Ngandak bôt i ngwés bé bégés Djob inyule i ñôm nye nsohi ngéda ba mboma mandutu.

Baéga bibase ba niiga le Djob nyen a mboñ le bôt ba nok ndutu. Kiki hihéga, bahogi ba nkal le:

• Djob a nkogse bôt ni njel bikuu.

• Boñge ba nwo inyule Djob a gwé ngôñ ni ngandak biañgel nyoo i ngii.

• Djob nyen a neebe le bôt ba jo gwét bi bi nlona ngandak mandutu.

Ndi baa, baéga bibase ba ñôbôs jôl li Djob? Baa, di nla bôdôl bo ñem ibale ba ntembee hala inyu Djob?

Djob bé nyen a mboñ le bôt ba nok ndutu.

Hala a nkiha bé ni bilem bi Djob Bibel i nyeelene bés. KiKi hihéga:

“Manjel [ma Djob] momasôna ma téé sép. . . . A yé sép, a kôdi bé.”​—NDIIMBA MBÉN 32:4.

“Hala a ba yaga nonok ni Nyambe le a boñ biyabda, to ni Nu Ngui yosôna le a boñ biyôgda!”​—HIÔB 34:10.

“Nu Ngui yosôna ki a ta bé le a kôde nkaa.”​—HIÔB 34:12.

Djob a nkolba bibase bi bi ñôbôs nye jôl.

Hala a mbéñge yak bibase bi bi niiga le Djob nyen a mboñ le bôt ba nok ndutu, yak bibase bi bi nit gwét ni bisañ.

“Bapôdôl ba mpot bindéé bi bitembee i jôl [Djob] jem. Me bi om bé me bo, to kiñ me bi ti bé me bo, to pôdôs me bi pôdôs bé me bo. Ba mpôdôl bé ni yiinda i bitembee, ni . . . mandon ma miñem nwap nwomede.”​—YÉRÉMIA 14:14.

Yésu a bi yelel bihéñba bi bibase.

“Ha hiki mut bé nu a nsébél me le: ‘A Nwet, a Nwet,’ nyen a’ jôp i Ane ngii, ndi ndik nu a mboñ sômbôl i Tata wem nu a yé i ngii. Ngandak y’a kal me i kel i le: ‘A Nwet, a Nwet, baa di ba bé bapôdôl i jôl joñ, di pémhak mimbuu mimbe i jôl joñ, di boñok ki ngandak bihélha bi mam i jôl joñ?’ Ha nyen m’a timbhe bo le: ‘Me ma yi bé me bé! Nyodna me ha, a bé bagwelnson ba liyanmbén!’”​—MATÉÔ 7:21-23.