Mi mi bon long La Ceiba, Honduras, mo mi las bon blong faef pikinini, mi wan nomo mi boe. Mo mi wan nomo long famle we sora blong mi i fas. Famle blong mi i laef long wan eria we i denja, mo mifala i pua. Laef blong mifala i kam had moa taem papa blong mi i ded long wan aksiden long ples blong wok, long taem ya mi gat fo yia.

Mama blong mi i wok had blong lukaot long mi mo ol sista blong mi, be hem i no gat inaf mane blong pem ol klos blong mi. Long taem blong ren, oltaem mi kolkol from we mi no gat ol klos blong kolkol.

Taem mi gruap, mi lanem Saen Lanwis Blong Honduras (LESHO), we i givhan long mi blong toktok wetem ol narafala we sora i fas. Be mama mo ol sista blong mi oli no savegud Saen Lanwis Blong Honduras, oli yusum sam smol saen nomo o oli mekemap sam saen blong toktok wetem mi. Nating se i olsem, mama blong mi i lavem mi mo i protektem mi long denja. Wetem smol saen we hem i save, hem i givim woning long mi blong mi stap longwe long ol nogud fasin olsem smok mo dring alkol. From samting ya, mi glad se taem mi gruap mi neva kam slef blong ol samting ya.

Taem mi smol, mama blong mi i stap tekem mi mi go long Katolik jos, be mi no kasemsave eni samting from i nogat man blong transletem ol save ya long saen lanwis. Mi mi les nao mi no moa go long jos taem mi gat ten yia. Nating se i olsem, mi wantem yet blong save moa long saed blong God.

Long 1999, taem mi gat 23 yia, mi mitim wan woman blong Yunaeted Stet, we hem i wan memba blong evanjelis jos. Hem i tijim mi long Baebol mo i lanem mi long Saen Lanwis Blong Amerika (ASL). Mi laekem tumas samting we mi lanem long Baebol nao mi wantem kam wan pasta. Taswe, mi muv i go long Puerto Rico blong joen long wan Kristin trening senta blong olgeta we sora i fas. Taem mi kambak long La Ceiba long 2002, mi stanemap wan jos blong olgeta we sora i fas wetem help blong sam fren. Wan long olgeta hemia Patrisia, we biaen hem i kam waef blong mi.

Olsem pasta blong jos blong mifala, mi givim ol tok long Saen Lanwis Blong Honduras, mi soem ol pija blong ol stori long Baebol, mo mi aktem ol stori ya blong givhan long olgeta we sora i fas blong oli save kasemsave. Mi go tu long ol taon klosap blong leftemap tingting blong olgeta we sora i fas mo halpem olgeta wetem ol trabol we oli gat. Mo tu, mi go long wan misinari trip long Yunaeted Stet mo Sambia. Be blong talem stret, mi no savegud Baebol. Mi stap tokbaot nomo ol samting we mi lanem mo ol samting we mi kasemsave long ol pija. Mi mi gat moa kwestin i bitim ol ansa.

Wan dei, sam memba blong jos blong mi, oli talem sam giaman toktok long saed blong mi. Oli talem se mi mi wan man blong drong, mo mi pas biaen long woman blong mi. Mi mi harem nogud tumas mo mi kros. Smoltaem afta, mi mo Patrisia i lego jos.

Ol Witnes blong Jehova oli stap kam oltaem blong storian wetem mi mo Patrisia, be mitufala i neva lesin long olgeta. Be, afta we mitufala i lego jos blong mitufala, Patrisia i agri blong stadi Baebol wetem wan kapol we oli Witnes, hemia Tomas mo Lisi. Mi sapraes tumas se nating we sora blong tufala i no fas, be tufala i save saen lanwis. Nao biaen mi joenem Patrisia blong stadi.

