АЛЛАҺ Өз хидмәтчиләрини хәбәрдар етмишди ки, иман сынағына мәруз галаҹаглар. Онун Кәламында дејилир: «Ајыг дурун, сәрвахт олун. Дүшмәниниз Иблис нәрилдәјән шир кими ҝәзиб удмаға адам ахтарыр» (1 Бутрус 5:8). Бәс Шејтан иманынызы неҹә мәһв етмәјә чалышыр?

Шејтан башгалары, һәтта әзизләриниз васитәсилә сизә тәсир ҝөстәрә биләр ки, Мүгәддәс Китабы арашдырмајасыныз. Бу барәдә Иса Мәсиһ демишди: «Инсанын дүшмәнләри өз евиндәкиләр олаҹаг» (Мәтта 10:36). Хошнијјәтли аилә үзвләриниз вә достларыныз Аллаһын Кәламында јазылан ҝөзәл һәгигәтләрдән хәбәрсиз ола биләрләр. Јахуд онлар башгаларынын нә дүшүнәҹәјиндән еһтијат едә биләрләр. Бунунла белә, Мүгәддәс Китабда дејилир: «Инсан горхусу тәләдир, амма Јеһоваја ҝүвәнән һифз олар» (Мәсәлләр 29:25). Неҹә дүшүнүрсүнүз, сиз инсанлары разы салмаг үчүн Мүгәддәс Китабы өјрәнмәји дајандырсаныз, Аллаһ сиздән разы галар? Әлбәттә, јох! Диҝәр тәрәфдән, иманла даврананда Аллаһ бизә көмәк едир. «Биз исә ҝери чәкилиб мәһв оланлардан дејилик, иман едиб һәјатыны горујанларданыг» (Ибраниләрә 10:39).

Әввәлки бөлмәләрдән бириндә ады чәкилән Һәбибин һадисәсини јадыныза салын. Әввәлҹә һәјат јолдашы иманына ҝөрә она истеһза едирди. Лакин сонрадан өзү дә Аллаһын Кәламыны өјрәнмәјә башлады. Әҝәр сиз дә дүзҝүн оланы етмәјә давам етсәниз, достларыныз вә јахынларыныз Мүгәддәс Китабы өјрәнмәк истәјә биләрләр. Чох вахт әсл иман ҝөстәрәнләрин аилә үзвләри онларын исмәтли јашајышыны вә дәрин һөрмәтини ҝөрүб сөзсүз фәтһ едилирләр (1 Бутрус 3:1, 2).

Һәмчинин Шејтан инсанларда белә бир фикир јаратмаға чалышыр: ҝуја онлар о гәдәр мәшғулдур ки, Мүгәддәс Китабы өјрәнмәјә вахтлары јохдур. Бундан савајы, о истәјир ки, һәјатын гајғылары — шәхси нараһатчылыглар вә мадди чәтинликләр Аллаһын сөзүнү боғсун, јәни сизин иманыныз бар ҝәтирмәсин (Марк 4:19). Чалышын, узагҝөрән оласыныз! Мүгәддәс Китабда дејилир: «Әбәди һәјат одур ки, Сәни, тәк ҝерчәк Аллаһы вә ҝөндәрдијин Иса Мәсиһи танысынлар» (Јәһја 17:3). Бәли,  Аллаһ вә Иса Мәсиһ һаггында билик алмаға давам етмәк Ҹәннәтдә әбәди һәјата наил олмаг үчүн ваҹибдир!

Мисирдә падшаһ сарајында јашајан Муса һаггында дүшүнүн. О, вар-дөвләт, шан-шөһрәт вә һакимијјәт саһиб ола биләрди. Анҹаг Муса «ҝүнаһдан мүвәггәти һәзз алмагданса, Аллаһын халгы илә бирликдә әзијјәтә гатлашмағы үстүн тутду». Нәјә ҝөрә? «Чүнки Ҝөзәҝөрүнмәзи ҝөрүрмүш кими мәтин иди» (Ибраниләрә 11:24, 25, 27). Бәли, Мусанын Аллаһа ҝүҹлү иманы варды. О өз худбин арзуларыны јох, Аллаһын истәјини биринҹи јерә гојурду, Аллаһ да она бол-бол немәтләр нәсиб едирди. Әҝәр сиз дә Аллаһын ишини биринҹи јерә гојсаныз, Аллаһ сизә дә немәтләр верәҹәк.

Шејтан сизә мүхтәлиф үсулларла һүҹум етмәјә чалыша биләр. Еһтијатлы олун ки, онун гурбанына чеврилмәјәсиниз. Аллаһын Кәламы бизи тәшвиг едир: «Иблисә мүгавимәт ҝөстәрин вә о, сиздән гачаҹаг» (Јагуб 4:7). Бәс она гаршы дурмаг үчүн нә едә биләрик?

Мүгәддәс Китабы арашдырмаға давам един. Аллаһын Кәламыны һәр ҝүн охујун. Онун тәлимләрини арашдырын вә мәсләһәтләрини тәтбиг един. Белә етмәклә сиз «Аллаһын вердији бүтүн јараглары» ҝөтүрмүш олаҹагсыныз (Ефеслиләрә 6:13).

Һәгиги имана саһиб олан инсанларла отуруб-дурун. Мүгәддәс Китабы охујан, арашдыран вә онун мәсләһәтләринә әмәл едән инсанлары ахтарыб тапын. Онлар бир-бирләрини мәһәббәтә вә јахшы ишләрә тәшвиг едир вә руһландырырлар. Онлар сизә дә иманынызы мөһкәмләндирмәјә көмәк едәҹәкләр (Ибраниләрә 10:24, 25).

Јеһова Аллаһа јахынлашын. Аллаһдан көмәк диләјин вә Она етибар един. Һеч вахт унутмајын ки, Аллаһ сизә көмәк едәҹәк. «Бүтүн гајғыларынызы Онун [Аллаһын] үзәринә гојун» (1 Бутрус 5:6, 7). «Үзләшдијиниз сынагларда гејри-ади бир шеј јохдур, һамы белә сынагларла үзләшир. Анҹаг Аллаһ вәфалы Аллаһдыр, О гојмаз ки, сиз ҝүҹүнүз чатмајан сынаглара мәруз галасыныз. Сынаг вахты дөзә биләсиниз дејә, сизә чыхыш јолу да ҝөстәрәҹәк» (1 Коринфлиләрә 10:13).

Шејтан иддиа едир ки, ағыр сынагларла үзләшәнләрдән һеч ким Аллаһа хидмәт етмәјәҹәк; бунунла да о, Аллаһа истеһза едир. Амма сиз Шејтанын јаланчы олдуғуну сүбут едә биләрсиниз! Аллаһ дејир: «Оғлум, һикмәтли ол, гәлбим севинсин, Мәнә мејдан охујана ҹаваб верә билим» (Мәсәлләр 27:11). Бәли, әсл имана саһиб олдуғунузу ҝөстәрмәјә гәти гәрарлы олун!