Uli bukuné ené, ragané suba malajah yén Cakepan Suci liu misi prinsip ané maguna buat kaidupan ragané lan kluargan ragané. Yehuwa kayun apang ragané bagia. Ida majanji yén ragané ngutamaang ibadat kapéning Yehuwa, ”saluiring ane lenan ane buatang cening bakal paicayang Ida.” (Matius 6:33) Ida kayun apang ragané dadi sawitran Idané. Anggonja sabilang kesempatan ané ada buat mupuk hubungan ané ngancan akrab kapéning Yehuwa. Tuah ené dogén hak istimewa ané paling gede ané gelahang iraga.—⁠Matius 22:37, 38.

APA AJAHAN CAKEPAN SUCI:”Ulun bakal dadi Ajin kitane, tur kita bakal dadi pianak Ulune eluh muah muani. Aketo sabdan Ida Sang Panembahan.” (2 Korintus 6:18) Ida seneng yén ragané dadi sawitran Idané. Carané, ngastawaja tekéning Ida. Yehuwa ngundang ragané apang ”tan rered-rered ngastawa.” (1 Tesalonika 5:17) Ida nyadia ningehang apa ané kenehang ragané lan apa kasumangsayan ragané. (Pilipi 4:⁠6) Dugas ragané ngastawa ajak kluargané, ia lakar nawang amongkén nyatané Tuhan buat ragané.

Lénan tekén ngastawa, ragané perlu madingehang Ida. Carané, plajahin Sabdan Ida lan buku-buku ané madasar baan Cakepan Suci. (Kidung 1:1, 2) Resepang apa ané suba kaplajahin. (Kidung 77:11, 12) Madingehang Ida masih maarti ragané rutin teka ka pasamuan-pasamuan Kristen.—⁠Kidung 122:1-4.

Nyeritaang unduk Yehuwa tekén anak lénan penting buat nguatang hubungan ragané sareng Yehuwa. Yén sesai malaksana buka kéné, ragané lakar marasa ngancan paek ajak Ida.—⁠Matius 28:19, 20.

ANÉ BISA KAJALANANG:

• Sabilang wai sediaang waktu buat maca Cakepan Suci lan ngastawa

• Utamaang kerohanian kluargané bandingang tekén hiburan lan rekreasi

APA AJAHAN CAKEPAN SUCI: ”Tangkilinja Ida Sang Hyang Widi Wasa, tur Ida pacang rauh nganampekin parasemeton.” (Yakobus 4:⁠8) Ragané perlu ngaé jadwal lan jalanang jadwalé ento apang ibadat kluargané teratur. (Purwakaning Dadi 18:19) Kéwala, ento dogén tusingja cukup. Tuhan patutné dadi bagian di idup ragané sadina-dina. Kuatang hubungan kluargan ragané sareng Tuhan. Carané, terus ceritaang unduk Ida ”ring jumahan wiadin ring jabaan umah semetone. Rikala semeton mararian wiadin makarya.” (Pangeling-eling 6:6, 7) Gelahang tetujon patuh buka Yosua, ané ngorahang: ”Pabuat tiang miwah kulawargan tiange, tiang wantah jaga astiti bakti ring Ida Sang Hyang Widi Wasa kewanten.”—⁠Yosua 24:⁠15.

ANÉ BISA KAJALANANG:

• Biasaang ngomongang apa kaperluan anggota kluargané lan apa masalahné