Sambilileni Icebo ca kwa Lesa

Busuma Nshi Bwaba mu Kukonka Amafunde ya kwa Lesa?

Ici cipande cilelanda pa mepusho ayo nalimo mufwaisha ukwishiba kabili cilemulanga na po mwingasanga amasuko muli Baibolo yenu. Inte sha kwa Yehova kuti shatemwa nga nshi ukulanshanya na imwe aya masuko.

1. Mulandu nshi tulingile ukulaumfwila Lesa?

Calilinga ukulaumfwila Lesa pantu e watupangile. Na Yesu aleumfwila Lesa lyonse. (Yohane 6:38; Ukusokolola 4:11) Nga tulekonka amafunde ya kwa Lesa, tulanga ukuti twalimutemwa.—Belengeni 1 Yohane 5:3.

Amafunde yonse aya kwa Yehova Lesa yalatunonsha. Yalatusambilisha ifyo twingekala bwino pali ino nshita ne fyo twingacita pa kuti tukekale umuyayaya ku ntanshi.—Belengeni Amalumbo 19:7, 11; Esaya 48:17, 18.

2. Bushe amafunde ya kwa Lesa yalenga shani ubumi bwesu ukuwama?

Ifunde lya kwa Lesa ililesha ukukolwa lilatucingilila ku malwele yabipisha na ku masanso. Ukukolwa kulalenga umuntu ukukunkuma no kulacita ifya buwelewele. (Amapinda 23:20, 29, 30) Yehova alitusuminisha ukunwa ubwalwa ubwalinga fye.—Belengeni Amalumbo 104:15; 1 Abena Korinti 6:10.

Na kabili, Yehova alatusoka ukukanaba no bufuba, icipyu ne mibele imbi iyabipa iingalenga ubumi bwesu ukukanaba bwino. Nga twabombesha ukukonka uku kufunda, ubumi bwesu bukawama.—Belengeni Amapinda 14:30; 22:24, 25.

3. Bushe amafunde ya kwa Lesa kuti yatucingilila shani?

Ifunde lya kwa Lesa lyalikaanya ubulalelale no bucende. (AbaHebere 13:4) Abaupana abakonka ili ifunde balacingilila icupo cabo kabili balakwata icupo icisuma umo bengakushisha abana babo bwino. Lelo mu kucita ubucende mulafuma amalwele, ukulekana, ulubuli, ukucula sana na matontonkanyo, e lyo mulafuma ne ndupwa sha bafyashi abashimbe.—Belengeni Amapinda 5:1-9.

Nga tuletaluka ku fintu ifingalenga twacita ubucende, te kuti tonaule bucibusa bwesu na Lesa. Na kabili te kuti tulenge bambi ukuculilamo.—Belengeni 1 Abena Tesalonika 4:3-6.

  4. Busuma nshi bwaba mu kukonka ifunde lya kucindika ubumi?

Abantu abacindika ubumi ubwaba bupe ukufuma kuli Lesa, balaba no bumi ubusuma nga baleka ukupeepa fwaka e lyo ne misango imbi iyonaula ubumi. (2 Abena Korinti 7:1) Lesa alicindika no bumi bwa mwana uushilafyalwa. (Ukufuma 21:22, 23) Kanshi tatufwile ukwipaya umwana uushilafyalwa ku mufulo fye. Kabili bonse abacindika ubumi nga filya Lesa abucindika balaicingilila ku fingaleta amasanso pa ncito, pa ng’anda, nelyo muli motoka. (Amalango 22:8) E lyo kabili tabangalako amangalo ayengafumamo imfwa, pantu ubumi bupe ukufuma kuli Lesa.—Belengeni Amalumbo 36:9.

5. Bushe ukukonka ifunde lya kuti umulopa wa mushilo kutunonsha shani?

Umulopa wa mushilo pantu Lesa atila wimininako umweo wa cintu icipeema. (Ukutendeka 9:3, 4) Ifunde lya kwa Lesa, ililangilila ukuti umulopa walyampana no mweo lilatunonsha. Litunonsha shani? Lilenga imembu shesu ukwelelwa.—Belengeni Ubwina Lebi 17:11-13; AbaHebere 9:22.

Umulopa wa kwa Yesu wali uwacindama nga nshi pantu ali uwapwililika. Yesu atuulile umulopa wakwe kuli Lesa, uwaleimininako umweo wakwe. (AbaHebere 9:12) Umulopa wakwe uwasumine walenga twaba ne subilo lya kuba no mweo wa muyayaya.—Belengeni Mateo 26:28; Yohane 3:16.

Nga mulefwaya ukwishibilapo na fimbi, belengeni ifipandwa 12 na 13 ifyaba muli citabo ca Bushe Cinshi Baibolo Isambilisha?, icalembwa ne Nte sha kwa Yehova.