20 YATICHÄWI

Pisin jakastxa, ¿kamachiristsa?

Gregorio sat waynaxa Europa Inti jalsu tuqin utjasi, ukampis Europa Inti jalanta tuqinkir waynanakjam isinïñ muni ukat jupanakjam radionïñ ukat televisionanïñ munaraki. Wal munatap laykuxa, Austria markar sarañwa amti. ¿Gregoriox “pobrew” sasmati?

□ Jïsa □ Janiwa

Uka markatxa, África tuqinkir jaya markanxa, Loyisow familiapamp lawat lurat mä jiskʼa utana jakasiraki. Utap jakʼankir markan utjasirinakjam jakasiñwa munaraki, kunattix uka markanxa,“wali suman jakasipxi”: umapasa luzapas utji ukhamawa. ¿Loyisox pobrïpachati?

□ Jïsa □ Janiwa

KAWKI markanxay jumax utjassta ukhamarjamawa, khitiw pobrexa sasin sasmaxa. Sañäni, Gregoriox inas pobrïtwa sasin sischispa, ukampis Loyisompit jupampit parlsnaxa, jupax “qamirïskiwa”. Ukhamasti, familiamax qhawqha qullqinïskchisa, jumat jukʼamp pisinkirinakax utjiwa. Ukampis yatiqañ utar sarañatak jan suma isimas utjkchi jan ukax utaman jan umax utjkchi ukhaxa, ukanak yatiñax inas jan chuymachtʼkchïtamti.

Pisinkir familian jilsuwayapxi uka yaqhip wayn tawaqunakaxa, janis mayninakjamäkaspa ukham jiskʼachasipxi. Ukatwa jan llakisiñatakix machañar uchasipxi jan ukax droganak umapxi. Ukampis ukham lurasax jukʼamp  aynachtʼapxi. Machañar katuyatäpki uka jaqinakatakixa alcoholax “mä katarjamawa achjasina wali usuyasi” uk sum yatipxi (Proverbios 23:32). Sudáfrica tuqin utjasiri María sat mä tawaqitax mamapampikiw pisin jakasi, jupasti siwa: “Machjasisin jan ukax droganak umasin jan waltʼäwinakat armtʼasiñ munañax inamayakiwa, jukʼamp jan walinakaruw aptʼistaspa” sasa.

Jumax janisay mayni wayn tawaqunakjam machañaru jan ukax droganak umañar uchaskchïtaxa, ukampis jan waltʼäwimat mistuñax chʼamäspawa. Ukhamasti, ¿kawkinsa yanap jikxatasma? Llakinakax jistʼantkistaspasa ukhamawa, ukampis Biblian jikxataski uka iwxtʼanakawa, mä llavïkaspas ukham qhispiyätamxa ukat uka iwxanakarakiw suma chuymamp uñjañamatakix yanaptʼätamxa. ¿Kunjamatsa? Uk jichhax uñjañäni.

Kunatix utjktam ukanakar askit uñjma

Nayraqatxa, kunatix utjktam ukanakaruw wali askit uñjañamaxa, janiw jan utjktam ukanakatxa lupʼiñamäkiti. Mä familiax mä amtaki mayachtʼat sarnaqapxi ukawa qullqinïñat sipansa jukʼamp khusaxa. Bibliax siwa: “Vaca aycha uñisiñampi manqʼañat sipansa, jukʼamp askiwa munasiñampi chʼuxñanaka manqʼañaxa” sasa (Proverbios 15:17). Ukatxa, Jehová Diosar yupaychir wayn tawaqunakatakix yaqha yanaptʼaw utjaraki: ukasti cristiano jilat kullakanakapawa (1 Pedro 2:17).

Kunanakatix utjktam ukanakarux suma chuymampiw uñjañama. Inas mä jiskʼa utanak utjassta, inas isimax thantjatächi jan ukax watantatächi, jan ukax inas kikpa manqʼaki sapürus manqʼasksta. Ukampis amuytʼasim ¿suma jachʼa  utanïsakiti jan ukax jila alani isinïsakiti Diosarux sum yupaychsna? ¿Jan ukax jila alani manqʼanak manqʼasakiti kʼumar sarnaqsna? Janiwa. Apóstol Pablox ukham sarnaqawayäna, awisax pisin jakasïna, awisasti taqi kunanirakïnwa (Filipenses 4:12). ¿Kunsa jupax yatiqawayi? “Isisatix utjaskchixa, ukhamarak manqʼañasatix utjaskchixa, ukampix kusisitakïskañasawa” sasaw säna (1 Timoteo 6:8).

