Isukulu lya Gileadi Ilyalenga 131

‘Mukalenge Umutima wa kwa Yehova Ukusekelela’

PA 10 September 2011, balupwa, ifibusa na bantu fye bambi balilongene ilyo aba mwi Sukulu lya Gileadi ilyalenga 131 balepwisha amasambililo yabo. Ilyo programu yaletendeka, bakalanda ba malyashi na bana be sukulu bali no mwenso. Lelo pa numa ya kukutika ku malyashi, ku filangililo e lyo na ku lyashi lya kwipusha ifyacitike, bonse 9,063 abasangilweko, balyumfwile bwino kabili balisansamwike.

Ba Stephen Lett, ababa mwi Bumba Litungulula ilya Nte sha kwa Yehova e bali ba ceyamani kabili e balandile ilyashi lya kwiswila programu. Ba Lett balandile pa malembo ya mu Baibolo ayalanda pali Yehova Lesa ukuti alikwata umubili wa mampalanya kabili bakomaile sana pa fikomo ifilanda pa fyo Yehova abomfya amenso, amatwi, iminwe na maboko ifya mampalanya.

Pa kubala, ba Lett balandile pali 2 Imilandu 16:9, apatila “amenso ya kwa Yehova, yalamona mu calo conse pa kuti alange amaka yakwe aya kwafwa ababa ne mitima ya cishinka kuli ena.” Bakoseleshe abalepwisha isukulu ukuba ne mitima ya cishinka kuli Yehova. Baebele abasambi ukutila kuti bapashanya Lesa nga balemona ubusuma mu bantu. Lyena ba Lett balandile pali 1 Petro 3:12, apalanda ukuti amatwi ya kwa Yehova yalomfwa ukupapaata kwa balungama. Bakoseleshe abalepwisha isukulu ukulapepa kuli Yehova lyonse, no kulaibukisha ukuti Yehova alafwaya sana ukukutika ku mapepo yabo.

Balandile na pali Esaya 41:13, apo Yehova alaya ukuti: “Ine, ne Yehova Lesa obe, ndeikata ukuboko kobe ukwa ku kulyo, ndekweba ati, ‘Witiina. Ine nkakwafwa.’” Ba Lett batile: “Moneni amashiwi ubusuma ayo Yehova alandile. Alatambika ukuboko kwakwe pa kuti atwikate ku maboko yesu.” Lyena baebele abalepwisha isukulu ukuti lyonse fye bafwile ukuleka Yehova ukulabafwa, tabafwile ukukaana ukwafwa kwakwe. Balandile no kuti abalepwisha isukulu kuti bapashanya Yehova nga ca kutila nabo baleafwa bambi.

Pa kulekelesha, babelengele Esaya 40:11. Lyena baebele abaali mwi bumba ukwelenganya ifyo Lesa aba no kutemwa. Ba Lett batile: “Yehova alatulonganika na maboko yakwe. Atusendela pa cifuba cakwe.” Inga ifwe tulingile ukucita shani? Bakoseleshe abalepwisha amasambililo ukuti balingile ukuba abanakilila nga kana ka mpaanga pa kuti Yehova akalebasendela pa cifuba cakwe.

“Tuli ne Cuma ici mu Fipe fye Bumba”

Ba David Splane ababa mwi Bumba Litungulula e balandile ili lyashi ilyafumine pali 2 Abena Korinti 4:7. Bushe ici cuma e cinshi? Bushe kwishiba nelyo mano? Ba Splane bayaswike ukuti “te kwishiba nelyo amano. Icuma ico umutumwa Paulo alelandapo ‘mulimo’ uwa ‘kusambilisha abantu icine.’” (2 Abena Korinti 4:1, 2, 5) Bacinkwileko abalepwisha isukulu ukuti imyeshi isano iyo balesambilila yali ya kuipekanishisha ukubomba uyu mulimo waibela. Uyu mulimo uwacindama sana.

