KANNZƐ bɔbɔ ɲin kekle mɔ Adan nin Ɛvu be yoli’n ti’n, sa tɛ nin wie’n be bali mɛn’n nun’n, sanngɛ like nga Ɲanmiɛn sunnzunnin i klɔ sran’m be lika’n w’a kaciman. I nuan ndɛ’n nun’n, Ɲanmiɛn kɛnnin i kpɛ sunman kɛ like ng’ɔ sunnzunnin i klɔ sran’m be lika’n, saan ɔ́ yó.

• Jue Mun 37:29: “Mɛn’n ɔ́ yó sran kpa’m be liɛ. Bé trán nun tititi.”

• Ezai 25:8: “Ɔ́ núnnún wie’n mlɔnmlɔnmlɔn. Anannganman ɔ́ núnnún sran’m be kwlaa be ɲinmuɛn’n.”

• 1 Korɛntifuɛ Mun 15:26: “Kpɛkun ɔ́ núnnún e kpɔfuɛ kasiɛn mɔ yɛle wie’n.”

• Sa Nglo Yilɛ 21:4: “Wie’n su tranman lɛ kun, be su yoman sɛ kun, be su sunman kun, be su wunman ɲrɛnnɛn kun.”

?Wafa sɛ yɛ Ɲanmiɛn wá núnnún wie’n niɔn? Kɛ nga Biblu’n fa kan’n sa’n, ‘sran kpa’m bé trán asiɛ’n su tititi.’ Ɲanmiɛn Ndɛ kunngba’n se ekun kɛ: “Sran kun b’ɔ yo sa kpa lele guɛ i ti nin i bo’n, m’ɔ yoman sa tɛ kaan sa le’n, i sɔ nunman ɲanmiɛn’n bo wa.” (Akunndanfuɛ’n 7:20) Ɲanmiɛn kunndɛ kɛ ɔ́ núnnún wie’n, naan sran’m be ɲan nguan m’ɔ leman awieliɛ’n. ?I sɔ’n ti’n ɔ́ sé kɛ nán be mian be ɲin be nanti i mmla’m be su kun? Ɔ si’ɛ. Afin Biblu’n waan ‘Ɲanmiɛn [...] kwlá buaman ato.’ (Titi 1:2) ?Siɛn’n ngue yɛ Ɲanmiɛn wá yó naan like ng’ɔ sunnzunnin i klɔ sran’m be lika’n w’a kpɛn su-ɔ?

Like nga Zoova yoli naan y’a kwla ɲan e ti wie’n i sa nun’n, yɛle kɛ ɔ fɛli i wa’n kpɔli e ti. Kɛ be se kɛ be kpɔ sran kun ti’n, yɛle kɛ be man sika annzɛ like uflɛ naan sran sɔ’n ɲɛn i ti sa wie nun. Kɛ ɔ fin cɛn mɔ sa tɛ’n nin wie’n be bali’n, Ɲanmiɛn Ndɛ’n se kɛ: “Sran kun sa de i niaan uflɛ ɔ, ɔ yoman ye. Sran fi kusu kwlá manman Ɲanmiɛn i sika kɛ ɔ́ fá tó i bɔbɔ i ti. Sran kun i nguan’n i gua’n cɛnnin lele tra su, be kwlá ɲɛnmɛn i nuan sika naan b’a to.”​—Jue Mun 49:8, 9.

Kɛ sran kun wu’n, i bɔbɔ i sa tɛ ng’ɔ yoli be’n be ti kalɛ yɛ ɔ tua-ɔ. Ɔ maan ɔ kwlá tuaman sran uflɛ i sa tɛ liɛ’m be ti kalɛ. (Rɔmunfuɛ Mun 6:7) I sɔ’n ti’n ɔ fata kɛ sran nga fɔ nunmɛn i nun’n, ɔ fɛ i nguan’n fa kpɔ e ti naan y’a kwla fite nun.​—Ebre Mun 10:1-4.

I sɔ yɛ Ɲanmiɛn kusu yoli-ɔ. Ɔ sunmɛnnin i wa Zezi mɔ fɔ nunmɛn i nun’n asiɛ’n su wa naan ɔ fɛ i nguan kpɔ e ti. (1 Piɛli 2:22) Zezi bɔbɔ seli kɛ ɔ bali kɛ “ɔ́ fɛ́ i nguan’n mán naan ɔ́ kpɔ́ sran kpanngban be ti.” (Marki 10:45) Ɔ maan Zezi i wie’n ti’n cɛn kun’n, klɔ sran’m bé ɲán be ti sa tɛ’n nin wie’n be sa nun.​—Zan 3:16.

Andɛ’n, “lika’n wá yó kekle kpa.” I sɔ’n kle kɛ ndɛ nga Ɲanmiɛn kannin’n be su kpɛn su naan e o ‘mɛn’n i awieliɛ blɛ nun’ sakpa. (2 Timote 3:1) Mɛn’n i awieliɛ blɛ’n, ɔ́ wíe “cɛn nga bé wá bú be mɔ be ɲin yiman Ɲanmiɛn’n be fɔ mɔ bé núnnún be’n.” (2 Piɛli 3:3, 7) Blɛ sɔ’n nun’n, be nga be klo Ɲanmiɛn’n bé fíte nun kpɛkun bé ɲán “nguan m’ɔ leman awieliɛ’n.”​—Matie 25:46.

Sran miliɔn kpanngban kpa mɔ bé wá sá be sin nguan nun ekun’n, bé wá ɲán nguan m’ɔ leman awieliɛ’n. I nun mɔ Zezi ɔli klɔ nga be flɛ i kɛ Nainin’n su lɔ’n, ɔ yili i nglo kɛ ɔ kwla cɛn sran mun. Yɛle kɛ angbeti bla kun i wa yasua kunngba  cɛ’n, ɔ wuli. Kɛ Zezi wunnin bla’n, “ɔ yoli i annvɔ” naan w’a cɛn bla’n i wa’n. (Liki 7:11-15) I sɔ’n ti’n akoto Pɔlu seli kɛ: “N lafi Ɲanmiɛn su kɛ be nga be yoli sa kpa-o, be nga b’a yoman sa kpa-o, bé cɛ́n.” Sran cɛnlɛ’n, ɔ kle kɛ Ɲanmiɛn klo klɔ sran’m be sakpa.​—Sa Nga Be Yoli’n 24:15.

Sran miliɔn kpanngban kpa bé trán nguan nun tititi. I ti’n Biblu’n se kɛ: “Mɛn’n ɔ́ yó sran kpa’m be liɛ. Bé trán nun tititi.” (Jue Mun 37:29) Blɛ sɔ’n nun’n, kɛ ndɛ nga akoto Pɔlu kannin i afuɛ kɔe 2000 yɛ’n ɔ́ wá kpɛ́n su’n be aklunjuɛ yó dan. I waan: “?Wie, ɔ kwlalɛ’n wo nin? ?Wie, ɔ bɔyre’n wo nin?” (1 Korɛntifuɛ Mun 15:55) Ndɛ sɔ’n kle kɛ klɔ sran’m be ngba bé ɲán be ti wie’n m’ɔ ti be kpɔfuɛ’n i sa nun.