Taem Jesebel i harem nius ya se ol profet blong Bal oli ded, hem i kros we i kros. Nao hem i sanem wan mesej i go long Elaejah se: ‘Tumora, bae yu ded olsem ol profet ya blong Bal.’ Elaejah i fraet we i fraet, nao i girap i ronwe i go long draeples. Hem i prea se: ‘Jehova, i naf nao. Yu letem mi mi ded nomo.’ Hem i taed tumas, nao hem i slip long sado blong wan tri.

Wan enjel i kam wekemap Elaejah, i tok smosmol long hem se: “Yu girap, mo yu kakae.” Elaejah i luk wan raon bred antap long ol hot ston, mo wan jag blong wota. Hem i kakae mo i dring, nao hem i slip bakegen. Enjel i kam wekemap hem bakegen, i se: ‘Yu girap, mo yu kakae. Yu nidim paoa from we rod blong yu i longfala.’ Ale Elaejah i kakae bakegen. Nao hem i wokbaot 40 dei mo 40 naet, go kasem hil ya Horeb. Nao hem i go insaed long wan hol blong ston blong i slip. Be Jehova i toktok long hem se: “?Elaejah, yu yu stap mekem wanem long ples ya?” Elaejah i ansa se: ‘Ol man Isrel oli brekem promes we oli mekem long yu. Oli brekemdaon ol olta blong yu mo oli kilim ol profet blong yu oli ded. Mo naoia oli wantem kilim mi tu.’

Jehova i talem long hem se: ‘Yu go stanap long hil ya.’ Nao wan bigfala win i blu i pas long hol blong ston. Afta, graon i seksek bigwan mo i gat wan bigfala faea i laet. Nao Elaejah i harem wan voes we i tok smosmol long hem. Hem i kavremap fes blong hem long kot blong hem, mo i stanap long maot blong hol ya. Nao Jehova i askem long hem from wanem hem i ronwe. Elaejah i talem se: “Mi wan nomo mi stap.” Be Jehova i talem long hem se: ‘I no yu wan nomo. I gat 7,000 man yet long Isrel we oli stap wosipim mi. Yu go kafsaedem oel long hed blong Elisa blong makemaot hem blong i tekem ples blong yu olsem wan profet.’ Wantaem nomo, Elaejah i mekem samting ya we Jehova i talem. ?Yu ting se Jehova bambae i givhan long yu tu, sipos yu mekem samting we hem i talem? Yes. Naoia, bambae yumi tokbaot wan moa samting we i hapen long draetaem ya.