Jesusajj Pereat jutkasinjja, Betaniaruw jakʼachasinjjäna, Betaniajj Jerusalenat 3 kilometronak sarañankiwa. Mariampi Martampejj Lazaron jiwatapat wali llakitäpjjänwa. Jupanakajj Lazaron kullakanakapapjjänwa, jupanakar chuymachañatakejj waljaniw sarapjjäna.

Ukhamaruw Martarojj Jesusaw jutaski sasin yatiyapjjäna, jupasti Jesusar jikjjatirejj jankʼakiw saräna. Lazarojj pusi urunakaw jiwatäjjäna, kuntï Martasa kullakapasa uka urunakajj lupʼipkäna ukwa Martajj Jesusar akham sasin säna: “Tata, jumatï akankasamänjja, janiw jilajajj jiwkaspänti” sasa. Martajj Jesusan yanaptʼapatjja janiw pächaskänti, ukatwa akham säna: “Jichhajj yatiraktwa kuntï jumajj Diosar maykäta ukanakjja Diosajj churätamwa” sasa (Juan 11:21, 22). Jesusajj ‘Lázaro jilajarojj yanaptʼaspawa’ sasaw Martajj amuypachäna.

Jesusajj jupar sarakïnwa: “Jilamajj sartjjaniwa” sasa. Martajj jiwatanakasa Abrahanasa aka oraqen jaktanipkani uka toqetsa Jesusajj parlkaspa ukham amuyäna. Ukajj phoqasipuniniwa sasaw confiyäna, ukatwa akham säna: “Nayajj yattwa, qhepa urun jiwatanakajj jaktanipkani ukhaw jupajj sartanjjani” sasa (Juan 11:23, 24).

¿Jesusajj ukaratpachat Lazaror jaktayaspäna? Jiwatanakar jaktayañatakejj Diosaw chʼam churitu sasaw Jesusajj Martar amtayäna, akham sasa: “Khititejj nayar confiyki ukajja, jiwkani ukhas jaktaniniwa. Taqe khititï jakaski, nayarus confiykitu ukajja, janipuniw kunapachas jiwkaniti” sasa (Juan 11:25, 26).

Ukham sasinjja, Jesusajj janiw discipulonakapajj janipunis jiwapjjañapäpkaspa ukham sañ munkänti. Jupasa jiwayatäñapänwa, ukjja discipulonakapajj yatipjjänwa (Mateo 16:21; 17:22, 23). Jesusajj jupar confiyirinakajja wiñay jakañwa katoqapjjaspa sañwa munaskäna. Waljanejj jiwatat jaktayatäsinwa wiñayatak jakasipjjañapäna. Maysa toqetjja, Diosat jan jitheqtir servirinakapajja akapachan tukusiñap puriniñapkamajj inas jan jiwapkchiniti. Cheqansa Jesusar confiyapki ukanakajj janipuniw wiñayatak jiwapkaniti.

Jesusajj “jiwatat jaktañasa jakañasa nayätwa” sasaw säna. Ukhamajj ¿pusi urunak jiwatäkäna uka Lazaror yanaptʼaspänti? Jesusajj Martar akham jisktʼäna: “¿Jumajj uk creytati?” sasa. Martasti sarakïnwa: “Jïsa, ukhamaw Tata, nayajj creytwa, jumajj Diosan Yoqap Cristötawa, khititï akapachar jutki ukätawa” sasa. Martajja Jesusajj ukürpachaw Lazaror yanaptʼaspa sasaw confiyäna, ukatwa María kullakapar jawsir saräna, jamasatwa akham säna: “Yatichirejj akankjjewa, jawstamwa” sasa (Juan 11:25-28). Mariasti ukaratpachaw utapat mistüna, jaqenakajj arkanipjjarakïnwa, Lazaron ukaruw saraskpacha sasaw amuyapjjarakïna.

Lazaron ukar sarañat sipansa Mariajj Jesusan ukaruw saräna. Nayraqataparuw jachtʼasis  killptʼasïna, kullakapjamarakiw akham säna: “Tata, jumatï akankasamänjja, janiw jilajajj jiwkasapänti” sasa. Mariampiru mayni jaqenakampir jachaskir uñjasajja, Jesusajj walpun llaktʼasïna, chuymapsa chʼalljjtayasïnwa, ukatjja jacharakïnwa. Ukankirinakajja Jesusajj Lazaror munasitap amuyapjjänwa. Ukampis yaqhepajj akham sapjjänwa: “Aka jaqejj mä juykhurus nayrat qollarakïnsä, ukhamajj aka jaqen jan jiwañapatakejj ¿janit kuns lurkaspänjja?” sasa (Juan 11:32, 37).