Somalna molo naeng marsitandaan hita tu sasahalak, pasti jolo tasukkun do, “Ise do goarmu?” Molo tasukkun goar ni Debata, aha ma didok Ibana?

“Au do Jahowa, i do goarhu.”—Jesaya 42:8.

Rikkot do goar i di Debata. Debata sandiri do na mambahen goarna. Didok Ibana, “I ma goarhu saleleng ni lelengna, jala marhite goar i ma tandaon ni sude jolma Au sian tikki tu tikki.” (2 Musa 3:15) Godang do gelar ni Debata disurat di Bibel songon Natumimbul, Ama, Tuhan manang Debata. Alai gumodang do goar ni Debata disuratton di Bibel. Jala gumodang do i disurat sian goar ni halak na asing songon si Abraham, si Musa, si Daud, manang Jesus. Alana lomo do roha ni Jahowa asa diboto halak goarna i. Didok do di Bibel, “Asa diboto nasida Ho do na margoar Jahowa, Holan Ho do Natumimbul di saluhut tano on.”—Psalmen 83:18.

Rikkot do goar i di Jesus. Di Tangiang Ale Amanami na diajarhon Jesus tu akka siseanna didok do, “Sai dipabadia ma goarmu!” (Mateus 6:9) Jala tikki martangiang Jesus tu Debata didok ibana do, “Ale Amang, pasangap ma goarmi.” (Johannes 12:28) Rikkot do pabadiahon goar ni Debata di Jesus. Alani i ma didok ibana di tangiangna, “Nungnga hupaboa goarmu tu nasida jala toktong dope paboaokku i.”—Johannes 17:26.

Rikkot do goar i di naposo ni Debata. Diboto naposo ni Debata najolo do ikkon mangasahon goar ni Debata nasida asa malua jala dilinggomi. Didok nasida do, “Dos songon menara na togu do goar ni Jahowa. Tusi do marlojong halak na tigor marroha  lao marlinggom.” (Poda 18:10) Jala didok do muse, “Malua do ganup halak na manjou goar ni Debata, i ma Jahowa.” (Joel 2:32) Goar ni Debata do na mambahen akka naposona berbeda sian bangso na asing. Didok di Bibel, “Sude bangso manomba debatana be. Alai anggo hita, Jahowa Debatanta do na tasomba saleleng ni lelengna.”—Mika 4:5; Ulaon ni Apostel 15:14.

Patuduhon Debata na songon dia Ibana. Godang pakar mandok goar ni Jahowa lapatanna, “Ibana Mambahen, Ibana Pasautton”. Dipaboa Debata Jahowa do lapatan ni goarna i tikki makkatai tu si Musa. Ninna Ibana do, “Boi do Au Mambahen Manang Aha pe na Huhalomohon.” (2 Musa 3:14) Molo diterjemahon ayat i sian bahasa Heber, lapatanna gabe “Boi do Au Gabe Manang Aha pe na Huhalomohon”. Sian on gabe taboto ma Ibana do na manoppa sude na adong di alam semesta on. Jala boi do ibana mambahen dirina dohot akka toppaanna gabe manang aha pe lao pasautton tujuanna. Sian gelar ni Debata, gabe taboto ma balga ni gogo dohot huasona. Alai molo sian goar ni Debata i ma Jahowa, gabe taboto ma Debata na songon dia Ibana jala aha na boi bahenonna.

Patuduhon na parduli do Debata tu jolma. Dipaboa Debata do ise goarna tu hita ala lomo rohana asa tatanda Ibana. Jala nungnga dipaboa Ibana hian goarna nang pe dang tasukkun dope i. Asing ni i, sian lapatan ni goarna i gabe taboto ma parduli do Debata tu sude toppaanna, termasuk ma hita. Jadi sian on gabe taboto ma, lomo do roha ni Debata asa jonok hita tu Ibana dos songon na marale-ale.—Psalmen 73:28.

Molo tapakke goar i, on patuduhon lomo rohatta jonok tu Ibana. Pasti lomo do rohamuna molo dijou donganmuna hamu mamakke goarmuna. Alai boha ma molo dang olo ibana mamakke goarmuna? Olo do ra gabe didok rohamuna, na so olo ibana jonok tu hamu. Dos songon i ma tong tu Debata. Nungnga dipaboa Jahowa ise goarna, jala dijujui do hita asa mamakke i. Jadi molo tapakke goarna i, on patuduhon na lomo do rohatta asa jonok tu Ibana. Jala sai diparrohahon Debata do “akka halak na mamikkiri goarna”.—Maleaki 3:16.

Asa boi takkas tatanda Debata, ikkon jolo taboto do goarna. Alai dang sae holan i. Porlu do taboto songon dia sifatna.