Maynir uñtʼktan ukhajja, “¿kamsatätasa?” sasaw nayraqat jisktʼañ yattanjja. Diosar ukham jisktʼsna ukhajja, ¿Jupajj kamsistaspasa?

‘Nayätwa Jehová Tatitojja, ukarakiw sutijajja’ (Isaías 42:8).

Diosatakejj sutip yatiñasajj wali importantewa. Janiw khitis Diosar uka suti uchkiti, Jupapachpaw uka sutinïñ ajlliwayi. Ukatwa akham säna: “Akawa nayan wiñayatak amtasiña sutejjajja, uka sutejjawa taqenitakisa wiñayan wiñayapatakejja” sasa (Éxodo 3:15). Biblianjja, Taqe Chʼamani, Awki, Tatitu, jan ukajj Dios siski uka sutiñchäwinakat sipansa, Diosan sutipaw jukʼamp uñsti. Abrahán, Moisés, David, Jesús, jan ukajj yaqha sutinakat sipansa, Diosan sutipaw jukʼamp uñstaraki. Ukat jukʼampisa, Jehová Dios pachpaw sutip uñtʼañas muni. Ukatwa Bibliajj akham qhanañchi: “Juma sapak Diosätam [jan ukajj nayra qellqatanakarjamajja, Jehová Diosätam] yatipjjpan” sasa (Salmo 83:18).

Jesusatakejj Diosan sutipajj wali importantewa. Padrenuestro sasin uñtʼat oracionanjja, Jesusajj akham mayisiñwa discipulonakapar yatichäna: “Sutimajj jachʼañchatäpan” sasa (Mateo 6:9). Jupapachpaw mä oracionan akham sarakïna: “Awkiy, sutim jachʼañcham” sasa (Juan 12:28). Jesusatakejj Diosan sutip jachʼañchañajj wali importantënwa, ukatwa akham säna: “Nayaw sutimjja jupanakar uñtʼayta, uñtʼayaskakïwa” sasa (Juan 17:26).

Diosar uñtʼapki ukanakatakejj Jupan sutip yatiñajj wali importantewa. Diosan nayra servirinakapajja, “Diosajj sutip laykuw jarkʼaqestani, salvarakistani” sasaw confiyapjjäna. “[Jehová] Tatitun sutipajj imantasiña jachʼa torrer uñtatawa, aski jaqenakajj jupan ukar imantasiñataki jutapki ukanakatakejja” (Proverbios 18:10). “Taqe  khititï Jehová Diosan sutip artʼaski ukajj salvatäniwa” (Romanos 10:13). Diosan servirinakapajj Jupan sutipwa apapjjañapäna, ukatwa Bibliajj akham qhanañchi: “Kunjamsa Diosajj yaqha markanakar jichhajj katoqe, kunjamsa sutipatakejj uka markanak taypit mä marka ajllisi ukwa Symeonajj phoqatpach qhanañchi” sasa (Hechos 15:14; Miqueas 4:5).

Diosajj kunjamasa ukwa yatichistu. Walja yatjjattʼat jaqenakajja, “Diosan Jehová sutipajj ‘Jupaw taqe kunsa utjayi’ sañwa muni” sasaw sapjje. Jehová Diosajj jupapachpat parlkasajj Moisesar kamsänsa, ukaw sutipajj kamsañsa muni uk amuytʼañatak yanaptʼistu. Jupajj akham sänwa: “Nayajj kunäñtï munkä ukaruw tuköjja” sasa (Éxodo 3:14, NM). Cheqas Diosaw taqe kunatï aka oraqen utjki ukanak utjayi. Mä arunjja, Jupaw taqe kuns lurawayi, ukampis sutipajj janiw ukak amuytʼaykistuti, jan ukasti, arsutanakap phoqañatakejj kunar tukuñatï wakiski ukaruw Diosajj tukuspa, luratanakapampiw amtanakap phoqayarakispa, ukwa sutipajj amuytʼayarakistu. Diosan sutiñchäwinakapajj qhawqha autoridadanisa, qhawqha chʼamanisa ukanaksa qhanstaykchejja, Jehová sutipakiw Jupajj kunjamasa, kunarus tukuspa ukanak qhan amuytʼayistu.

Jiwasat llakisitapwa yatichistu. Diosan sutipajj kamsañsa muni ukajja, qhawqsa luratanakaparusa jaqenakarus munasi ukwa amuytʼayistu. Jehová Diosajj jupar uñtʼañas wal muni, ukatwa sutip yatiyistu. Cheqansa, janïr jaqenakajj sutipat jisktʼasipkipanwa Diosajj sutip yatiyjjäna. Jehová Diosajj janiw jan uñtʼañjama mä espiritükaspas ukham uñjayasiñ munkiti, jan ukasti, Jupar jakʼachasiñaswa muni (Salmo 73:28).

Diosan sutip aytasajja, Jupar jakʼachasiñ munataswa uñachtʼayasktanjja. Akham amuytʼañäni, jumatï maynin amigopäñ munasin “sutijatwa sitäta” sasin sasma, ukat jupajj jan munkaspa ukhajja, ¿cheqapunit amigomäñ munatap uñachtʼayaspa? Janiwa. Jehová Diosampejj ukhamarakiwa. Jupajj kamsatasa ukwa yatiyistu, uka sutip aytañaswa munaraki. Ukhamajj sutip aytasajja, Jupar jakʼachasiñ munataswa uñachtʼayasktanjja. Maysa toqetjja, khitis sutipat lupʼiski uksa sumwa Jehová Diosajj yatiraki sasaw Bibliajj qhanañchi (Malaquías 3:16, NM).

Diosar uñtʼañatakejja, sutip yatiñajj wali wakiskiriwa. Ukampis janiw ukak wakiskiti, jan ukasti, Jupajj kunjam Diosasa uk yatiñaw wakisiraki.