Sudáfrica tuqin pisin jakasir Eldred sat mä waynitux siwa: “Ukham pisin jakañxa iyaw sisxtwa, inamayaw taqi kunanïñ munasksnaxa” sasa. Yatiqañ utar sarañ pantalonapax thantjasxäna ukhaxa, mamapaw watanttʼarapïna. Jupasti saskakiwa: “Awisax jiskʼachapxirïtuwa, ukampis waljamäski ukhax uskusiskirïtwa, suma tʼaxstʼataw sarirïta ukaw jukʼamp wakiskirïnxa” sasa.

Juma pachpax jukʼampi munasiñamawa

James sat 11 marani waynituxa, mamapamp kullakapamp kunawa mä pobre lugaran jakasipxi, ukasti Johannesburgo (Sudáfrica) marka jakʼankiwa. Pisinsay qamasipxchïnxa, pä qurinïkaspas ukhamänwa, ukanakax akanakawa: taqi chuymaw tiempsa apstʼasïna ukat taqi chuymaw chʼamapampix irnaqtʼarakïna. Sabadonakampi domingonakampiwa Jehová Diosan Qhanañchirinakapan Tantachasiñ Utap lurañ yanaptʼäna.  Ukham yanaptʼatap laykux horanakas jankʼakiw jaläna siwa. Ukhamaraki, ukham irnaqatap laykux wal kusisïna ukat jupa pachpas jukʼamp munasirakïna. Mä kutix akham sänwa: “Tantachasiñ Uta lurañ jurnäla yanaptʼasax walpun kusista” sasa.

Yaqha luräwix akarakïspawa: utat uta Biblian yatichäwip yatiyir saraña (Mateo 24:14). Jehová Diosan Qhanañchirinakapatxa walja wayn tawaqunakaw uka luräwi phuqirix sarapxi. Ukampis janiw suma jakäwitak parlapkiti, jan ukasti jakäwinakapsa jukʼampwa munasipxaraki. Chiqpachansa ukham lurasax janiw qullqi jikxatapkiti, ukampis ¿Jesusax Esmirnankirinakar kamsänsa uk amtasktati? “Tʼaqhisitamsa, jan kunanïtamsa yatiraktwa, ukampis janiw jan kunanïkapuntati jan ukasti qamirïsktawa” sasaw säna. Jan kunanïtam yattwa sarakïnsä, ¿ukat kunatsa  “qamirïsktawa” sasax sispachäna? Diosar wali munasipxatap layku. Jesusan luqtasïwipar iyawsasax tiempompix wali qamirinakapxañapänwa, kunattix jan jiwirinakapxañapänwa (Apocalipsis 2:9, 10).

Jutïr pachat janipun armtʼasimti

Qullqinïskañänisa janisa, Diosan amigopäsnawa. Bibliax akham siwa: “Qamiri jaqisa, pobre jaqisa pachpa jaqikiwa; panpachaniruw [Jehová] Tatitux ucharaki” sasa (Proverbios 22:2). Uk amuyasaxa, waranq waranqa wayn tawaqunakaw pobrïkasas nayrar sartapxi. ¿Kunatsa? Kunattix kusisiñax janiw qullqinkkiti, jan ukasti Jehová Diosamp sum apasitas laykuw kusisitätanxa. Jupaw taqinir katuqi ukat jutïrin suma uraqin jakasxapxäta sarakiwa, ukansti janiw pobrïñax utjkaniti (2 Pedro 3:13; Apocalipsis 21:3, 4).

Ukañkamasti, kunatix utjktam ukanak sum apnaqasim ukat jutïr pachat janirak armtʼasimti ukat alaxpachar suma yänak imarakma (Mateo 6:19-21). Pisinkirïkasasa, kusisit sarnaqasmawa jan ukat payachasimti.

BIBLIAX KAMSISA

“Jaqin jakañapasti janiw kunatix utjarapki uka walja yänakapankkiti.” (Lucas 12:15)

AKHAM LURASMAXA

Jan cigarro fumamti ni alcoholampis machjasimti; janirak qullqi laykukis anatamti. Familiamantï ukham sarnaqasipkchixa, jumat yatiqasipxañapatakix suma sarnaqäwimamp yanaptʼma.

