НЈУ-ЈОРК. Јерли дөвләт мәмурлары мүһүм сәнәди тәсдиг етдикдән сонра 2013-ҹү ил ијулун 29-у, базар ертәси Јеһованын Шаһидләри рәсми олараг Уорвикдә јени баш идарәләринин тикинтисинә башладылар.

Чәршәнбә ҝүнү, ијулун 17-дә Уорвик Шәһәрсалма вә Архитектура Комитәси Јеһованын Шаһидләринин үмумдүнја баш идарәсинин јени торпаг саһәсиндә објектләрин јерләшдирилмәси илә бағлы планы јекдилликлә тәсдиг етди. Тикинтијә башламаг үчүн иҹазә алмаздан өнҹә тәсдиг едилмәли олан сон сәнәд бу иди. Бу сәнәд Шаһидләрин һәмин әразини алмаларындан дүз 4 ил сонра, 17 ијул 2009-ҹу ил тарихиндә тәсдиг едилди. Ијулун 26-сы, ҹүмә ҝүнү тикинтијә башламаг үчүн илк иҹазә алындыгдан сонра ајын 29-у тикинтијә һазырлыг вә тәмәлгазма ишләринә башланылды.

Шаһидләрин һазырладығы тикинти планында тәбиәтин имканларындан јарарланмаг нәзәрдә тутулмушду, бу амил Шәһәрсалма вә Архитектура Комитәсинин тикинти планыны јекдилликлә тәсдиг етмәсиндә мүһүм рол ојнамышды. Мәсәлән, тәбиәти горумаг үчүн ҝөрүләҹәк ишләрдән бири ерозија-нәзарәт чәпәринин чәкилмәсидир. Бу чәпәр һәм дә зынгыровлу илан кими һејванлары тикинти саһәсиндән узаг тутараг вәһши тәбиәти горумаға хидмәт едәҹәк.

Јеһованын Шаһидләринин нүмајәндәси Ричард Дивајн дејир: «Уорвик шәһәринин мәмурлары илә бирҝә лајиһәнин ирәлиләмәсиндә әмәкдашлыг етмәк бизим үчүн чох хошдур. Шәһәрсалма вә Архитектура Комитәсинин тикинти планыны тәсдигләмәси үмумдүнја баш идарәмизин Бруклиндән Уорвикә көчүрүлмә ишләринин ирәлиләмәсиндә бөјүк рол ојнајыр». Тикинти комитәсинин диҝәр үзвү олан Енрике Форд әлавә едир: «Ијул ајында тикинти планынын тәсдигләнмәси вә хүсуси иҹазәнин алынмасы һәдәфимизә доғру — дөрд илә тикинти лајиһәсини баша чатдырмаг үчүн ҹәдвәл үзрә атылан илк ваҹиб аддым иди».

Бу әмлак 1960—1987-ҹи илләрдә Бејнәлхалг Никел Ширкәтинә мәхсус олуб вә ширкәтин баш идарәси, еләҹә дә тәдгигат вә инкишаф мәркәзи кими фәалијјәт ҝөстәрмиш, һәмчинин мүхтәлиф мәгсәдләр үчүн истифадә олунмушдур. Дөрд ил истифадәсиз галдыгдан сонра әразини тәләбә шәһәрҹији етмәк үчүн Крал Коллеҹи алды. Амма бу лајиһә һәјата кечирилмәди. Әрази 2009-ҹу илә кими, јәни Јеһованын Шаһидләри алана кими тәхминән 20 ил истифадәсиз галды.

Әлагә үчүн:

Бејнәлхалг: мәлумат хидмәти, Ҹ. Р. Браун, тел.: +1 718 560 5000