laef blong yumi. Bambae yumi mekem se tingting blong yumi, ol toktok blong yumi, mo ol fasin blong yumi, oli mekem God i glad.—1 Pita 1:14-16.

I tru, i no isi oltaem blong obei long ol tok blong Jehova. Be yumi save gat strong tingting se God ya we i singaot Ebraham se ‘fren blong hem,’ hem bambae i givhan long yumi olsem we i givhan long Ebraham. (Aesea 41:8) Tok blong God, Baebol, i promes se: “Hem bambae i mekem yufala i strong, i givim paoa long yufala.” (1 Pita 5:10) !Hemia wan nambawan promes! Fren ya we Ebraham i trastem hem, hem nao i mekem promes ya.

[Bokis blong pija long pej 10]

?I Stret Blong Wan Man i Krae?

Plante man bambae oli talem se i no stret blong wan man i krae. Be ating bambae oli sapraes blong save se Baebol i tokbaot Ebraham se hem i krae. Be i no Ebraham nomo. Baebol i tokbaot plante man blong God we wota blong ae blong olgeta i ron taem oli harem nogud from wan trabol. Hemia ol man we oli gat paoa mo oli strong. Sam long olgeta, hemia Josef, Deved, aposol Pita, ol elda long kongregesen blong Efesas, mo Jisas. (Jenesis 50:1; 2 Samuel 18:33; Luk 22:61, 62; Jon 11:35; Ol Wok 20:36-38) I klia se Baebol i tijim se i stret blong wan man i krae.