¿YATIYÄTATI?

Janisay walja qullqinïkstaxa, ukampis kuntï Bibliax siski ukhamarjam sarnaqañaw kusisit jakasiñataki yanaptʼätamxa (Filipenses 4:12, 13; 1 Timoteo 6:8; Hebreos 13:5).

¡AKANAK LURÄ!

Akanakaw nayan utjitu: ․․․․․

Yaqhanakar yanaptʼañ laykuxa, kunanakatï utjkitu ukanakampix akanak lurasaw yanaptʼä: ․․․․․

Awkijarus jan ukax taykajarusa, ¿kuns aka tuqit jisktʼañ muntxa? ․․․․․

JUMASTI, ¿KAMSASMASA?

● Kawki markanxay utjasstanxa ukhamarjamawa, khitis pobrexa sasin sisnaxa, ¿kunatsa?

● Jan walinakat mistsuñatakixa, alcoholamp machjasiñasa droganakamp qulljasiñasa jan ukax yaqha jan wali qullanakamp qulljasiñaxa, ¿kunatsa jan walïkpacha?

● Jan añcha pisinkañatakixa, ¿kunanaksa lurasmaxa?

[168 janan qhanañchäwipa]

“Janisay pisin jakañ munxchiyätxa, inamayaw pandillanakarus makataskayätxa inamayaw lunthatasiskayätxa. Mita masinakax ukanakaruw mitisiwayapxi ukat jichhax drogampikiw jan ukax alcoholampikiw sarnaqxapxi, ukat yaqhipanakax carcelan katuntatäpxiwa.” (George)

 [164 janan recuadropa/fotonakapa]

Wakichasiñatak jananaka

¿Anqäx markar sarxañajäspati?

Walja wayn tawaqunakaw trabajo jikxatañataki ukat jupanakpach yanaptʼasiñataki jan ukax familiapar yanaptʼañataki anqäx markanakar sarxapxi. Yaqhanakax yaqha arunak yatiqiriw sarapxaraki, yaqhipanakasti jachʼa yatiqañ utanakar jukʼamp yatxatiriwa jan ukax jan waltʼäwit mistsuñatakiw sarxapxi. Ukat yaqhip jilat kullakanakasax ukhamarakiwa, kawkhantï Jehová Diosat yatiyañax wakiski ukar yanaptʼañatakix sarapxaraki. Ukampis anqäx markar sarxañatakix wali sumwa amuytʼasipxañapa. Ukhamasti, jumatï ukham sarañ amtaskstaxa, Bibliat apstʼat aka qillqatanak liytʼam ukat ukarjam amuytʼma. Aka jisktʼäwinak jisktʼasim ukat mä papelar kuntï qhanañchkäta uk qillqtʼma. Ukat wali suma amtar puriñatakix Jehová Diosatwa yanap mayisiñama.

◻ ¿Autoridadanakan kuna mayitanakapsa phuqañajaxa? (Romanos 13:1.)

◻ ¿Qhawqha qullqsa anqäx markar sarxañatakix wakisispa? (Lucas 14:28.)

◻ Kunjamsa naya sapak jakasï ukxa, ¿jichhjatpachti uñachtʼayasktxa? (Proverbios 13:4.)

◻ Anqäx markan jakapxatayna uka suma amuytʼasir jaqinakatxa, ¿kuna suma iwxtʼanaksa katuqtxa? (Proverbios 1:5.)

◻ ¿Sarxañajatxa kamsis awk taykajaxa? (Proverbios 23:22.)

◻ ¿Kunatsa anqäx markar sarañ munta? (Gálatas 6:7, 8.)

◻ Yaqha jaqinakamp jakirist ukhaxa, ¿Jehová Diosar luqtaskakiñajatakix yanaptʼapxitaspati? (Proverbios 13:20.)

◻ ¿Kuna luräwinakas chijiru, jan wali sarnaqañaru jan ukax Jehová Diosat jithiqtañaru puriyitaspa? (Proverbios 5:3, 4; 27:12; 1 Timoteo 6:9, 10.)

◻ Chiqpachansa, ¿anqäx markar sarasinxa kuna askinak jikxatañsa munta? (Proverbios 14:15.)

[167 janan fotopa]

Llakinakax jistʼantkistaspasa ukhamawa, ukampis Biblian jikxataski uka iwxtʼanakaw mä llavïkaspas ukham qhispiyätamxa