1. Jerusalenajj tʼunjaskäna uka tiemponjja, ¿kunas pasäna?

KHÄ 607 nayrïr pacha maranjja, Nabucodonosor II reyimpi ejercitopampiw Jerusalén marka qʼal tʼunjapjjäna. Uka toqetjja, Bibliajj akham siwa: “Templo pachparuwa waynanakarojja cuchillompi jiwarayäna, janiw khititsa khuyaptʼayaskänti waynanakatsa, tawaqonakatsa, awkinakatsa, cojonakatsa. [...] Ukjjarusti Diosan templopjja phichhantapjjänwa, Jerusalenan perqanakapsa tinkjayapjjänwa, palacionakaparusa ninampiw phichhantapjjäna, ukatsti taqwa tukjapjjäna kunatejj wali jila alanïkänsa ukana[ka]” sasa (2 Cró. 36:17, 19).

2. ¿Kunsa Diosajj nayratpach sisjjäna, ukat kunas judionakar pasäna?

² Jerusalenan tʼunjäwipat judionakajj nayratpachaw yatjjapjjäna. Walja maranak nayrajja, profetanakap toqew Diosajj jupanakaru akham sisjjäna: ‘Jan istʼapjjetäta ukhajja, babilonionakaw tukjapjjätam’ sasa. Qhepat ukhamapunïnwa, walja judionakaw jiwayata uñjasipjjäna, yaqhepasti Babiloniar apataw uñjasipjjarakïna (Jer. 15:2). ¿Yaqha markan jakañajj  kunjamänsa? ¿Cristianonakajj ukhamanakan uñjasipjjpachänti? ¿Kunapachas ukhaman uñjasipjjpachäna?

3. Egipto markat sipansa, ¿kunjamsa israelitanakajj Babilonian jakasipjjäna?

³ Babilonia markar apata uñjasipjjäta ukhajja, ukar yatinoqtasin sum jakasiñatakiw chʼamachasipjjañama sasaw Diosajj judionakar säna. Jeremías profeta toqejj akham sänwa: “Utanaka utachasipjjam, sum chhijnoqtapjjarakim, frutanak achuri qoqanak ayrusipjjam, uka frutanakapa manqʼasipjjarakim. Kawkïri markarutejj nayajj apayapksma uka markan askipataki irnaqapjjarakim, uka markatakisti nayat mayipjjarakita, uka markan sumankañapatwa jutarakini jumanakatakejj sumankañajja” sasa (Jer. 29:5, 7). Khitinakatï uka arunakar istʼapkäna ukanakajja, sumakiw yaqha markan jakasipjjäna. Babilonionakajja, munañaparjam sarnaqapjjañapatakiw judionakar jaytapjjäna. Yaqha markarus jan jarkʼataw sarapjjäna. Uka tiemponjja, walja cheqanakatwa alasirisa, aljasiris Babiloniar sarapjjerïna. Judionakajj negocionak lurañsa, cosasanak lurañsa yateqapjjänwa sasaw nayra qellqatanakajj qhanañchi. Ukhamïpanjja, judionakajj wali utjirinïpjjänwa. Ukhamasti, israelitanakajj Babiloniar apatäsinjja, janiw Egipto markanjam tʼaqhesipkänti (Éxodo 2:23-25 liytʼañataki).

4. Judionakamp chikajja, ¿khitinakas tʼaqhesipjjäna, ukat kunas jupanakatakejj chʼamakïna?

⁴ Babiloniar apatäpkäna uka judionak taypinjja, Diosar taqe chuyma serviri judionakaw utjäna. Jupanakajj janis kuna jan walsa lurapkchïnjja, mayninakamp chikaw tʼaqhesipjjäna. Babilonianjja, janiw kunas jupanakar faltkänti, ukampis Diosar serviñatakejja janiw templosa, altaras utj-jjänti, sacerdotenakasa janiw lurañanakapjja nayrjam phoqjjapjjänti. Ukhamäkchïnsa, Diosan leyinakapar istʼañatakiw chʼamachasipjjäna. Amuytʼañataki, Daniel, Sadrac, Mesac, Abednego jupanakajja, janiw reyin manqʼapampisa ni vinopampis qʼañuchasipkänti. Ukhamarusa ‘Danielajj sapüruw Diosar mayisïna’ sasaw Bibliajj qhanañchi (Dan. 1:8; 6:10). Ukampisa, Diosan servirinakapatakejj Diosan leyinakap phoqañajj chʼamakïnwa, ¿kunatsa? Yaqha diosanakar serviri markanwa jakapjjäna.

