Umuntu Onse Alingile Ukukwata Ishina

UMUNTU onse alingile ukukwata ishina. Mu Tahiti, na kanya ako bapoosa, ako abafyashi tabaishibikwa balakenika ishina. Iofesi ilisunga ifyalembwa fya mu calo lilenika ako kanya amashina yonse yabili.

Lelo, kwaliba umo, uo batana ishi nsambu isho bapeela umuntu onse isha kukwata ishina. Ca kupapa ukuti uo batana insambu, ni “Shifwe, kuli uyo ulupwa lonse mu muulu na pano isonde lwainikwako ishina!” (Abena Efese 3:14, 15) Abantu abengi balakaana ukulumbula ishina lya kwa Kabumba nge fyo lisangwa mu Baibolo. Balipyanikapo amalumbo ya kuti “Lesa,” “Shikulu” nelyo “Uushifwa.” Kanshi Kabumba nani ishina lyakwe? Kemba wa malumbo ayasuka ukuti: “Imwe mweka, ishina lyenu Yehova, mwapulamo pano isonde ponse.”—Amalumbo 83:18.

Ku kutampa kwa ba1800 ilyo bamishonari ba ku London Missionary Society bafikile mu Tahiti, abena Polynesia balepepa balesa abengi. Balesa balepepa bonse balikwete amashina yabo, ku ca kumwenako, balesa bacindike sana ni Oro na Taaroa. Pa kupusanya Lesa wa mu Baibolo kuli balesa bambi, balya bamishonari balelumbula sana ishina lya kwa Lesa ilyo bapilibwile ukuti Iehova mu ciTahitian.

Ili shina lyalishibikwe nga nshi kabili balelibomfya na mu milandile ya cila bushiku na mu kulembeshanya. Imfumu Pomare II iya ku Tahiti, iyatekele muli ba1800, yalibomfeshe sana ishina lya kwa Lesa mu fyalembwa fya iko. Ubushinino ni ubu busangwa muli iyi kalata mulemona pano iyalembulwilwe mu ciNgeleshi. Baisungila mu Cikuulwa basungila ifya kale ica mu Tahiti na mu fishi fya cilya calo. Ici cilangilila ukuti abantu pali ilya nshita balebomfya sana ishina lya kwa Lesa. Mu kulundapo ishina lya kwa Lesa lilasangwa imiku iingi muli Baibolo ya kubalilapo mu ciTahitian, iyo bapwile ukupilibula mu 1835.

[Icikope pe bula 32]

Imfumu Pomare II

[Abatusuminishe Ukubomfya Icikope pe bula 32]

King and letter: Collection du Musée de Tahiti et de ses Îles, Punaauia, Tahiti