Balondolwele ukuti “ifipe fye bumba,” mibili yesu. Balandile pa bupusano bwaba pa cipe ce bumba ne cipe ca golde. Ifipe fya golde tabafibomfya sana. Lelo ifipe fye bumba e fyo babomfya sana. Nga twabika icuma mu cipe ca golde, nalimo kuti twabika amano kuli fyonse fibili, ku cipe na ku cuma tubikilemo. Ba Splane batile: “Imwe mwe balepwisha isukulu tamufwile ukulenga abantu ukulabika amano kuli imwe. Mulingile ukulenga abantu ukulacindika Yehova. Imwe muli fipe fye bumba.”

 Ba Splane batwalilile ukulondolola ukuti, ku kale ifipe fimo ifye bumba tafyalepya ku mulilo, kabili fimo balefipanga ifyakosa ica kuti tafyaletobeka. Bushe bamishonari kuti baba shani nge fi ifipe fye bumba? Ukwabula no kutwishika, ilyo bamishonari bakatendeka fye umulimo wabo bakakwata amafya ayo bakalashipikisha. Na lyo line, tabakalefulwa bwangu nelyo ukubika amano ku fintu ifya kubafuupula. Ba Splane batile: “Mukasanga ukuti mwalikosa mu kushipikisha amesho ukucila ne fyo mutontonkanya.” Yehova tapeela bamalaika ici cuma, lelo apeela ifipe fye bumba. Ba Splane basondwelele na mashiwi ya kuti: “Ici cilanga ukuti Yehova alimucetekela sana.”

‘Walibutukapo Ulubilo na Babutuka na Makasa . . . Bushe kuti Wabutuka Ulubilo na Bakabalwe?’

Munyinefwe Samuel Herd uwaba mwi Bumba Litungulula aipwishe abalepwisha isukulu ukuti: “Bushe kuti mwabutuka ukufika kwi kabili bushe mulabutukisha?” Mulandu nshi baipushishe ici cipusho? Ba Herd balandile pa fyo abasambi bapitilemo ne fyo kasesema Yeremia apitilemo. Calikosele kuli uyu mwaume wa citetekelo ukushipikisha amafya alekwata. Lelo kwali amafya na yambi ayakalamba ayo ali no kukwata. E ico Yehova amwipwishe ukuti: “Apo walibutukapo ulubilo na babutuka na makasa, kabili na bo balekunasha, bushe kuti wabutuka shani ulubilo na bakabalwe?”—Yeremia 12:5.

Ba Herd baebele abalepwisha isukulu ukuti: “Nalimo kuti mwamona kwati ilyo mwalelemba amashindano, mwalebutuka ulubilo na bakabalwe. Lelo mwalebutuka fye na babutuka na makasa. Mu mulimo mukalabomba, mukalabutuka ulubilo na bakabalwe, nelyo ukuti mukalakwata amafya ayakalamba ukucila nayo muletontonkanyapo. Bushe mukacita shani? Isukulu lya Gileadi nalimukansha ukubutuka na bakabalwe ukwabula ukunaka.” Ba Herd bakoseleshe abalepwisha isukulu ukutwalilila ukulaikansha abene mu fya kwa Lesa, ukulasambilila Baibolo lyonse no kulapepa kuli Lesa.

Ba Herd balondolwele ukuti bamishonari bamo bakafuupulwa, kabili ilyo bakalashimikila, abantu tabakalepoosa amano ku mbila nsuma. Bambi bakalalwalilila nelyo ukulaimona kwati tabafikapo ukuba bamishonari. Lelo babakoseleshe ukuti Lesa akalabafwa ukushipikisha amafya yonse ica kutila tabakalenaka. Batile: “Nampo nga mukalabutuka ulubilo na babutuka na makasa nelyo na bakabalwe, mukalecetekela ukuti ukuboko kwa kwa Lesa ukwa maka kukalamwafwa. Mukatunguluka mu mulimo wenu uwa bumishonari kabili mukalenga Yehova ukucindikwa no kulumbanishiwa.”

Amalyashi Yambi Ayaliko

“Washime Iingi.” Ba John Ekrann, ababa muli Komiti ya Musambo ku United States of America balandile pa lyashi lya kwa kasesema Elisha na mukamfwilwa uo abana bakwe bapene babasende no kubashitisha mu busha. (2 Ishamfumu 4:1-7) Uyu mukamfwilwa akwete fye umutondo umo uunono uwa mafuta. Elisha amwebele ukwashima imitondo ku bena mupalamano bakwe, atile: “Washime iingi.” Yehova abomfeshe Elisha ukucita icipesha mano, aiswishe imitondo yonse iyo mukamfwilwa ayashime. Lyena mukamfwilwa ashitishe amafuta no kusangamo indalama ya kulipila inkongole no kuliishishamo ulupwa lwakwe.