5. ¿Kamsänsa Diosajj markapatjja, ukat kunas uka arunakarjamajj pasäna?

⁵ Diosar nayrajj servipkäna ukhamjja, ¿judionakajj wasitat servipjjaspänti? Janiw Diosarojj ukham servisjjaniti sasin inas judionakajj amuyapjjchïna. ¿Kunatsa? Uka tiemponjja, babilonionakajj janiw presonakapar antutapjjerïkänti. Ukampis Jehová Diosan arsutaparjamajja, markapajj wasitatwa Jerusalenar kuttʼañapäna. Tiempompejja, uka arunakajj ¡phoqasipunïnwa! Diosan arsutanakapajj phoqasipuniwa (Isa. 55:11).

6, 7. ¿Kuna amuyus mayjtʼayasiwayi?

⁶ Israelitanakajj Babiloniar apataw uñjasipjjäna, ¿cristianonakajj ukhaman uñjasipjjarakpachänti? Yatiyañataki revistajja, cristianonakajj 1918 maransa Jachʼa Babilonian katuntata uñjasipkaspäna, ukat 1919 maransa Jachʼa Babiloniat qhespipkaspäna ukhamwa walja maranakajj qhanañchäna. Ukampis aka yatichäwinsa, jutïr yatichäwinsa, kunatsa  uka amuyu mayjtʼayañajj wakisi ukwa yatjjataskañäni.

⁷ Ak amuytʼañäni: Jachʼa Babiloniajja, oraqpachankir kʼari religionanak apnaqeriwa. 1918 maranjja, janiw Diosan markapajj uka kʼari religionan apnaqatäkänti. Uka tiemponjja, ajllit cristianonakajj janiw kʼari religionanakamp jan waltʼayat uñjasipkänti, jan ukasti gobiernonakaw jilpach jan waltʼayapjjäna. Nayrïr Jachʼa Chʼajjwäwejj janïr qalltkäna ukhajja, ajllit cristianonakajj kʼari religionat jukʼat jukʼatwa mistusipkäna. Ukhamajja, ajllit cristianonakajj janiw 1918 maran Jachʼa Babilonian katuntata uñjasipkänti.

8. Apostolonakajj jiwjjapjjäna uka qhepatjja, ¿kunas pasäna? (21 janankir dibujo uñjjattʼam).

⁸ Pentecostés 33 maranjja, kimsa waranq jila cristianonakaw qollan ajayu katoqapjjäna. Bibliajj jupanakat akham siwa: “Ajllit jaqenakäpjjtawa, reyir serviri tukuyat sacerdotenakäpjjaraktawa; mä qʼoma markäpjjtawa; Diosan ajllisit markapäpjjaraktawa” sasa (1 Pedro 2:9, 10 liytʼañataki). Apostolonakajj jakasipkäna ukhajja, sumwa jupanakajj tamanak uñjapjjäna. Ukampis jiwjjapjjäna uka qhepatjja, tamankir yaqhep chachanakajj kʼarinakwa tamankirinakar yatichjjapjjäna, ukhamatwa cheqa yatichäwit mayninakar jitheqtayapjjäna. Cheqa yatichäwinak yatichañat sipansa, Aristóteles, Platón sat chachanakan yatichäwinakapwa yatichjjapjjäna (Hech. 20:30; 2 Tes. 2:6-8). Kʼarinak yatichapkäna uka chachanakajja, wali uñtʼatäpjjänwa, jupanakaw tamanaksa sarayapjjarakïna. “Jumanakasti jilapuräpjjtawa” sasinsa Jesusajj siskchïnjja, uka chachanakajj janiw ukar istʼapkänti, ukhamatwa kʼari religionajj qalltäna (Mat. 23:8).

9. ¿Kunjamsa kʼari religionajj gobiernompi mayachtʼasïna, ukat kunas pasäna?

