Wan Fasin Blong Ol Man

Wok blong man ya Jodie i blong seraotem mo putum praes long olting we ol man oli kasem taem wan famle blong olgeta i ded. Hem i stap givhan long wan woman we sista blong hem i ded finis, nao tufala i seraotem mo putum praes long olting blong sista ya. Jodie i stap lukluk raon long wan olfala ples blong mekem faea, nao hem i faenem tu smol olfala bokis. Taem hem i lukluk insaed long wan long tufala bokis ya, hem i no save bilivim samting we hem i luk. !Insaed, i gat fulap mane we oli rolem long strong pepa​—total blong olgeta mane ya hem i eit milian vatu! Jodie i stap hem wan nomo long rum ya. ?Bambae hem i mekem wanem? ?Bambae hem i tekem bokis ya mo no talem wan samting long woman ya? no ?Bambae hem i talemaot long woman ya se hem i faenem mane ya?

PROBLEM we Jodie i fesem i soemaot wan samting we i mekem yumi, yumi defren long ol anamol. Buk ya, The World Book Encyclopedia, i talem se: “Wan spesel fasin blong man, i blong skelem mo askem kwestin ya, se hem i mas mekem wan samting no nogat.” Sipos wan dog we i hanggri i luk wan pis mit antap long tebol, bambae hem i no stop mo tingting fastaem sipos i stret blong hem i kakae mit ya no nogat. Be Jodie i naf blong tingting gud fastaem mo skelem sipos i stret no i no stret blong tekem mane ya. Sipos hem i holemtaet mane ya, hem i stil, be ol narafala man bambae oli no save. Mane ya i no blong hem, be woman we i pem hem blong mekem wok ya i no save wan samting long saed ya. Antap moa, bighaf blong ol man we oli laef raonabaot long Jodie bambae oli ting se hem i krangke sipos hem i givimbak mane ya long woman ya.

?Sipos yu yu stap long ples blong Jodie, bambae yu mekem wanem? Ansa blong yu bambae i dipen long ol rul blong stret fasin we yu yu jusum blong folem long laef blong yu.

Ol Rul Blong Stret Fasin

Stat long taem bifo i kam, ol jos nao oli putumap ol rul blong ol man oli folem long saed blong fasin we i stret mo fasin we i no stret. Long plante ples, ol man oli tinghae  long ol rul long Tok blong God, Baebol. Be, plante moa man long wol naoia oli stap sakemaot ol rul blong jos long saed ya. Oli talem se ol rul ya oli no moa wok gud mo se ol rul blong Baebol long saed blong gudfala fasin, oli olfala finis. ?Wanem i tekem ples blong ol rul ya? Buk ya, Ethics in Business Life i talem se, “ol tingting blong wol oli tekem ples blong hemia blong ol jos.” Plante man oli no moa lukluk i go long ol jos, be oli lukaotem advaes blong ol man long wol, we oli stap stadi long saed blong fasin we i stret mo fasin we i no stret. Paul McNeill, we i tijim ol man long ethics mo loa, i talem se: “Mi ting se ol man we oli stap tijim ol rul long saed blong fasin we i stret mo fasin we i no stret, olgeta nao oli ol pris blong wol tede. . . . Naoia, ol man oli letem ol rul blong ol tija ya i lidim laef blong olgeta, i no moa ol rul blong jos.”

?Taem yu mas tekem wan strong disisen, olsem wanem blong save fasin we i stret mo fasin we i no stret blong mekem? ?Ol rul we yu yu stap folem long saed blong fasin we i stret mo fasin we i no stret, oli kamaot long God no oli kamaot long yu nomo?