Bushe finshi aba baleya muli bumishonari bengasambilila kuli ili lyashi? Pa kwashima imitondo, mukamfwilwa afwile talesalulula. Ba Ekrann batile: “Mukamfwilwa afwile aleashima fye umutondo uuli onse umwingekala amafuta, kabili nalimo imitondo iikulu e yawame.” Lyena ba Ekrann bakoseleshe abalepwisha isukulu ukulaitemenwa ukubomba imilimo iili yonse iyo babapeela nampo nga inono nelyo ikalamba. Babebele ukuti: “Mwilasala imilimo.” Kabili bacinkwileko abalepwisha isukulu ukuti, amapaalo mukamfwilwa apokelele yalingene ne fyo acitile pa fyo Elisha amwebele. Cinshi abalepwisha isukulu balingile ukusambililako? Amapaalo tukwata yalingana ne citetekelo twakwata ne fyo twaba abacincila mu  kubombela Lesa. Ba Ekrann baebele abalepwisha isukulu ukuti: “Mulebombesha.”

“Bali fye Nge ca Kulya Kuli Ifwe.” Ba William Samuelson, abangalila Dipartimenti Ilolekesha pa Masukulu ya Bulesa, e balandile ili lyashi ilyafumine pa Impendwa 14:9. Balandile pa ca kumwenako icisuma ica kwa Yoshua na Kalebu. Pali ili lembo, ishiwi lya kuti “ica kulya,” lyalelosha mu kuti abena Israele bali no kucimfya abena Kanaani ukwabula no bwafya ne ci cali no kukosha abena Israele. Cinshi abalepwisha isukulu bali no kusambililako? Ba Samuelson batile: “Ilyo mukalabomba umulimo wenu, nga mwakwata amafya mukaleyamona ukuti ni nshila ya kukoseshamo icitetekelo cenu.”

“Bushe Icitetekelo Cabo Cikakosa ica Kuti Bakacimfya na Mafya?” Ba Sam Roberson, bakafundisha ba pa Gileadi, balandile pa fyo umutumwa Paulo asokele ukuti bamo ‘balibunshishe icitetekelo cabo.’ (1 Timote 1:19) Bakoseleshe abalepwisha isukulu ukwafwa bambi ukukwata icitetekelo icakosa muli Yehova Lesa. Babebele ukuti: “Umulimo wenu waba kwati wa kwa kafula wa fyela.” Wapalana shani? Kafula wa fyela alengelela utufyela no kupanga umunyololo wa ku nanga uwingekasha bwino ubwato. E fyo na bamishonari bacita, balafwa abasambi ba Baibolo ukuba ne mibele Yehova atemwa iikabilwa pa kuti bakapusuke.

Ba Roberson bapashenye utufyela utupanga umunyololo ku mibele 8 iyalembwa pali 2 Petro 1:5-8. Batile nga ca kuti bamishonari baleafwa abasambi babo aba Baibolo ukwishiba ifyo Yehova alanga iyi mibele, abasambi babo bakaba ifibusa fyakosa ifya kwa Yehova. Bakashipikisha amafya yonse ayengesha icitetekelo cabo.

Ukushimika Ifyacitike mu Mulimo no Kwipusha Abapita Kale mu Sukulu

Ba Michael Burnett, bakafundisha na bambi, baebele abalepwisha Isukulu lya Gileadi ukushimika no kulangilila fimo ifyacitike ilyo baleshimikila. Abali mwi bumba balitemenwe nga nshi ukumfwa ifyo abalepwisha isukulu baleshimikila ku bantu pa matuuka, pa cibansa ca ndeke, ku ng’anda ne ng’anda, e lyo ne fyo bashimikile ku muntu uwalufyenye inambala pa kutuma foni.

