Lomo do roha ni halak Parise dipuji halak. Diulahon nasida pe na denggan, asa diida halak do i. Di inganan na rame do nasida martangiang. Dihapal nasida do tangiang na ganjang jala i do na sai didok nasida tingki martangiang di sinagoga manang di inganan na rame. Alani i, gabe tarsonggot ma angka halak tingki didok Jesus, ‘Unang ma songon halak Parise hamu martangiang. Dirimpu nasida do lomo roha ni Debata ala ganjang tangiang ni nasida, hape ndang. Unang ma tatiru nasida. Alana, lomo do roha ni Jahowa mamboto na di bagasan rohanta.

‘Songon on ma hamu martangiang: “Ale Amanami na di banua ginjang, sai dipabadia ma goarmu. Sai ro ma Harajaonmu. Sai saut ma lomo ni roham di tano on songon na di banua ginjang.”’ Didok  Jesus muse, boi do martangiang asa adong sipanganon sadari i, asa disesa dosa, dohot manangiangkon na asing.

Jesus mandok, ‘Sai martangiang ma hamu. Pangido ma angka na denggan sian Jahowa Bapakmuna. Dilehon natua-tua do angka na denggan tu gellengna. Molo dipangido gellengmuna roti, batu do na dilehon hamu? Molo dipangido dengke, ulok do na dilehon hamu?’

Dung i dipaboa Jesus ma parsiajaranna, ‘Haru hamu, diboto hamu do mangalehon na denggan tu gellengmuna. Apalagi ma Jahowa Bapakmuna, dilehon Ibana do tondi parbadia molo dipangido hamu tu Ibana.’ Diulahon ho do na didok Jesus i? Aha ma na ditangiangkon ho?