Nungnga Huboto be Ise na Boi Mambahen Keadilan di Portibi on

Songon na diceritahon si Ursula Menne

Molo huingot najolo, lomo hian do rohakku asa dibahen na adil tu sude halak. Jala asa unang adong na pilih kasih. Alani i ma gabe dipenjarahon ma au tu Jerman Timur Komunis. Jala gabe disi ma huboto, haduan adil do annon sude portibi on. Songon on ma ceritana.

TUBU di kota Halle Jerman do au taon 1922. Godang do catatan sejarah di kota on, lobi sian 1.200 taon. Hira-hira 200 kilometer ma dao ni kota Halle on sian barat daya Berlin. Jala sian najolo, nungnga adong hian agama Protestan di kota on. Adong do adekku, goarna si Käthe. Taon 1923 do ibana tubu. Tentara do bapakku jala omakku sahalak parende di teater.

Dos songon bapakku, lomo do rohakku asa adil dibahen tu sude halak. Dung ditinggalhon bapakku karejona gabe sahalak tentara, dituhor ibana ma sada tokko. Alai godangan na manuhor di tokko ni bapakku, akka na pogos do. Ala asi roha ni bapakku, gabe dilean ma nasida marutang. Alani burju ni bapakki, gabe bangkrut ma ibana. Sian pengalaman ni bapakku gabe huboto ma, molo holan burju do tu halak dang cukkup hape mambahen gabe dang adong be na so adil. Alai nang pe songon i, sai naeng ma nian didok rohakku asa dibahen na adil tu sude halak.

Songon omakku do au. Adong do di au bakat seni. Jala diajari omak do hami nadua dohot si Käthe taringot musik, ende, dohot tarian. Tabo do hami tikki dakdanak. Alai muba ma i sude di taon 1939.

Muba ma Sude

Dung tammat au sian sikkola dasar, masuk ma au tu sikkola menari balet. Disi diajari do au muse tarian Ausdruckstanz (tarian ekspresif), i ma tarian na paboahon perasaan dohot ekspresi. Si Mary Wigman ma guruna. Ibana ma pelopor ni tarian on. Di tarian on, ikkon dipaboa penarina do sian gerakanna songon dia perasaan ni penari i. Dung i, belajar melukis ma muse au. Jadi tikki remaja, bahagia do au, jala semangat do au belajar. Alai di taon 1939 masa ma Porang Dunia II. Asing ni i muse, di taon 1941 mate ma bapak alani TBC.

Gabe susa do sude alani porang on. Nang pe 17 taon dope umurhu tikki i, alai ro do tu pikkiranku mandok nga sursar be sude portibi on. Jala takkas do huida, akka halak pe gabe dohot do maniru kejam ni halak Nazi i. Alani i, gabe godang ma na mate, susa, jala hancur ma sude. Jabunami pe hona bom do di tikki porang i. Jala adong do piga-piga keluarganami na mate.

Dung sae porang i taon 1945, di kota Halle dope au, omak, dohot adekku si Käthe tinggal. Nungnga menikah au di tikki i jala nungnga adong borukku, alai poso-poso dope. Alai dang bahagia rumatangganami. Ujungna gabe berpisah ma hami. Jala karejo ma au gabe sahalak penari dohot pelukis asa boi memenuhi kebutuhanku dohot borukki.

Dung sae porang, dibagi ma Jerman gabe opat bagian. Molo di daerahnami, Uni Soviet ma na berkuasa. Alani i, gabe terbiasa ma hami diparetta pemerintahan Komunis. Di taon 1949, didok do daerahnami i Jerman Timur. Dung i gabe Republik Demokrasi Jerman (RDJ).

