Kunjamtï Jesusajj siskänjja, Diosan Reinopat suma yatiyäwinakajj aka oraqpachanwa yatiyasiski (Mateo 24:14). Daniel librorjamajja, uka Reinojj Diosan uttʼayat mä gobiernowa. Babilonia markamp qalltasin jichhürunakkamajja, kawkïr markanakas wali chʼamanïpjjañapäna ukaw Daniel 2 qellqatan qhanañchasi. Daniel 2:44 textojj akham siwa:

“Alajjpachankiri Diosajj mä yaqha reino saytʼayarakini, uka reinosti janipuniw tukjatäkaniti ni apnaqatäkarakinisa yaqha markanakampejja, jan ukasti jupaw taqe yaqha reinonakarojj tukjani, wiñayan wiñayapaw uka reinojj utjarakini”.

Biblian uka arunakapasa yaqha profecianakasa, kunjamsa Diosan Reinopajj jaqenakan apnaqat gobiernonak lantejj saytʼasini, aka oraqensa sum jakasiñ apanini ukwa uñachtʼayistu. ¿Diosan Reinopamp apnaqatäñajj kunjamäpachänisa? Kuna promesanakas uka Reinon phoqasini uk jichhajj uñjañäni.

• GUERRANAKAJJ JANIW UTJ-JJANITI

  Salmo 46:9: Diosajj “aka oraq tukuskamaw nuwasiñ tʼakurayi; arconak jiskʼa jiskʼa pʼakinoqe, lansanak tʼunari, nuwasiñ carronaksa ninampiw phichhantaraki”.

  Armamentonak lurañataki aptaski uka qollqetï jaqenakar yanaptʼañatak aptasispa ukhajja, ¿kunjamakis jakassna? Diosan Reinopanjja, “guerranakajj janiw utj-jjaniti” siski uka arunakajj phoqasipuniniwa.

• JANIW USUNTAÑAJJ UTJ-JJANITI

  Isaías 33:24: “Janiw khitis siskaspati: ‘Usutätwa’ sasajja”.

  Cáncer, diabetes, chuymat usuntañanaka, jan ukajj yaqha ukham usunak jan utj-jjaspa ukhajja, ¿kunjamakis jakassna? Janiw hospitalanakasa, ni qollanakas munasjjaspati. Cheqas ukhamaw jutïr urunakan jakasjjañäni, janipuniw usuntañajj utj-jjaniti.

• JANIW MANQʼAT PISTʼAÑAJJ UTJ-JJANITI

  Salmo 72:16: “Trigojj yapunakan jilarkir utjpan, qollu patanakansti jilantarakpan”.

  Manqʼañanakajj aka oraqen wal utjani, taqeniw mä igualak katoqapjjarakini. Manqʼatjam usuntañas janiw utj-jjaniti.

• JANIW LLAKISIÑASA, JACHAÑASA, JIWAÑAS UTJ-JJANITI

  Apocalipsis 21:4: “Diosajj taqe jachanakapwa nayranakapat picharani, janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti. Kunanakatï nayrajj utjkäna ukanakajj tukusjjewa”.

   Jaqenakajj janiw juchararäjjapjjaniti, wiñayatakiw aka oraqensa mä suma paraison jakasipjjani. Taqe kun Luriri Jehová Diosaw ukham arsuwayi.

¿Diosan promesanakapajj phoqasipunpachäniti? Kuntï Bibliajj siski ukajj jaqenakatak wali sumäkchisa, wiñay jakasiñajj waljanitak janiw creyiñjamäkiti. ¿Kunatsa? Janiw khitirus wiñay jakiri uñtʼapkiti.

Nayratpachwa jaqenakajj juchar katuyata, usuntasa, jiwasa ukham jakastanjja. Ukatwa tʼaqesiñajj utjapuniniwa sasin jaqenakajj amuyapjje. Ukampis Diosajj janiw ukham jakasiñatak lurawaykistuti.

Arsutanakapar jukʼamp confiyañasatakejja, Diosajj akham sänwa: “Lakajjat mistkis uka arunakajja, janiw nayan ukarojj chʼusaki jan kun lurasajj kuttankaniti, jan ukasti kuntejj nayajj munkta ukwa luri, kuntejj nayajj siskta ukwa phoqharaki” sasa (Isaías 55:11).

Jehová Diosajj ‘jan kʼarisir Diosawa’ sasaw Bibliajj qhanañchi (Tito 1:2). Ukhamajj niyakejjay Diosajj uka promesanak arsuwaychejja, akham jisktʼasiñasaw walïspa: “¿Cheqapunit mä suma paraíso oraqen wiñayatak jakassna? ¿Diosan promesanakap phoqasir uñjañatakejj kun lurañasas wakisispa?” sasa. Aka revistan jutïr yatichäwinakapanwa uka jisktʼanakarojj qhanañchasiskani.