Bushe Kwaba fye ‘Icalici Limo Ilya Cine’?

“APO kwaba fye Kristu umo, e fyo kwaba no mubili umo uwa kwa Kristu, Nabwinga umo uwa kwa Kristu: No yu ‘Licalici lya Katolika ilyatendekwe na batumwa.’”—Dominus Iesus.

E fyo shikofu mukalamba uwa mu Roma Katolika Joseph Ratzinger, abilishe pa cisambilisho ca ku calici ku mwabo icitila kufwile kwaba fye icalici limo ilya cine. Ne Calici ilyo, atile “Licalici limo ilya kwa Kristu, ilya Katolika.”

“Te Macalici Yene Yene”

Nelyo cingati Papa John Paul II apampamine ukulanda ati ifyebo fyali mu lupapulo lwa Dominus Iesus “te fya kuituntumba, nangu ukusuula amacalici yambi,” intungulushi sha macalici ya ciProtestanti shalifulilwe. Ku ca kumwenako, pa kukumana kwaliko ukwa ntungulushi she calici lya Presbyterian ku Northern Ireland, mu Belfast mu June 2001, shimapepo umo atile abalembele lulya lupapulo “kabungwe ka bantu ba maka kabili aba kaso mwi Calici lya Roma Katolika . . . abaletiina amaisosele yaletelwe ne cilye ca Vatican II.”

Robin Eames, Shikofu mukalamba uwa Church of Ireland, atile kuti “abipilwa sana” nga ca kuti lulya lupapulo “libwesha numa ku fyaliko ilyo icilye ca Vatican II tacilatekwa.” Ilyo Eames alelanda pa fyalandile ba Vatican ukuti amacalici ayasuusha ififundisho fimo ifye calici lya Katolika “ninshi te Macalici yene yene,” atile: “Musaalula ukulande fyo.”

Cinshi calengele ukuti ifyebo fyaba mu lupapulo lwa Dominus Iesus filembwe? Cimoneka kwati Ubutungulushi bwe calici lya Roma Katolika tabwatemenwe icisambilisho citila takwaba icine mu mipepele icapampamikwa, icine cashintilila fye pa muntu umo umo. Ukulingana na nyunshipepala ya The Irish Times, “ukwisa kwa masambililo ya fya mipepele ayasuminisha imipepele imbi mu bwikashi, ukuti amacalici yonse yaba fye cimo cine . . . e co Kardinala Ratzinger aletontonkanyapo fye lyonse.” Cilemoneka kwati ici e calengele ukuti alande fi pe calici limo ilya cine.

Bushe Kanshi Amacalici Yonse Te Yamo Yene?

Kwena, abantu bamo, kuti batemwapo isambilisho litila takwaba cine icapampamikwa nelyo ukulanda ati amacalici yonse yamo yene ukucila ukulanda ati kwaba fye icalici limo ilya cine. Aba bantu basumina ukuti umuntu e ufwile ukusala icalici alefwaya umwine. Batila, ‘na kuba, amacalici yonse yaba fye cimo cine.’

Kwati ifi e fyo abengi batemwa—nangu ca kuti cimo icafuma muli fi macalici ayengi nga nshi ukufuma mu macalici yambi. Abengi balanda  ati, ‘ukufula kwa macalici, e nshila yawamisha iya kulangilamo ubuntungwa bwa muntu ubwa kucita ico atemenwe.’ Lelo, ukulingana na kalemba wa lyashi, Steve Bruce, “ukufula kwa macalici” cimo no “kukana-angwako ku fya ku calici.”—A House Divided: Protestantism, Schism, and Secularization.

Bushe kanshi mimwene nshi iyalungama? Bushe kwaba fye icalici limo ilya cine? Bushe ilyo icalici Licalici lya Roma Katolika? Bushe amacalici yambi nayo yalisuminishiwa na Lesa? Apo aya mepusho yakumine ukwampana kwesu na Kabumba wesu, kanshi nacicindama ukumfwa ifyo alanda pali uyu mulandu. Bushe kuti twacita shani ifyo? Kumona mu Cebo capuutwamo ica kwa Lesa, Baibolo. (Imilimo 17:11; 2 Timote 3:16, 17) Natumone ifyo ilanda pali uyu mulandu uwe calici limo ilya cine.

 [Abatusuminishe Ukubomfya Icikope pe bula 2]

COVER: Mark Gibson/Index Stock Photography