Tikki Pamarettaon ni Komunis

Di tikki i marsahit ma Omakku jala ikkon au do na mangurus. Karejo ma au di kantor pemerintahan daerah. Dung i huboto ma adong akka mahasiswa na memprotes ketidakadilan na masa di tikki i. Contohna, adong sahalak naposo na so boi masuk tu perguruan tinggi ala hea bapakna gabe anggota partai Nazi. Hutanda do ibana, alana sering do hami rap marmusik. Didok rohakku ma, ‘Boasa ibana na gabe susa, hape bapakna do na sala?’ Alani i, gabe dohot ma au demonstrasi. Di sada tikki, hulokkotton ma sada pamflet di tangga luar ni gedung pengadilan daerah.

Sekretaris ni Komite Perdamaian Regional do au. Jadi, au do na disuru mengetik akka surat. Alai di sada tikki, disuru ma au makkirim paket tu sahalak bawa naung matua na tinggal di Jerman Barat, asa dicurigai ibana na gabe bagian sian halak Komunis. Alai maralo do i tu rohakku. Alana didok rohakku, dang adil tindakan sisongon i. Jadi hutabunihon ma paket i di kantor. Ujungna, dang hea tarkirim paket i.

“Halak na Unjahat” Paboahon taringot Harapan

Di bulan Juni 1951, adong ma ro dua bawa tu kantorhu jala didok ma tu au, “Beta, ditahan ho.” Diboan nasida ma au tu penjara Roter Ochse, manang Sapi Merah. Sataon dukkon i, dibahen ma tuduhan na mangalo pemerintah au. Adong sahalak mahasiswa na paboahon tu polisi intel na au do na mangalokkotton pamflet i najolo. Dibahen ma persidangan. Alai holan formalitas do persidangan i. Alana tikki hubahen pembelaanku, dang ditanggapi. Divonis ma au onom taon penjara. Marsahit ma au tikki i jala dibahen ma au di bangsal rumah sakit penjara jala adong disi hira-hira 40 halak borua na asing. Tikki huida susa do nasida disi, gabe panik ma au. Lari ma au tu pintu jala hugurdaki ma pintu i.

Ninna penjaga penjara i ma tu au, “Naeng marhua ho?”

Gogo ma soarakku mandok, “Pakaluar au sian tempat on. Molo porlu, papinda ma au tu sel pengasingan. Asal ma unang di tempat on.” Alai dang ditanggapi penjaga penjara i au. Dung i, adong ma huida sahalak borua na asing sian akka borua na adong disi. Huida, tenang do ibana. Gabe hundul ma au di labbungna.

Didok ibana ma, “Dang mabiar ho hundul di labbungku?” Gabe tarsonggot ma au. Didok ibana ma muse, “Ala sahalak Saksi Jahowa do au, gabe didok do au halak na unjahat.”

Tikki i, dang huboto dope molo Saksi Jahowa i dianggap do musu ni Negara Komunis. Alai huingot tikki dakdanak au, hea do adong ro dua halak Siswa-Siswa Alkitab (goar ni Saksi Jahowa najolo) jotjot do ro nasida manjuppangi bapak. Jala ninna bapak do, “Siswa-Siswa Alkitab i do na sittong!”

Las do rohakku jala gabe manetek do ilukku dung pajuppang dohot borua on. Goar ni ibana, i ma si Berta Brüggemeier. Hudok ma tu ibana, “Paboa ma jo tu au taringot Jahowa.” Dukkon i, gabe sering ma hami rap jala sering ma hami martukkar pikkiran taringot Bibel. Asing ni i muse, huparsiajari ma taringot Debata na sittong, i ma Jahowa. Ibana Debata na parholong, adil, jala dame. Huparsiajari do muse, na lao padengganon ni Debata do sude na hancur na dibahen akka parjahat. Alana didok do di Psalmen 37:10, 11 “Satokkin nai, dang adong be akka parjahat. . . . Alai molo halak na lambok roha, dilehon do tano on gabe parbagianan ni nasida, marlas ni roha situtu ma nasida, ai dame do ngolu ni nasida.”