⁹ Khä 313 maranjja, Constantino chachaw Roma marka apnaqäna, jupaw qalltkäna uka kʼari religionajj markpachan uñtʼatäñapatak chʼamañchäna. Ukatjja, uka religionampi gobiernompejj mayachtʼataw kunsa lurapjjäna. Amuytʼañataki, Constantino chachajj kʼari religión pʼeqtʼirinakampiw tantachtʼasïna. Uka tantachäwejj Concilio de Nicea sasin uñtʼatänwa. Uka tantachäwi tukuyatatsti, ‘Jesusajj Diosawa’ sasin jan creyitap laykojja, Arrio sacerdoteruw castigapjjäna. Qhepatsti, Teodosio I (379-395) chachaw Roma marka apnaqjjarakïna, jupaw Iglesia Catolicarojj markpachar uñtʼayjjäna. Teodosio chachajj apnaqkäna ukhajja, Roma markankirinakajj taqenis cristianöpkaspa ukhamwa yatjjattʼatanakajj sapjje. Uka tiemponjja, Diosat jitheqtir cristianonakajj kʼari religionan yatichäwinakaparjamaw sarnaqjjapjjäna, ukhamatwa Jachʼa Babiloniajj uñstäna. Ukhamäkchïnsa, Diosar taqe chuyma serviri ajllit cristianonakat mä qawqhanejja utjaskänwa. Jesusajj parlkäna uka trigor uñtasitäpjjänwa. Uka cristianonakajja, Diosat jan jitheqtas serviñatakiw chʼamachasipjjäna. Ukampis mä qawqhanikiw jupanakar istʼjjapjjäna (Mateo 13:24, 25, 37-39 liytʼañataki). Ukhamatwa Jachʼa Babilonian katuntatäpkaspas ukhamänjja.

10. ¿Kunjamatsa iglesian yatichäwinakapajj kʼarïtap yaqhepajj amuyapjjäna?

¹⁰ Jesusan jiwatapat pataka maranak qhepatjja, waljaniw griego aruta latín aruta Biblia liyisipkäna. Ukhamajja, Bibliajj kamsisa, iglesianjj kamsasas yatichapjjaraki ukjja,  sumwa amuytʼapjjäna. Ukhamatwa iglesian yatichäwipajj kʼarïtapa amuyapjjäna. Ukatjja, janiw uka kʼari yatichäwinakarjam sarnaqjjapjjänti. Ukampis maynitï, amuyunakap yaqhanakaru parlaspäna ukhajja, jiwayataw uñjasispäna.

11. Diosat jan yatipjjañapatakejja, ¿kunsa iglesiajj luräna?

¹¹ Qhepatjja, mä jukʼanikiw griego arsa jan ukajj latín arsa yatjjapjjäna. Ukhamïpanjja, kʼari religionan pʼeqtʼirinakapajj janiw yaqha arunakaru Biblia jaqokipayañ munapkänti. Iglesia pʼeqtʼirinakatsa, yatjjattʼatanakatsa yaqhepajj Biblia liyipjjarakïnwa. Ukampis yaqhepajj janiw liytʼañsa, qellqañsa puedipkänti. Kunapachatï maynejj iglesian yatichäwinakap contra saytʼasïna ukhajja, tʼaqhesiyataw uñjasirïna. Ukatwa ajllit cristianonakajj jamasat tantachasipjjerïna, yamas yaqhepajja janiw tantachasjjapjjänti. Babiloniar apata judionakajja, janiw Diosar mayachtʼata sirvjjapjjänti, ajllit cristianonakajj ukhamanwa uñjasipjjarakïna. Cheqas Jachʼa Babiloniaw taqenir apnaqäna.

12, 13. Cristianonakajj wasitatwa Diosar servipjjaspäna sasajja, ¿kunatsa sistanjja? Uk pä toqet qhanañchtʼam.

¹² Diosar nayrajj servipkäna ukhamjja, ¿cristianonakajj wasitat servipjjaspänti? Jïsa. ¿Kunatsa ukham sistanjja? Uk pä toqet uñjañäni: maya, nayrïr imprentanakaw lurasïna. Ukampis janïr uk luraskipanjja, mä arunjja, 1450 maranak nayrajja, amparampiw Biblia copiaqapjjäna, ukajj chʼamakïpachänwa. Wali yatjjattʼat mä qellqerejja, 10 phajjsinakanwa Biblia copiaqaspäna.  Jupanakajj lipʼichinakaruw copiaqapjjerïna. Ukatwa Biblia copiatanakajj mä qawqhak utjäna, uk alañajj wali carönwa. Ukampis imprentampejj mayjänwa, ¡maynikiw 1.300 jila hojanak sapüru imprimïna!

