UYU umwaice ulemona apa ali ne myaka 12. Yesu namwikata mu minwe, kabili banyina na bawishi beminine mupepi. Bushe nawishiba ico batemenwe sana? Leka tumone.

Yairo wishi wa uyu umukashana, ali uwacindama sana. Bushiku bumo umwana wa kwa Yairo aliwele, kabili balimulaalike pa busanshi. Lelo tapolele. Ubulwele bwakwe bwaleya bulekoselako fye. Yairo no mukashi wakwe balisakamene sana pantu balimwene ukuti umwana wabo alafwa. E mwana fye eka uo bakwete. E ico Yairo aile mu kufwaya Yesu. Alyumfwile ifipesha amano ifyo Yesu alecita.

Yairo asangile Yesu ali na bantu abengi sana. Lelo Yairo apitile mwi bumba no kuyawiila pa makasa ya kwa Yesu. Aebele Yesu ati: ‘Umwana wandi umwanakashi mulwele sana. Napapata, iseni mumuposhe.’ Yesu aebele Yairo ati nalaisa.

Ilyo Yesu na Yairo balepita, abantu balesunkana pa kuti bafike apali Yesu. Awe abantu bamwene fye Yesu aiminina no kwipusha ati: ‘Nani uwankumya?’ Yesu alyumfwile ukuti amaka yafuma muli ena, e co aishibiile ukuti kwali uwamukumishe. Nomba nani uwamukumishe? Mwanakashi uwalwele pa myaka 12. Alikumishe ku ca kufwala ca kwa Yesu kabili alipolele!

Ici calengele Yairo ukumfwa bwino pantu alimwene ukuti Yesu te kuti cimwafye ukuposha umulwele. Lelo kwaishile umuntu ukufuma ku ng’anda ya kwa Yairo no kweba Yairo ati: ‘Lekeni ukupamfya Yesu. Umwana wenu nafwa.’ Yesu alyumfwile ifyalandile uyu umwaume. E ico aebele Yairo ati: ‘Wisakamana, umwana obe alaba fye bwino.’

Ilyo bafikile ku ng’anda ya kwa Yairo, basangile abantu balelila pantu bali no bulanda sana. Lelo Yesu abebele ati: ‘Mwilalila. Umwana tafwile. Aleele fye utulo.’ Abantu batendeke ukuseka Yesu pantu balishibe ukuti umwana nafwa.

Yesu asendele bawishi na banyina ba mwana e lyo na batumwa bakwe batatu mu muputule umwaleele umwana. Yesu aikete umwana mu minwe no kumweba ati: ‘Buuka!’ Umwaice alibuukile nge fyo ulemona pa cikope. Kabili alimine no kutendeka ukwenda! E calengele banyina na bawishi batemwe sana.

Uyu te muntu wa kubalilapo uo Yesu abuushishepo. Uo abalilelepo ukubuusha, uo Baibolo yalandapo, mwana wa kwa mukamfwilwa uwaleikala mu musumba wa Naini. Pa numa, Yesu alibuushishe na Lasaro, munyina wa kwa Maria na Malita. Ilyo Yesu akalateka, akabuusha abantu abengi kabili bakaba no mweo na kabili. Bushe taumfwile bwino ukwishiba ifi?