No Fraet Long Taem Blong Trabol

WAN krangke grup blong ol man oli fosem Gaeas mo Aristakas, tu fren blong aposol Pol, i go long bigfala haos miting blong Efesas. Taem oli stap long ples ya, ol man ya oli kam kros tumas mo oli singaot blong tu ful aoa se: “!Hurei long Atemis blong Efesas!” (Ol Wok 19:​28, 29, 34) ?Olsem wanem? ?Ol fren ya blong Pol oli stanap strong long trabol ya? ?Mo trabol ya i stat olsem wanem?

Pol i bin prij long taon ya Efesas blong tri yia finis. Frut we i kamaot from, hemia se plante man Efesas oli no moa wosip long ol giaman god. (Ol Wok 19:26; 20:31) Wan giaman god we plante man Efesas oli mekem wosip long hem, hemia woman god ya Atemis, we hem i save mekem woman i karem plante pikinini. Oli wokem wan bigfala tempol blong woman god ya. Taem man i stap long tempol ya hem i save lukluk i godaon long taon ya Efesas. Ol man oli stap wokem ol smosmol haos long silva, we oli pija blong haos tempol ya, mo oli stap hangem pija ya long nek no han blong olgeta, no long haos blong olgeta blong karem gudlak. Be, ol Kristin oli no stap pem ol aedol olsem.​—1 Jon 5:21.

Demetrius i wan man blong wokem ol samting long silva. Hem i talem se minista wok blong Pol i spolem bisnes blong hem blong winim mane. Taem hem i talem giaman tok mo i bitim mak long stori ya, hem i pulum ol narafala man we oli stap mekem sem wok olsem hem, blong bilif se ol man long Esia Maena bambae oli no moa wosip long god ya Atemis. Ale, ol man ya oli kros, mo oli stat singaot bigwan blong presem Atemis. Taem oli mekem olsem, wan bigfala hip blong ol man i girap, mo trabol ya i goraon, i finisim olgeta ples long taon.​—Ol Wok 19:​24-29.

Plante taosen man oli hivap long bigfala ples ya we oltaem oli stap mekem ol bigfala miting long hem, we i gat 25,000 jea blong hem. Pol i wantem toktok long ol krangke man ya, be, sam haeman blong gavman we oli fren blong Pol, oli talem se hem i no mas mekem olsem. Biaen, taon klak blong Efesas i mekem ol man ya oli kwaet, nao oli letem Gaeas mo Aristakas tufala i go fri.​—Ol Wok 19:​35-41.

Tede tu, taem ol man blong God oli talemaot gud nius, maet oli fesem sam fasin agens mo sam hip blong man oli save girap agensem olgeta. Plante taem oli prij long ol taon we ol man oli wosip long ol giaman god, oli mekem ol rabis fasin long saed blong seks, mo oli stap mekem raf fasin oltaem. Nating se i olsem, ol Witnes oli no fraet blong mekem olsem aposol Pol. Yes, aposol ya i no ‘haedem wan tok long ol man [long taon ya Efesas], be hem i talemaot olgeta samting we oli save givhan long olgeta. Hem i tijim olgeta long fes blong ol man, mo long ol haos wanwan.’ (Ol Wok 20:​20, NW ) Ol Witnes oli glad taem oli luk se ‘tok blong [Jeova] i stap goaot moa long evri ples, i stap kam strong moa oltaem.’​—Ol Wok 19:20.

[Tok blong pija long pej 30]

Ol ston blong ples miting ya we i bin stap long Efesas bifo