¹³ Paya, niya 1500 maranakanjja, mä qawqha chachanakaw yaqha arunakar Biblia jaqokipapjjäna. Ukham lurasin jiwayatas uñjasipjjañapäkchïnjja, jan ajjsartʼasaw lurapjjäna. Uk yatisajja, kʼari religión pʼeqtʼirinakajj wal colerasipjjäna, ¿kunatsa? Akham sasaw sapjjäna: “Jaqenakajj Biblia arupat liytʼapjjani ukhajja, akham jisktʼapjjestani: ‘¿Kawkhansa Bibliajj purgatoriot parli? Maynin jiwatapata misa lurayasajja, ¿kawkhansa pagañapawa sasin qhanañchi? Papanakatsa, cardenalanakatsa, ¿kawkhansa Bibliajj qhanañchi?’” sasa. Kuntï Aristóteles, Platón chachanakajj sapkäna ukakwa iglesianakan yatichapjjäna, uka chachanakajj Jesusat nayraw jakapjjäna. Kunapachatï yatichäwinakapat jisktʼapjjäna ukhajja, religión pʼeqtʼirinakajj wal colerasipjjäna. Kʼari yatichäwinakarjam jan sarnaqerinakajja, jiwayataw uñjasipjjäna. Religión pʼeqtʼirinakajja, janiw jisktʼayasiñsa ni Biblia liyipjjañapsa munapkänti, ukhamapuniw pasäna. Ukampis yaqhepanakajja, janiw Jachʼa Babilonian munañaparjam sarnaqañ munapkänti. Kuntï Bibliajj yatichki ukajj cheqätapa yatisajja, jukʼampiw yatiñ munapjjäna.

14. 1) ¿Kunsa Bibliat yatjjatañ munirinakajj lurapjjäna? 2) Cheqa yatichäwinak yatjjatañatakejja, ¿kunsa Russell jilatajj luräna?

¹⁴ Waljaniw Biblia liytʼañsa, yatjjatañsa munapjjäna, ukatsti yateqapkäna ukatsa parlañwa munapjjarakïna. Janiw kuntï religión pʼeqtʼirinakajj sapkäna ukar creyiñ munapkänti. Ukatwa kawkhantï Bibliat yatjjatañajj jan jarkʼatäki uka markanakar sarjjapjjäna. Ukanakat mayajj Estados Unidos markawa. Ukanwa Charles Taze Russell jilatasa, mayni jilatanakasa, 1870 maran Bibliat jukʼampi yatjjatapjjäna. Qalltanjja, Russell jilatajj kawkïr religionas cheqapajja ukwa yatiñ munäna. Ukatakejja, walja cristiano religionanakana, ukhamarak jan cristianöpkäna ukanakan yatichäwinakapwa yatjjatäna, ukatsti Bibliarjamajj cheqti yatichasipki janicha ukwa uñjäna. Yatjjatkäna ukarjamajja, janiw ni mä religionas Bibliarjamajj yatichkänti. Ukatwa Russell jilatajj iglesia pʼeqtʼirinakampi parlir saräna. Jupajja, kuntï Bibliajj cheqpachapuni yatichki uk yatichapjjañapwa munäna. Ukampis uka sarayirinakajj janiw munapkänti. Uk uñjasajja, Bibliat Yatjjatirinakajj kʼari yatichirinakat jitheqtasinwa Diosar serviñ amtapjjäna (2 Corintios 6:14 liytʼañataki).

15. 1) Cristianonakajj Jachʼa Babilonian munañapankapjjänwa, ¿kunapachas ukajj pasäna? 2) ¿Kuna jisktʼanakarus jutïr yatichäwin qhanañchaskañäni?

¹⁵ Aka yatichäwinjja, qhepïr apostolajj jiwjjäna uka qhepatwa cristianonakajj Jachʼa Babilonian munañapankapjjäna sasaw yatjjatawaytanjja. Jutïr yatichäwinjja, aka jisktʼanakaruw qhanañchañäni: 1914 mara nayraw ajllit cristianonakajj Jachʼa Babiloniat mistusipkäna sasajja, ¿kunatsa sistanjja? Nayrïr Jachʼa Chʼajjwäwi tiemponjja, cristianonakajj janiw nayrjam yatiyjjapjjänti, uk uñjasajj ¿kunjamakis Jehová Diosajj jikjjataspachäna? Uka tiemponjja, ¿yaqhep cristianonakajj akapachat jitheqtañajj kamsañsa muni uk amuyapjjänti? ¿Janit Diosan munañaparjam sarnaqjjapjjäna? Niyakejjay qhepïr apostolon jiwatapata cristianonakajj Jachʼa Babilonian munañapankapchïnjja, ¿kunapachas ukat mistupjjäna?