Sutipax Vallenkaskiwa

ST. MORITZ. ¿Jumax uka sut uñtʼtati? Inas istʼirïsta, uka markax turistanakansa ukat Uraqpachansa uñtʼatarakiwa. Ukax Suiza markat aynach tuqinkiwa. Italia markampi qurpanirakiwa. Ukampis janiw khunu qullunakan muyuntat Engadina sat suma valle uñjirikix nayra maranakatpach sarapxirïkiti. Jan ukasti Parque Nacional Suizo uñjiriw sarapxarakirïna. Ukasti wali suma chʼuxñä uraqiwa, ukat kunayman animalanakaniwa, ukanakaw taqi kun Luriri Jehová Diosarux jachʼañchapxaraki (Sal. 148:7-10). Ukhamwa Diosarux taqi Luratanakapax jachʼañchapxi, ukhamarakiw 1600 maranakatpachas jaqinakax costumbrenakapampix jachʼañchapxirïna.

Uka vallenkir utanakanxa, pirqanakanx Diosan sutipaw qillqkatata, ukat uta punkunakanwa jukʼamp uñjasi, ukaw muspharkañaxa.  Nayra maranakanxa, qillqatanakampiw jaqinakax utanakap kʼachachtʼapxirïna, pinturampi qillqtʼata, jan ukax cincelamp kʼutsusaw qillqapxirïna. Kunjamtï aka foton uñjaskixa, Bever jiskʼa markankir mä utax akham qillqataniwa: “1715 mara. Jehová Diosaw qalltaxa, Jehová Diosaw tukuyaxa. Taqi kunas Diosampi, jan Diosampix janiw kunas utjkaspati” sasa. Kunjamtï uñjktanxa, uka nayra qillqatanx Diosan sutipax pä kutiw uñsti.

Madulain mark uñjir sarsna ukhaxa, walja maranakani mä qillqatwa jikxatsna, ukansti akham siwa: “Salmo 127. Tatitutix jan utachkaspaxa, inamayakiw utachirinakax chʼam tukusipkaspa. Lucio Rumedio. 1654 mara” sasa.

¿Kunats uka markanx Diosan sutip jachʼar aptapxäna? Reforma Protestante tiemponakanxa, Bibliax romanche arunwa apsusïna, uka arusti latin arutwa juti, ukat Engadina markanwa uk parlapxi. Chiqas Biblia sapakiw uka arurux nayraqat jaqukipasiwayi. Diosan Arunakap liyiñax walpun uka markankirinakarux yanaptʼawayi. Ukat uta pirqanakaparux janiw Diosan sutipak qillqapkänti, jan ukasti Bibliankir jiskʼa tʼaqanakwa Diosan sutipamp kunax qillqaqapxäna.

Patak patak maranak qhipatxa uka qillqatanakax Diosan sutip jachʼañchaskakiwa. Inas jumax uka vallenkirïsta, jan ukax visitasksta, ukampis Diosat jukʼamp yatxataskakiñatakix Bever markankir “Jehová Diosan Qhanañchirinakapan Tantachasiñ Uta” satäkis ukar jutañamatakiw invitapxsma, ukanwa Diosan sutipax uñstaraki.

[7 janan fotopax khitin apsutasa]

© Stähli Rolf A/age fotostock