Mifala i stadi blong sam manis wetem ol video blong Saen Lanwis Blong Amerika. Be taem sam long ol fren blong mitufala i tok agensem ol Witnes blong Jehova se oli stap biaenem man nomo, mitufala i stop blong stadi. Nating se Tomas i pruvum long mi se ol Witnes blong Jehova oli no folem man, be mi no bilivim hem.

Sam manis afta, tingting blong Patrisia i foldaon bigwan, nao hem i prea blong God i sanem ol Witnes blong Jehova oli kam visitim hem bakegen. Smoltaem biaen, wan woman we i laef klosap long haos blong mitufala, we i wan Witnes, i kam visitim Patrisia mo i askem sipos Lisi i save visitim hem bakegen. Lisi i wan trufala fren. Hem i visitim Patrisia evri wik blong leftemap tingting blong hem mo stadi Baebol wetem hem. Be mi mi gat tu tingting yet long saed blong ol Witnes.

Long 2012, Ol Witnes blong Jehova oli mekem wan spesel kampen blong soem video ya Would You Like to Know the Truth? long Saen Lanwis Blong Honduras. Lisi i karem wan kopi blong video ya i kam long mitufala. Taem mi wajem, mi sek blong lanem se plante long ol tijing we mi stap tijim, olsem helfaea mo sol we i no save ded, oli no stap long Baebol.

Nekis wik blong hem, mi go long Haos Kingdom blong ol Witnes blong Jehova blong toktok long Tomas. Mi talem long hem se mi wantem tijim trutok blong Baebol long olgeta we sora i fas, be bae mi no kam Witnes blong Jehova. Mi wantem statem wan niufala jos blong olgeta we sora i fas. Tomas i talem gudfala toktok long mi from strong tingting we mi gat, be afta hem i soem Efesas 4:5, we i soemaot se i mas gat fasin joengud insaed long kongregesen blong ol tru Kristin.

Tomas i givim video ya Jehovah’s Witnesses—Faith in Action, Part 1: Out of Darkness we i stap long Saen Lanwis Blong Amerika. Video ya i soemaot olsem wanem wan grup blong ol man oli stadi gud long Baebol blong kasemsave trutok long saed blong ol stamba tijing blong ol skul. Taem mi wajem video ya, mi kasemsave filing blong ol man ya. Olsem olgeta, mi tu mi stap lukaotem trutok. Video ya i mekem mi sua se ol Witnes oli tijim trutok from we ol tijing blong olgeta oli stanap long Baebol nomo. Ale, mi stadi bakegen, mo long 2014, mi mo Patrisia i baptaes olsem wan Witnes blong Jehova.

Mi mi laekem kongregesen blong ol Witnes blong Jehova from we i klin, olsem we God i klin. Olgeta we oli mekem wosip, toktok mo fasin blong olgeta tu i klin. Oli gat pis mo oli stap lefleftemap tingting blong olgeta. Ol Witnes oli joen gud, mo olgeta evriwan oli tijim sem trutok nomo blong Baebol, nomata wantem kantri we oli stap long hem o wanem lanwis we oli toktok long hem.

Mi mi glad tumas blong lanem samting we Baebol i rili tijim. Eksampol, mi lanem se Jehova i God Ya We i Gat Olgeta Paoa, mo hem nomo i Haefala King blong wol. Hem i lavem olgeta we sora i fas mo olgeta we oli save harem. Mi glad tumas se God i lavem mi. Mi lanem tu se wol bambae i kam wan naesfala paradaes mo yumi gat janis blong harem gud long laef we i no save finis mo gat wan helti bodi. !Mi mi wantem tumas blong luk dei ya we bambae ol samting ya oli kamtru!

Mi mo Patrisia i laekem blong tokbaot Baebol long ol narafala we sora i fas. Naoia mitufala i stadi Baebol wetem sam memba blong jos we mitufala i bin joenem. Mo naoia mi no moa gat kwestin long saed blong ol samting we mi tijim, olsem we mi bin gat taem mi wan pasta. Mi mi faenem ansa blong ol kwestin blong mi, taem mi stadi wetem ol witnes blong Jehova.