Lyena ba Michael Hansen, ababa pa Bethel ya ku United States baipwishe bamunyina ababomba bumishonari pa myaka iingi, ba Stephen McDowell ku Panama, ba Mark Noumair ku Kenya, na ba William Yasovsky ku Paraguay. Ifyo bashimike fyalekomaila pa mutwe wa lyashi uwa kuti, “Ifya Kusanga Insansa mu Kucita Ukufwaya kwa kwa Yehova.” (Amalumbo 40:8) Ku ca kumwenako, ba Mark Noumair, balandile pa fintu ifyalengele ukuti bena na bena mwabo babe ne nsansa ilyo balebomba bumishonari. Ukuba ifibusa na bantu ba ku calo balebombela kwalebaletela insansa. Fimbi ifyalebalenga ukuba ne nsansa kumona aba bwananyina balekonka ifyo ukuteyanya kulefwaya, balealuka mu mikalile yabo, no kumona ifyo Yehova alepaala ukubombesha kwabo. Ba Noumair baebele abalepwisha isukulu ukuti ifili no kubalenga ukuba sana ne nsansa fintu fili ku ntanshi.

Ilyo umo pa bali mu kalasi lyalenga 131 abelengele kalata ya kutasha iyo abapwishishe isukulu balembele, Munyinefwe Lett asondwelele programu na mashiwi ya kukoselesha abalepwisha isukulu ukulabomba bwino. Atile nga bacite fi, “bakalenga umutima wa kwa Yehova ukusekelela.” Aba bamishonari bakalenga Yehova ukusekelela nga ca kutila bakatwalilila ukumubombela ne cishinka ku fyalo bakaya.—Esaya 65:19.

 [Charti/Mapu pe bula 31]

IFIPENDO FYA BALI MU KALASI

Bafumine mu fyalo: 10

Imyaka ya kufyalwa: 34.7

Imyaka baba mu cine: 19.0

Imyaka babomba mu mulimo wa nshita yonse: 13.5

[Mapu]

(Nga mulefwaya ukumona mapu, moneni muli magazini)

Babatumine ku fyalo ifili pe samba

IFYALO BABATUMINEKO

BENIN

BRAZIL

BULGARIA

BURUNDI

CAMEROON

CANADA

CENTRAL AFRICAN REPUBLIC

GERMANY

GHANA

HONG KONG

INDONESIA

KENYA

LIBERIA

LITHUANIA

MALAYSIA

MOZAMBIQUE

NEPAL

PANAMA

PARAGUAY

SIERRA LEONE

SLOVAKIA

SOUTH AFRICA

UNITED STATES OF AMERICA

VENEZUELA

[Icikope pe bula 30]

Abali mwi sukulu balelangilila ifyo cali ilyo baleshimikila

[Icikope pe bula 31]

Abapwishishe Isukulu lya Gileadi Ilyalenga 131

Ukupenda kutampiile ku ntanshi ukulola ku numa, amashina yena yatantikwe ukufuma ku kuso ukulola ku kulyo mu mulongo umo na umo.

(1) Lesch, C.; Lesch, N.; Shakarjian, P.; Shakarjian, T.; Budden, R.; Budden, K.; Nash, T.; Nash, L.

(2) Tremblay, E.; Tremblay, C.; Garvey, D.; Garvey, G.; Gaunt, R.; Gaunt, P.; Lau, J.; Lau, J.

(3) Davis, S.; Davis, S.; Sargeant, J.; Sargeant, J.; Fonseca, C.; Fonseca, S.; Thenard, E.; Thenard, A.

(4) Petratyotin, A.; Petratyotin, R.; Reyes, N.; Reyes, N.; Eisiminger, B.; Eisiminger, S.; Hacker, J.; Hacker, C.

(5) Hartman, E.; Hartman, T.; Goolia, W.; Goolia, K.; Thomas, J.; Thomas, E.; Okazaki, N.; Okazaki, M.

(6) Mills, C.; Mills, A.; Benning, L.; Benning, T.; Sobiecki, S.; Sobiecki, T.; Gagnon, L.; Gagnon, E.

(7) Hansen, B.; Hansen, M.; Fahie, A.; Fahie, M.; Dalgaard, J.; Dalgaard, J.; Andersson, M.; Andersson, R.