Јеһованын Шаһидләри ад ҝүнләрини гејд етмирләр, чүнки биз инанырыг ки, бу кими мәрасимләрдән Аллаһ разы галмыр. Мүгәддәс Китаб ад ҝүнү кечирмәји ачыг-ашкар гадаған етмәсә дә, көмәк едир ки, бу мәрасимләрин сәҹијјәви ҹәһәтләри һагда фикирләшәк вә Аллаһын буна мүнасибәтини өјрәнәк. Ҝәлин ашағыдакы дөрд амили вә Мүгәддәс Китабын бунунла бағлы принсипләрини арашдыраг.

1. Ад ҝүнүнүн көкү бүтпәрәстликлә бағлыдыр. Бир лүғәтә әсасән, ад ҝүнүн көкү мүәјјән инанҹларла бағлыдыр. Лүғәтдә гејд олунур ки, һәмин ҝүнү «пис руһи гүввәләрин ад ҝүнү олан адамлара һүҹум етмәк фүрсәти олур», «достларла бир јердә олмаг, хош арзулар демәк ону бу мәнфи тәсирләрдән горујур» («Funk & Wagnalls Standard Dictionary of Folklore, Mythology, and Legend»). Бир китабда исә дејилир ки, гәдим дөврләрдә ад ҝүнләри илә бағлы гејдләр «астролоҝијанын сирли елминә» әсасланан «улдуз фалынын тәртиб олунмасында хүсусилә ваҹиб иди». Һәмчинин китабда вурғуланыр ки, «бир халг инанҹына ҝөрә, ад ҝүнү шамларында арзуларын јеринә јетмәси үчүн хүсуси сеһрли ҝүҹ вар» («The Lore of Birthdays»).

   Анҹаг Мүгәддәс Китаб сеһрбазлығы, фалчылығы, ҹиндарлығы вә ја бу кими шејләри мүһакимә едир (Ганунун тәкрары 18:14; Галатијалылара 5:19—21). Аллаһын Бабил шәһәрини мәһв етмәсинә сәбәб орада јашајан инсанларын фалчылығын бир нөвү олан астролоҝија илә мәшғул олмалары иди (Әшија 47:11—15). Јеһованын Шаһидләринин ишләри-ҝүҹләри һәр адәт-әнәнәнин көкүнү арашдырмаг дејил, амма Мүгәддәс Китабда белә шејләрә даир ҝөстәришләр оланда ҝөз јуммурлар.

2. Еркән мәсиһиләр ад ҝүнләрини гејд етмирдиләр. «Уорлд Бук» енсиклопедијасында дејилир: «Онлар ад ҝүнләринин гејд олунмасына бүтпәрәст адәт-әнәнә кими бахырдылар». Мүгәддәс Китабда ҝөстәрилир ки, бирбаша Иса тәрәфиндән тәлим алан һәвариләр вә диҝәрләри бүтүн мәсиһиләрин изләмәли олдуглары нүмунә гојмушдулар (2 Салоникилиләрә 3:6).

3. Мәсиһиләрин кечирилмәли олдуглары бир анма мәрасими вар, о да доғум ҝүнү јох, Иса Мәсиһин өлүм ҝүнүдүр (Лука 22:17—20). Бу һеч дә тәәҹҹүблү дејил, чүнки Мүгәддәс Китабда дејилир: «Өлүм ҝүнү доғум ҝүнүндән јахшыдыр» (Ваиз 7:1). Иса Мәсиһ һәјатынын сон ҝүнүндә Аллаһын јанында јахшы ад газанмагла өз өлүм ҝүнүнү доғум ҝүнүндән даһа өнәмли етмишди (Ибраниләрә 1:4).

4. Аллаһын хидмәтчиләриндән киминсә ад ҝүнү кечирдији Мүгәддәс Китабын һеч бир јериндә јазылмајыб. Бу о демәк дејил ки, буну јазмаг јаддан чыхыб, чүнки Мүгәддәс Китабда Аллаһа хидмәт етмәјән ики инсанын ад ҝүнүндән бәһс едилир. Бу һадисәләрин һәр икиси дә пис тәрәфдән тәгдим олунуб (Јарадылыш 40:20—22; Марк 6:21—29).

Валидејнләри Јеһованын Шаһиди олан ушаглар ад ҝүнләрини гејд етмәдикләринә ҝөрә өзләрини нәдәнсә мәһрум едилмиш һисс едирләр?

Бүтүн јахшы валидејнләр кими Јеһованын Шаһидләри дә ил әрзиндә һәдијјәләр вермәклә вә әјләнҹәли ҝөрүшләр кечирмәклә өвладларына олан мәһәббәтләрини тәзаһүр етдирирләр. Онлар һәр заман бәндәләринә јахшы шејләр верән Јеһова Аллаһын гүсурсуз нүмунәсини изләјирләр (Мәтта 7:11). Ашағыдакы сөзләрдән ҝөрүндүјү кими валидејнләри Јеһованын Шаһиди олан ушаглар өзләрини нәдәнсә мәһрум һисс етмирләр:

• «Адам ҝөзләмәдији бир вахтда һәдијјә аланда чох севинир» (Теми, 12 јаш).

• «Валидејнләрим ад ҝүнүмдә һәдијјә алмасалар да, башга вахт алырлар. Бу, чох хошума ҝәлир, чүнки мәним үчүн сүрприз олур» (Григори, 11 јаш).

• «Он дәгигә, бир аз кекс, бир дә мусиги — буна әјләнҹә дејирсиниз? Бизә ҝәлин, әсил әјләнҹәнин нә олдуғуну ҝөрүн!» (Ерик, 6 јаш)