Bebas sian Penjara jala Melarikan Diri tu Jerman Barat

Dung dipenjarahon au lobi sian lima taon, dibebasson ma au di taon 1956. Lima ari dukkon i, melarikan diri ma au tu Jerman Barat rap dohot dua borukku si Hannelore dohot si Sabine. Dukkon i cerai ma au dohot suamikku jala pajuppang ma muse au dohot Saksi Jahowa. Dukkon marsiajar Bibel au, huboto ma godang dope hape na ikkon hupadenggan sian ngolukku asa boi hubahen las roha ni Jahowa. Ujungna, tardidi ma au di taon 1958.

Dukkon i, muli ma au muse tu sahalak Saksi Jahowa, goarna si Klaus Menne. Bahagia do rumatanggakku dohot si Klaus. Jala adong ma dua ianakkonnami, i ma si Benjamin dohot si Tabia. Alai 20 taon naung salpu, mate ma si Klaus alani kecelakaan. Jala dukkon i, gabe janda ma au sahat tu saonari. Alai, ala huboto dipahehe Debata do haduan halak naung mate jala mangolu salelengna di tano, gabe tarubati do lungun ni rohakku. (Lukas 23:43; Ulaon ni Apostel 24:15) Gabe lam tarubati do muse rohakku, alana gabe sisomba Jahowa do gellengku na opat on.

Ala marsiajar Bibel, gabe huboto ma holan Jahowa do na boi mambahen keadilan di portibi on. Dang songon jolma, diparrohahon Jahowa do sude situasitta, latar belakangta, dohot akka na denggan na so pola diparrohahon akka jolma sian hita. Ala marsiajar Bibel, gabe dame ma rohakku saonari, tarlumobi tikki huida dibahen akka na so adil manang tikki tu au dibahen na so adil. Didok di Parjamita 5:8, “Molo diida ho halak na pogos disiksa halak, dibahen ibana na so tigor dohot na so sittong di hutam, unang ma tarsonggot ho mangida i. Ai adong do pejabat tinggi na mengawasi ibana. Jala adong do na untimbo sian nasida sude.” Hata “na untimbo” na didok di ayat on, maksudna i ma Debatatta. Jala didok do muse di Heber 4:13, “Sude do takkas tarida jala bukka di jolo ni Debata na manguhumi hita sesuai tu parniulaotta.”

Kenangan Saleleng 90 Taon on

Sipata, olo do adong na manukkun tu au, songon dia do pakkilalaanku tikki pamarettaon ni Nazi dohot Komunis. Jadi hudok do, susa do ngolukku di tikki pamarettaon Nazi dohot tikki pamarettaon ni Komunis. Jadi manang songon dia pe pamarettaon ni jolma, dibahen pe pamarettaon ni Nazi manang Komunis, alai molo jolma dope na mamaretta donganna jolma, dang sanggup jolma mamaretta dirina sandiri. Alana takkas do didok di Bibel, “Gabe susa do molo jolma na mangarajai jolma.”​—Parjamita 8:9.

Tikki poso dope au, berharap do au asa boi adil sude dibahen pamarettaon ni jolma. Alai saonari gabe huboto ma, holan Debata do na boi mambahen adil di portibi on. Jala lao musnahononna do sude akka na jahat. Jala dipillit Ibana do Jesus lao mamaretta di tano on. Alana, sai diparrohahon Ibana do sude aha na porlu di hita. Didok Bibel do taringot Jesus, “Holong do roham tu na sittong jala magigi do roham mangida hajahaton.” (Heber 1:9) Mandok mauliate do au tu Debata, ala Jesus do annon na mamaretta. Jala mangolu salelengna do annon au di pamarettaonna!

[Gambar]

Rap dohot dua borukku si Hannelore dohot si Sabine dung sahat hami di Jerman Barat

[Gambar]

Saonari, au dohot anakku si Benjamin dohot istrina si Sandra